Leviticus 1

Ilonggo (Ang Biblia (1982))

Jump to: Chapter 2 →

1Gintawag sang Ginoo si Moises, kag nagpamolong sa iya gikan sa layanglayang nga tiliponan, nga nagasiling,

2“Ipamolong sa katawohan sang Israel, kag isiling sa ila, ‘Kon ang bisan sin-ong tawo sa inyo nagadolot sing halad sa Ginoo, idolot ninyo ang inyo halad nga kahayupan gikan sa kabakahan ukon gikan sa panong.

3“Kon ang iya halad halad-nga-sinonog gikan sa kabakahan, ihalad niya ang lalaki nga walay kasawayan; sa ganhaan sang layanglayang nga tiliponan idolot niya ini, agud nga mahamut-an sia sa atubangan sang Ginoo;

4ibutang niya ang iya kamut sa olo sang halad-nga-sinonog, kag mabaton ini nga sa iya sa paghimo sing katumbasan tungud sa iya.

5Niyan ihawon niya ang tinday nga baka nga lalaki sa atubangan sang Ginoo; kag ang mga anak nga lalaki ni Aaron nga mga sacerdote magdolot sang dugo, kag magwisik sang dugo palibut sa ibabaw sang halaran nga yara sa ganhaan sang layanglayang nga tiliponan.

6Kag panitan niya ang halad-nga-sinonog kag hiwaon sa iya mga binahin;

7kag ang mga anak ni Aaron nga sacerdote magbutang sing kalayo sa ibabaw sang halaran, kag magbangdaybangday sang gatong sa ibabaw sang kalayo;

8kag ang mga anak ni Aaron nga mga sacerdote magbutang sa pasonod sang mga hiniwa, ang olo, kag ang sapay, sa ibabaw sang gatong nga yara sa ibabaw sang halaran;

9apang hugasan sing tubig ang iya mga kasudlan kag ang iya mga tiil. Kag ang sacerdote magsonog sang bug-os sa ibabaw sang halaran, nga halad-nga-sinonog, halad tungud sa kalayo, nga maamyon sa Ginoo.

10“Kon ang iya halad-nga-sinonog gikan sa panong, gikan sa mga carnero ukon sa mga kanding, idolot niya ang lalaki nga walay kasawayan;

11kag ihawon niya ini sa kilid nga naaminhan sang halaran sa atubangan sang Ginoo, kag ang mga anak ni Aaron nga mga sacerdote magwisik sang iya dugo sa ibabaw sang halaran palibut.

12Kag hiwaon niya ini sa iya mga binahin, pati ang iya olo kag ang iya sapay, kag ang sacerdote magbutang sa ila sing pasonod sa ibabaw sang gatong nga yara sa kalayo sa ibabaw sang halaran;

13apang hugasan sing tubig ang mga kasudlan kag mga tiil. Kag ang sacerdote maghalad sang bug-os, kag magsonog sini sa ibabaw sang halaran; halad-nga-sinonog ini, halad tungud sa kalayo, nga maamyon sa Ginoo.

14“Kon ang iya halad sa Ginoo halad-nga-sinonog nga mga pispis, niyan idolot niya ang iya halad nga mga tukmo ukon kuyabog nga mga salampati.

15Kag ang sacerdote magdala sini sa halaran kag maglubag sa pag-utud sang iya olo, kag sonogon ini sa ibabaw sang halaran; kag pailigon ang iya dugo sa killid sang halaran;

16kag kuhaon niya ang balon-balonan pati ang iya higko, kag ihaboy ini sa luyo sang halaran sa nasidlangan nga kilid, sa duug sang mga abo;

17lutahon niya ini sa iya mga pakpak, apang indi pag-utason. Kag ang sacerdote magsonog sini sa halaran, sa ibabaw sang gatong nga yara sa kalayo; halad-nga-sinonog ini, halad tungud sa kalayo, nga maamyon sa Ginoo.

Jump to: Chapter 2 →