Nehemiah 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Ang nahauna nga nagpirma amo ang Gobernador, nga si Nehemias nga anak ni Hakalias, kag ang madason nga nagpirma amo si Sedequias. Ang mga masunod nagpirma man:

2Ang mga pari: Seraya, Azarias, Jeremias, Pasur, Amarias, Malquias, Hatus, Sebanias, Malluc, Harim, Meremot, Obadias, Daniel, Gineton, Baruc, Mesullam, Abias, Miamin, Maazias, Bilgai kag Semaya.

3Ang mga Levita: Si Jesua nga anak ni Azanias, si Binui sa barangay ni Henadad, Kadmiel, Sebanias, Hodias, Kelita, Pelaya, Hanan, Mica, Rehob, Hasabias, Zacur, Serebias, Sebanias, Hodias, Bani, kag Beninu.

4Ang mga pangulo sang mga tawo: Paros, Pahat-moab, Elam, Zatu, Bani, Buni, Azgad, Bebai, Adonias, Bigvai, Adin, Ater, Ezequias, Azur, Hodias, Hasum, Bezai, Harif, Anatot, Nebai, Magpias, Mesullam, Hezir, Mesezabel, Sadoc, Jadua, Palatias, Hanan, Anaya, Oseas, Hananias, Hasub, Hallohes, Pilha, Sobec, Rehum, Hasabna, Maaseya, Ahias, Hanan, Anan, Malluc, Harim, kag Baana.

5Kami nga mga tawo sang Israel, mga pari, mga Levita, mga gwardya sang Templo, mga musikero sa Templo, mga manug-obra sa Templo, kag iban pa, sa pagtuman sang Kasugoan sang Dios nagpain sang amon kaugalingon gikan sa mga dumoluong nga nagaestar sa amon duta. Kami upod sa amon mga asawa kag tanan nga mga kabataan nga sarang na makahangop,

6nagapakigbuylog sa amon mga pangulo sa pagsumpa, kag silutan kami kon lapason namon ini, nga kami magakabuhi suno sa Kasugoan sang Dios, nga ginhatag sang Dios paagi sa iya alagad nga si Moises, kag pagatumanon namon ang tanan nga pagaisugo sa amon sang Ginoo nga amon Ginoo, kag himuon ang tanan niya nga mga kasugoan kag mga pagsulondan.

7Indi kami magpangasawa ukon magpamana sang mga dumoluong nga nagaestar sa amon duta.

8Kon ang mga dumoluong magdala sing trigo ukon bisan ano nga ibaligya sa amon sa Adlaw nga Inugpahuway, ukon sa bisan ano nga adlaw nga balaan, indi kami magbakal sa ila. Indi namon pag-umahon ang duta sa tagsa ka ikapito nga tuig, kag panason namon ang tanan nga mga utang.

9Sa tagsa ka tuig ang tagsa sa amon mag-amot sing pilak nga isa sang walo ka bahin sang onsa para sa mga kagastohanan sang Templo.

10Magahatag kami para sa panimbahon sa Templo sang masunod: ang balaan nga tinapay, ang halad nga kalan-on adlaw-adlaw, ang mga hayop nga pagasunogon kada adlaw subong mga halad, ang balaan nga mga dulot para sa mga Adlaw nga Inugpahuway, mga Piesta sa Lati, kag iban nga mga piesta, ang iban nga mga dulot nga balaan, ang mga dulot sa pagkuha sang mga sala sang Israel, kag ang bisan ano nga butang nga kinahanglanon sa Templo.

11Kami nga mga tawo, mga pari, kag mga Levita magapagabutgabot kada tuig sa paghibalo kon ano nga mga kabarangayan ang magahatag sing inuggatong sa pagsunog sang mga halad nga ginadulot sa Ginoo nga amon Dios, suno sa mga ginasiling sang Kasugoan.

12Magadala kami sing dulot sa Templo kada tuig sang nahauna nga patubas sang amon trigo kag sang nahauna nga bunga nga luto sang amon mga kahoy.

13Ang tagsa sa amon magadala sa mga pari sa Templo sang amon panganay nga anak nga lalaki sa paghalad sa iya sa Dios suno sa ginasiling sang Kasugoan. Ihalad man namon ang panganay sang amon mga baka, mga karnero kag mga kanding.

14Dalhon namon sa mga pari sa Templo ang linamas gikan sa nahauna nga patubas sang trigo sa tagsa ka tuig, kag ang iban namon nga mga dulot nga bino, lana sang olivo, kag tanan nga sahi sang mga prutas. Dalhon namon sa mga Levita nga nagatipon sang mga ikapulo gikan sa amon kaumhan sa mga barangay, ang ikapulo sang mga tanom nga nagatubo sa amon mga duta.

15Ang mga pari nga kaliwat ni Aaron magaupod sa mga Levita kon magtipon sang ikapulo, kag ang mga Levita magadala sa talaguan sang Templo para gamiton sa Templo sang ikapulo sang tanan nga ikapulo nga ila matipon.

16Ang mga tawo sang Israel kag ang mga Levita magadala sang amot nga trigo, bino kag lana sang olivo sa mga talaguan sa diin ang mga gamit sang Templo ginatago, kag sa diin ang mga pari nga nagaalagad, ang mga gwardya sa Templo, kag ang mga katapo sang mga manugkanta sa Templo nagaestar. Indi namon pagpatumbayaan ang balay sang amon Dios.

← Chapter 9 Jump to: Chapter 11 →