Nehemiah 13

Ilonggo (Maayong Balita nga Biblia (2012))

← Chapter 12 Jump to:

1Sa sadto nga adlaw ang Kasugoan ni Moises ginbasa sing mabaskog sa atubang sang mga tawo. Karon nakaabot sila sa bahin nga nagasiling nga wala sing Amonhon ukon Moabnon nga tugotan sa pag-impon sa mga tawo sang Dios.

2Tungod ini sang ginhimo sang mga Amonhon kag mga Moabnon nga wala nila paghatagi sing pagkaon kag tubig ang mga Israelinhon sang nagapagwa sila sa Ehipto. Sa baylo nagbayad sila sing kwarta kay Balaam sa pagpakamalaut sang Israel, pero ang aton Dios naghimo sang pagpakamalaut nga manginpagpakamaayo.

3Pagkabati sang mga tawo sang Israel sang pagbasa sini nga kasugoan ginpahalin nila ang tanan nga mga dumoluong gikan sa ila katilingban.

4Ang pari nga si Eliasib nga amo ang gintugyanan sang mga bodega sa Templo, may maayo nga kaangtanan kay Tobias sa malawig nga panahon.

5Gintugotan niya si Tobias sa paggamit sang daku nga kwarto nga kuntani para lang ini nga bulotangan sang mga dulot nga trigo kag insyenso, mga galamiton para sa Templo, ang mga dulot para sa mga pari, kag ang mga ikapulo nga trigo, bino kag lana sang olivo nga ginhatag sa mga Levita, sa mga musikero kag sa mga gwardya sang Templo.

6Sang nagapadayon ini wala ako sa Jerusalem, tungod kay sang ika-32 nga tuig nga si Artajerjes amo ang hari sang Babilonia nagbalik ako didto sa pagsugid sang balita sa iya. Sa tapos ang pila ka adlaw gintugotan naman niya ako

7kag nagbalik ako sa Jerusalem. Nakibot ako sang makita ko nga gintugotan ni Eliasib si Tobias sa paggamit sang isa ka kwarto sa Templo.

8Naakig ako kag ginpanghaboy ko sa gwa ang tanan nga mga pagkabutang ni Tobias.

9Nagmando ako nga ang mga kwarto paninluan, kag iuli ang mga gamit sang Templo, ang mga dulot nga kalan-on, kag ang insyenso.

10Nasapwan ko man nga ang mga Levita kag ang mga musikero sa Templo naghalin sa Jerusalem kag nagbalik sa ila mga uma, tungod kay ang mga tawo wala naghatag sa ila sing nagakaigo para sa ila pangabuhian.

11Ginsaway ko ang mga opisyales tungod kay ila ginpatumbayaan ang Templo. Kag gindala ko pabalik sa Templo ang mga Levita kag ang mga musikero kag ginpaobra ko sila liwat.

12Dayon ang tanan nga mga tawo sang Israel nagdala sa mga bodega sa Templo sang ikapulo sang ila kalan-on, bino kag lana sang olivo.

13Gintugyanan ko sang mga bodega ini nga mga tawo: si Selemias nga pari; si Sadoc nga manunodlo sang Kasugoan, kag si Pedaya nga Levita. Si Hanan nga anak ni Zacur kag apo ni Matanias amo ang ila kabulig. Nahibaluan ko nga masaligan ko ini nga mga tawo sa pagpanagtag sing nagakaigo sang mga galamiton sa ila kapareho nga mga manug-obra.

14Dumdoma, O Dios ko, tanan ini nga mga butang nga akon nahimo para sa imo Templo kag sa panimbahon sini.

15Sa sadto nga tion nakita ko ang mga tawo sang Juda nga nagapuga sing ubas sa Adlaw nga Inugpahuway. Ang iban nagakarga sang trigo, bino, ubas, higos, kag iban pa nga mga butang sa ila mga asno kag gindala nila ini sa Jerusalem. Ginpaandaman ko sila nga indi nila pag-ibaligya ang bisan ano sa Adlaw nga Inugpahuway.

16May mga tawo man gikan sa siudad sang Tiro nga nag-estar sa Jerusalem, kag nagdala sila sing mga isda kag sang tanan nga sahi sang inugbaligya sa siudad agod ila ibaligya sa amon mga tawo sa Adlaw nga Inugpahuway.

17Ginsaway ko ang mga pangulo nga Judio kag ginsingganan ko sila, “Tan-awa ang kalautan nga inyo ginahimo! Wala na ninyo ginapakabalaan ang Adlaw nga Inugpahuway.

18Amo gid ini ang ginhimo sang inyo mga katigulangan nga ginsilutan sila sang Dios, sang ginlaglag niya ini nga siudad. Pero kamo nagadala sing dugang pa nga kaakig sang Dios sa Israel sa inyo pagtampalas sang Adlaw nga Inugpahuway.”

19Gani nagmando ako nga sa pagsugod sang tagsa ka Adlaw nga Inugpahuway, sa kahapunanon, ang mga pwerta sang siudad pagasirahan kag indi ini pagbuksan tubtob matapos ang Adlaw nga Inugpahuway. Ginpabantay ko sa mga pwerta ang iban ko nga mga tawo sa pagsiguro nga wala sing may ginapasulod sa siudad sa Adlaw nga Inugpahuway.

20Daw kaisa ukon kaduha nga ang mga negosyante nga nagabaligya sang tanan nga sahi sang mga pagkabutang naghigda sa gwa sang siudad sa bilog nga gab-i sang Biernes.

21Ginpaandaman ko sila, “Wala sing pulos ang paghulat dira tubtob mag-aga. Kon liwaton pa ninyo ini, makatilaw gid kamo!” Sugod sadto wala na sila magbalik sa Adlaw sang Inugpahuway.

22Ginmanduan ko ang mga Levita sa pagpaninlo sang ila kaugalingon kag sa pagbantay sang mga pwerta sa pagsiguro nga ang Adlaw nga Inugpahuway ginpakabalaan. Dumdoma ako, O Dios, tungod man sini, kag luwasa ako, tungod sang imo daku nga gugma.

23Sadto nga tion nasapwan ko man nga madamo sang mga lalaki nga Judio ang nagpangasawa sang mga babayi gikan sa Asdod, sa Amon, kag sa Moab.

24Ang katunga sang ila mga kabataan naghambal sang linggwahe sang Asdod ukon sang iban pa nga mga linggwahe kag indi makahibalo sa paghambal sang amon linggwahe.

25Ginsaway ko ang mga lalaki kag nagsiling ako nga maayo pa kuntani nga malain ang maabutan nila. Ginhanot ko sila kag gingan-it ang ila mga buhok. Ginpasumpa ko sila sa ngalan sang Dios nga indi na gid sila ukon ang ila mga kabataan magliwat sa pagpangasawa ukon pagpamana sa mga dumoluong.

26Nagsiling ako sa ila, “Ang dumoluong nga mga babayi amo ang nagdala kay Haring Solomon sa pagpakasala. Bisan nga gamhanan pa sia sang sa mga hari sang iban nga mga pungsod, kag bisan nga ang Dios naghigugma sa iya kag naghimo sa iya nga hari sa bug-os nga Israel, nagpakasala sia tungod sining dumoluong nga mga babayi.

27Magasunod bala kita sang inyo malain nga ginhimo kag maglapas sa Dios paagi sa pagpangasawa sang dumoluong nga mga babayi?”

28Ang isa sang mga anak ni Joiada nga anak ni Eliasib nga Pinakamataas nga Pari, umagad ni Sanbalat nga halin sa Bet-horon. Kag gani ginpahalin ko sia sa Jerusalem.

29Dumdoma, O Dios, kon daw ano ang pagdagta sadto nga mga tawo sang palangakuan sang pari kag sang kasugtanan nga imo ginhimo sa mga pari kag mga Levita.

30Gintinluan ko ang mga tawo gikan sa bisan ano nga butang nga dumoluong: naghimo ako sing mga pagsulondan para sa mga pari kag mga Levita agod ang tagsatagsa makahibalo sang iya katungdanan:

31nagsiling ako nga dalhon sa nagakaigo nga tion ang gatong para sa mga dulot nga sinunog kag ang nahauna nga patubas sa Templo. Dumdoma ini tanan, O Dios, kag isipa ini sa akon kaayuhan.

← Chapter 12 Jump to: