Nehemiah 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Sang ikapito nga bulan ang mga tawo sang Israel yara na nagaestar sa ila mga banwa. Sa nahauna nga adlaw sina nga bulan nagtipon sila tanan sa Jerusalem, sa plasa sa atubangan sang Pwerta sang Tubig. Ginpangabay nila si Esdras, ang pari kag manunodlo sang Kasugoan nga ginhatag sang Ginoo sa Israel paagi kay Moises, sa pagkuha sang libro sang Kasugoan.

2Gani ginkuha ini ni Esdras kag gindala sa lugar diin nagatipon ang mga tawo—ang mga lalaki, mga babayi kag ang mga kabataan nga sarang na makahangop.

3Didto sa plasa sa atubangan sang pwerta ginbasa niya sa ila ang Kasugoan halin sa kaagahon tubtob sa udto, kag nagpamati gid sila sing maayo.

4Si Esdras nagtindog sa plataporma nga tapi nga ginhimo para gid sa sini nga tinutuyo. Ang mga tawo nga nagtindog sa tuo niya amo sanday Matitias, Sema, Anaya, Urias, Helkias, kag Maasias. Ang nagatindog sa wala niya amo sanday Pedaya, Mesael, Malquias, Hasum, Hasbadana, Zacarias, kag Mesullam.

5Sang nagatindog si Esdras didto sa ibabaw sang plataporma, ang tanan nga mga tawo nagtulok sa iya. Sang pagbukas niya sang libro ang tanan nagtindog.

6Si Esdras nagsiling, “Dayawon ang Ginoo, ang gamhanan nga Dios!” Ang tanan nga mga tawo nagbayaw sang ila mga kamot kag nagsabat, “Kabay pa, kabay pa!” Dayon naghapa sila sa duta sa pagsimba.

7Dayon ang mga tawo nagtilindog kag ang kasugoan ginsaysay sa ila sang mga Levita nga amo sanday Jesua, Bani, Serebias, Jamin, Akub, Sabetai, Hodias, Maasias, Kelita, Azarias, Jozabad, Hanan, kag Pelaya.

8Ginbadbad kag ginsaysay nila ang Kasugoan sang Dios agod nga mahangpan ini sang mga tawo.

9Sang mabatian sang mga tawo ang ginasiling sang Kasugoan, natandog gid sila, gani naghinibi sila. Si Nehemias nga gobernador, si Esdras nga pari kag manunodlo sang Kasugoan, kag ang mga Levita nga nagasaysay sang Kasugoan nagsiling sa tanan nga mga tawo, “Ini nga adlaw balaan sa Ginoo nga inyo Dios gani indi kamo maglalaw ukon maghibi.

10Karon magpauli kamo kag maghiwat sing punsyon. Hatagi man ninyo sang inyo pagkaon kag bino ang mga tawo nga wala sing pagkaon kag ilimnon. Ini nga adlaw balaan sa Ginoo, gani indi kamo magkasubo. Ang kalipay nga ginahatag sa inyo sang Ginoo magapabakod sa inyo.”

11Ang mga Levita nagpabakod sa mga tawo kag nagsiling sa ila nga indi magkasubo, kay ang adlaw balaan.

12Gani ang tanan nga mga tawo nagpauli kag nagkaon kag nag-inom sing malipayon kag ginhatagan man nila ang iban sang ila pagkaon tungod kay nahangpan nila ang ginbasa sa ila.

13Sang madason nga adlaw ang mga pangulo sang mga kabarangayan, lakip ang mga pari kag mga Levita, nagkadto kay Esdras sa pagtuon sang mga ginatudlo sang Kasugoan.

14Nasapwan nila nga ang Kasugoan nga ginhatag sang Ginoo paagi kay Moises nagasugo sa mga tawo sang Israel sa pag-estar sa mga payagpayag sa tion sang Piesta sang Palasilungan.

15Gani naghatag sila sang masunod nga mga tulomanon kag ginpadala nila ini sa Jerusalem kag sa iban nga mga siudad kag banwa nga nagasiling, “Kadto kamo sa mga kabakuloran kag magkuha sing mga sanga sang pino, olivo, mirto, palma, kag iban nga mga kahoy nga inyo himuon nga mga palasilungan suno sa ginasiling sa Kasugoan.”

16Gani ang mga tawo nagkuha sing mga sanga kag naghimo sing mga palasilungan sa matapan nga mga atop sang ila mga balay, sa ila mga ugsaran, sa pasiyuhan sang Templo, kag sa mga plasa malapit sa Pwerta sang Tubig kag Pwerta sang Efraim.

17Ang tanan nga mga tawo nga nagbalik halin sa pagkabihag naghimo sing mga palasilungan kag ila ini gin-estaran. Amo pa lang ini mahiwat halin sang panahon ni Josue nga anak ni Nun. Ang tanan masinadyahon gid.

18Halin sa pagsugod tubtob sa katapusan sang piesta nagbasa sila sang bahin sang Kasugoan sang Dios kada adlaw. Ginhiwat nila ang piesta sa sulod sang pito ka adlaw, kag sa ikawalo nga adlaw may pagtililipon sa pagtakop suno sa mga pagsulondan sang Kasugoan.

← Chapter 7 Jump to: Chapter 9 →