Nehemiah 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Sang ulihi madamo sang mga lalaki upod ang ila mga asawa nga nagreklamo batok sa mga Judio nga yara sa palangakuan.

2Ang iban nagsiling, “Madamo kami sa amon panimalay. Nagakinahanglan kami sing kalan-on agod mabuhi.”

3Ang iban man nagsiling, “Ginprenda na namon ang amon mga uma, mga talamnan sang ubas kag mga balay agod may kalan-on kami kag indi paggutoman.”

4Ang iban pa gid nagsiling, “Nagpanghulam na kami sing kwarta sa pagbayad sa hari sang buhis sang amon mga uma kag mga talamnan sang ubas.

5Indi bala nga isa man lang ang aton rasa kag kita tanan palareho nga mga Judio? Indi bala nga ang amon mga kabataan pareho man lang sang ila kabataan? Pero ginpaulipon namon ang amon mga kabataan. Ang iban sang amon kabataan nga babayi ginbaligya na subong mga ulipon. Wala kami sing mahimo tungod kay ang amon mga uma kag mga talamnan sang ubas ginkuha na sa amon.”

6Sang pagkabati ko sang ila mga reklamo naakig gid ako,

7kag nagpamat-od ako sa paghusay sini. Nangakig ako sa mga pangulo kag mga opisyales sang mga tawo kag ginsingganan ko sila, “Ginapigos ninyo ang inyo mga utod!” Ginpatawag ko ang katilingban sa pagtipon kag sa pagpatugsiling sang problema

8kag nagsiling ako, “Suno sa aton masarangan, gingawad naton ang aton mga utod nga Judio nga nagbaligya sang ila kaugalingon sa mga dumoluong. Tungod sang inyo ginahimo ang inyo mga utod mapilitan sa pagbaligya sang ila kaugalingon sa pareho nila nga mga Judio!” Ang mga pangulo naghipos lang kag wala sing may masiling.

9Dayon nagsiling ako, “Indi maayo ang ginahimo ninyo! Dapat kamo magtuman sa Dios kag maghimo sing matarong, kag indi maghatag sa aton mga kaaway nga mga Hentil sing kahigayunan sa pagyaguta sa aton.

10Dugang pa, ako kag ang akon mga kaupod kag mga tawo nga nagaalagad sa akon nagpahulam sa mga tawo sing kwarta kag kalan-on. Karon indi naton sila pagpabayaron sang saka sang ila mga utang.

11Iuli sa ila karon gid nga tion ang ila mga uma, mga talamnan sang ubas ukon mga olivo, kag mga balay. Panasa ang tanan nga saka sang ila mga utang sa inyo—kwarta, ukon kalan-on, ukon bino, ukon lana sang olivo.”

12Ang mga pangulo nagsabat, “Tumanon namon ang ginasiling mo kag iuli namon ang ila pagkabutang kag indi na sila pagsukton sang saka sang ila mga utang.” Ginpatawag ko ang mga pari kag sa atubang nila ginpasumpa ko ang mga pangulo sa pagtuman sang ila saad.

13Dayon ginkuha ko ang akon wagkos kag gintuk-ap kag nagsiling, “Pareho sini ang pagtukap sang Dios sa inyo nga indi magtuman sang inyo saad. Ang Dios magakuha sang inyo mga balay kag sang tanan ninyo nga mga pagkabutang, kag wala gid sing may mabilin sa inyo.” Ang tanan nga yadto didto nagsiling, “Kabay pa!” kag nagdayaw sila sa Ginoo. Kag gintuman sang mga pangulo ang ila mga saad.

14Sa sulod sang dose ka tuig nga gobernador ako sang duta sang Juda, sugod sa ika-20 nga tuig nga si Artajerjes amo ang hari, tubtob sang ika-32 niya nga tuig, wala gid ako ukon ang akon mga pariente makakaon sang kalan-on nga para sa akon subong nga gobernador.

15Ang mga gobernador nga una sa akon nanginpalas-anon sang mga tawo kag nagpangayo sila sing kwarenta ka bilog nga pilak kada adlaw wala labot sang pagkaon kag bino. Bisan ang ila mga ulipon nagpigos sa mga tawo. Pero lain ang akon ginhimo tungod kay nagatahod ako sa Dios.

16Ang tanan ko nga kusog ginbutang ko sa pagkaayo sang pader kag wala ako nagpanag-iya sing mga pagkabutang. Ang tanan nga nagpangabudlay sa akon nagbulig sa pagkaayo sang pader.

17Dugang pa sini nagpakaon ako kada adlaw sing 150 ka mga Judio upod sa ila mga pangulo, wala labot sang mga tawo nga nagkadto sa akon halin sa palibot nga mga pungsod.

18Kada adlaw nagpaihaw ako sing isa ka baka, anom sang pinakamaayo nga mga karnero, kag madamo nga mga manok, kag kada napulo ka adlaw naghatag ako sang madamo kag nanarisari nga bino. Pero wala ako magkuha sang bahin nga ginapatungod sa gobernador, tungod kay ang mga tawo may mabug-at nga palas-anon.

19Nagapangamuyo ako sa imo, O Dios, nga dumdoma para sa akon kaayuhan ang tanan nga ginhimo ko para sa sini nga mga tawo.

← Chapter 4 Jump to: Chapter 6 →