Leviticus 2

Ilonggo (Ang Biblia (1982))

← Chapter 1 Jump to: Chapter 3 →

1“Kon ang bisan sin-o magdolot sa Ginoo sing halad-nga-kalan-on, ang iya halad manginsa harina nga mapino; boboan niya ini sing lana, kag butangan sing incienso,

2kag dalhon niya ini sa mga sacerdote nga mga anak ni Aaron. Kag sia magkuha sa iya sing isa ka hakup sang harina nga mapino kag sang iya lana, pati sang tanan niya nga incienso; kag sonogon ini sang sacerdote nga handumanan sini sa ibabaw sang halaran, halad tungud sa kalayo, nga maamyon sa Ginoo.

3Kag ang nabilin sang halad-nga-kalan-on iya ni Aaron kag sang iya mga anak; butang ini nga labi gid kabalaan sang mga halad tungud sa kalayo sa Ginoo.

4“Kon nagadolot ka sing halad-nga-kalan-on nga nabibingka sa horno, manginwalay tapay ini nga mga kalan-onon sa harina nga mapino nga nasamoan sing lana, ukon manipis nga tinapay nga walay tapay nga nahibo sing lana.

5Kag kon ang imo halad halad-nga-kalan-on gikan sa sartin, manginharina ini nga mapino nga walay tapay, nga nasamoan sing lana;

6tipiktipikon mo ini, kag boboan sing lana sa ibabaw sini; halad-nga-kalan-on ini.

7Kag kon ang imo halad halad-nga-kalan-on gikan sa kalaha, himoon ini sa harina nga mapino nga may lana.

8Kag dalhon mo sa Ginoo ang halad-nga-kalan-on nga nahimo sa sining mga butang; kag ihatag ini sa sacerdote, kag sia magdala sini sa halaran.

9Kag magkuha ang sacerdote sa halad-nga-kalan-on sang handumanan sini kag magsonog sini sa ibabaw sang halaran, halad tungud sa kalayo, nga maamyon sa Ginoo.

10Kag ang nabilin sang halad-nga-kalan-on iya ni Aaron kag sang iya mga anak; butang ini nga labi gid kabalaan sang mga halad tungud sa kalayo sa Ginoo.

11“Ang halad-nga-kalan-on nga ihalad ninyo sa Ginoo indi paghimoon nga may tapay; kay indi kamo magsonog sing bisan ano nga may tapay ukon bisan ano nga dugus subong nga halad tungud sa kalayo sa Ginoo.

12Subong nga halad sang nahauna nga mga bunga ihalad ninyo sila sa Ginoo, apang indi sila pag-ibutang nga sa kaamyon sa halaran.

13Asinan mo ang tagsa ka halad-nga-kalan-on; indi mo pagpakawad-an sang asin sang katipan sang imo Dios ang imo halad-nga-kalan-on; upud sa tanan mo nga halad magdolot ka sing asin.

14“Kon magdolot ka sa Ginoo sang halad-nga-kalan-on sang nahauna nga mga bunga, magdolot ka nga sa halad-nga-kalan-on isang imo nahauna nga mga bunga sang uyas sa uhay nga natigi sa kalayo, ginguma nga uyas sang bag-o nga uhay sang mga nahauna nga bunga.

15Kag butangan mo sia sing lana, kag biliburan sing incienso; halad-nga-kalan-on ini.

16Kag sonogon sang sacerdote ang handumanan sini ang bahin sang ginguma nga uyas niya kag ang bahin sang lana niya pati sang tanan nga incienso niya; ini halad tungud sa kalayo sa Ginoo.

← Chapter 1 Jump to: Chapter 3 →