Nehemiah 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Sa ika-24 nga adlaw sang amo nga bulan, ang mga tawo sang Israel nagtipon sing tingob sa pagpuasa kag sa pagpakita sang ila kasubo tungod sang ila mga sala. Nagbayo sila sing sako kag nagbutang sing yab-ok sa ila mga ulo subong tanda sang ila kasubo.

2Ginpain nila ang ila kaugalingon gikan sa tanan nga mga dumoluong. Dayon nagtindog sila kag nagtuad sang ila mga kasal-anan kag sang ila mga katigulangan.

3Sa sulod sang mga tatlo ka oras ginbasa sa ila ang Kasugoan sang Ginoo nga ila Dios, kag sa madason nga tatlo ka oras nagtuad sila sang ila mga sala kag nagsimba sa Ginoo nga ila Dios.

4May plataporma para sa mga Levita, kag sa sini nagtindog didto sanday Jesua, Bani, Kadmiel, Sebanias, Buni, Serebias, Bani, kag Kenani. Nagpangamuyo sila sa mabaskog nga tingog sa Ginoo nga ila Dios.

5Sa ila pagsimba ang masunod nga mga Levita nga amo sanday Jesua, Kadmiel, Bani, Hasabnias, Serebias, Hodias, Sebanias, kag Petahias nagsiling: “Tindog kamo kag dayawon ang Ginoo nga inyo Dios, dayawon sia sa walay katubtoban! Magdayaw ang tagsatagsa sang iya makatilingala nga ngalan, bisan ang tanan nga pagdayaw sang tawo indi tuman.”

6Dayon amo ini ang ginpangamuyo sang mga tawo sang Israel: “Ikaw, Ginoo, amo lamang ang Ginoo, ginhimo mo ang mga langit kag ang mga bituon. Ginhimo mo ang duta kag ang dagat kag ang tanan nga yara sa sini, ginhatagan mo sing kabuhi ang tanan. Ang langitnon nga mga gahom nagaduko kag nagasimba sa imo.

7Ikaw, Ginoong Dios, nagpili kay Abram, kag gintuytoyan mo sia paggwa, gikan sa Ur sang Babilonia, gin-ilisan mo ang iya ngalan kay Abraham.

8Nakita mo nga matutom sia sa imo, kag naghimo ka sing Kasugtanan sa iya. Nagsaad ka nga ihatag mo sa iya ang duta sang mga Canaanhon, ang duta sang mga Hethanon kag mga Amornon, ang duta sang mga Peresnon kag mga Jebusnon, kag mga Gergasnon, nga manginduta sa diin magaestar ang iya mga kaliwat. Gintuman mo ang imo saad tungod kay ikaw matutom.

9“Nakita mo kon daw ano ang pag-antos sang amon mga katigulangan sa Ehipto, ginpamatian mo ang ila pagpangayo sing bulig sa Dagat nga Mapula.

10Naghimo ka sing makatilingala nga mga buhat batok sa hari, batok sa iya mga opisyales kag mga tawo sang iya duta, tungod kay ikaw nakahibalo kon daw ano ang ila pagpigos sang imo mga tawo. Dayon nakaagom ka sing kabantugan nga yara pa sa imo tubtob sini nga adlaw.

11Naghimo ka sing alagyan sa tunga sang dagat para sa imo mga tawo kag ginpaagi mo sila sa mamala nga duta. Ginlumsan mo sa madalom nga tubig ang mga naglagas sa ila, subong sang paglugdang sang bato sa nagaalimbukad nga lawod.

12Paagi sa panganod gintuytoyan mo sila kon adlaw, kag sa kagab-ihon gin-iwagan mo sing kalayo ang ila dalanon.

13Sa Bukid sang Sinai nagpanaog ka gikan sa langit, kag nagpakighambal ka didto sa imo mga tawo kag ginhatagan mo sila sing maayo nga mga kasugoan kag matarong nga mga pagtulon-an.

14Gintudloan mo sila nga pakabalaanon ang imo mga Adlaw nga Inugpahuway, kag paagi sa imo alagad nga si Moises ginhatagan mo sila sang imo mga kasugoan.

15“Sang gingutom sila ginhatagan mo sila sing pagkaon gikan sa langit, kag tubig gikan sa igang sang gin-uhaw sila. Ginsingganan mo sila sa pagpanag-iya sang duta nga imo ginsaad nga ihatag sa ila.

16Pero ang amon mga katigulangan nagbugalon kag nagpatig-a sang ila ulo, kag indi sila magtuman sang imo mga sugo.

17Indi sila magtuman, nalipatan nila ang tanan nga imo ginhimo, nalipatan nila ang mga milagro nga imo ginhimo. Sa ila bugal nagpili sila sing pangulo sa pagdala sa ila pabalik sa pagkaulipon sa Ehipto. Pero ikaw Dios nga nagapatawad, maluloy-on kag mahigugmaon ka, indi madali magpangakig. Daku ang imo kaluoy, wala mo sila pagsikwaya.

18Naghimo sila sing diosdios sa dagway sang toro nga baka, kag nagsiling sila nga ini amo ang Dios nga nagpagwa sa ila sa Ehipto! O Ginoo, daw ano ang pagpasipala nila sa imo!

19Pero wala mo sila ginpatumbayai didto sa desierto, kay daku ang imo kaluoy. Wala mo ginkuha ang panganod ukon kalayo nga nagpakita sa ila sang dalan kon adlaw kag gab-i.

20Sa imo kaayo gintudloan mo sila kon ano ang ila pagahimuon, ginpakaon mo sila sing mana, kag ginhatagan sing tubig nga ilimnon.

21Sa sulod sang kwarenta ka tuig sa desierto ginhatagan mo sila sang tanan nila nga kinahanglanon, ang ila mga bayu wala nagakadunot, kag ang ila mga tiil wala malap-ukan.

22“Ginpaagaw mo sa ila ang mga pungsod kag mga ginharian, ang mga duta sa palibot nila. Gin-agaw nila ang duta sang Hesbon, sa diin si Sihon naggahom, kag ang duta sang Basan, sa diin si Og amo ang hari.

23Ginhatagan mo sila sing mga anak subong kadamo sang mga bituon sa langit, kag ginpaagaw mo sa ila kag ginpaestar sila sa duta nga imo ginsaad nga ihatag sa ila mga katigulangan.

24Gin-agaw nila ang duta sang Canaan, gindaog mo ang mga tawo nga nagaestar didto. Ginhatagan mo ang imo mga tawo sing gahom sa paghimo sang bisan ano nga luyag nila sa mga tawo kag mga hari sang duta sang Canaan.

25Ang imo mga tawo nag-agaw sang napamakuran nga mga siudad, maayo nga mga duta, mga balay nga puno sing manggad, mga bubon nga nakutkot na, mga kahoy nga olivo, mga kahoy nga ang ila bunga ginakaon, kag mga talamnan sang ubas. Nagkaon sila sang tanan nga luyag nila kag nagtambok sila. Naaguman nila ang tanan nga maayo nga mga butang nga ginhatag mo sa ila.

26“Pero ang imo mga tawo nagbato kag wala magtuman sa imo, nagtalikod sila sa imo Kasugoan. Ginpamatay nila ang mga propeta nga nagpaandam sa ila, nga nagsiling sa ila sa pagbalik sa imo. Ginpakahuy-an nila ikaw pirme,

27gani gintugot mo nga maagaw kag magamhan sila sang ila mga kaaway. Sa ila kabudlayan nagpangayo sila sa imo sing bulig, kag ginsabat mo sila gikan sa langit. Sa imo daku nga kaluoy ginpadalhan mo sila sing mga pangulo, nga nagluwas sa ila sa ila mga kaaway.

28Sang magbalik ang kalinong nagpakasala sila liwat, kag liwat gintugotan mo nga daugon sila sang ila mga kaaway. Pero sang maghinulsol sila kag nagpangayo sa imo nga luwason mo sila, nagpamati ikaw gikan sa langit kag sa masunson ginluwas mo sila sa imo daku nga kaluoy.

29Ginpaandaman mo sila sa pagtuman sang imo mga pagtulon-an, pero tungod sang ila bugal ginsikway nila ang imo mga kasugoan, bisan nga ang pagtuman sang imo Kasugoan amo ang paagi sa pagkabuhi. Tungod kay matig-a ang ila mga ulo indi sila magtuman.

30Kada tuig mapinasensyahon ka nga nagpaandam sa ila. Ikaw ang nagpanghikot sa imo mga propeta sa paghambal, pero ang imo mga tawo nagpabungol, gani gintugotan mo sa paggahom sa ila ang iban nga mga pungsod.

31Pero tungod sang kadako sang imo kaluoy, wala mo sila ginpabayai ukon ginlaglag. Maayo ka kag maluloy-on nga Dios!

32“O Dios nga amon Dios, daw ano ang imo pagkadaku! Daw ano ka makahaladlok, kag kagamhanan sa imo! Matutom ka sa pagtuman sang imo mga saad sa kasugtanan. Sugod sang pagpigos sa amon sang mga hari sang Asiria, bisan tubtob karon, daw ano ang pag-antos namon! Ang amon mga hari, ang amon mga pangulo, ang amon mga pari kag mga propeta, ang amon mga katigulangan kag ang tanan namon nga mga tawo nag-antos! Dumdoma kon daw ano ang amon pag-antos!

33Matarong ang ginhimo mo sa pagsilot sa amon, nagmatutom ikaw bisan kami nagpakasala.

34Ang amon mga katigulangan, ang amon mga hari, mga pangulo kag mga pari wala magtuman sang imo Kasugoan. Wala sila magpamati sa imo mga sugo kag mga paandam.

35Sa pahanugot mo gingamhan sang mga hari ang imo mga tawo, sang pag-estar nila sa malapad kag mapatubason nga duta nga imo ginhatag sa ila, pero wala sila magtalikod sa sala kag wala sila mag-alagad sa imo.

36Kag karon mga ulipon kami sa duta nga imo ginhatag sa amon, ining mapatubason nga duta nga nagahatag sa amon sing kalan-on.

37Ang dagaya nga patubas sang duta nagakadto sa mga hari nga ginpagahom mo sa amon tungod kay nagpakasala kami. Nagpagusto lang sila kon ano ang himuon nila sa amon kag sa amon mga kabakahan, kag yari kami sa daku nga kasakitan!”

38Tungod sang tanan nga nagkahanabo, kami nga mga tawo sang Israel, nagahimo sing balaan nga kasugtanan nga nasulat, kag ang amon mga pangulo, ang amon mga Levita, kag ang amon mga pari nagpat-in sang ila mga selyo sa sini.

← Chapter 8 Jump to: Chapter 10 →