Leviticus 12

Ilonggo (Ang Biblia (1982))

← Chapter 11 Jump to: Chapter 13 →

1Ang Ginoo nagpamolong kay Moises,

2“Ipamolong sa katawohan sang Israel, Kon ang babayi magpanamkon, kag mag-anak sing lalaki, niyan mangindimatinlo sia sing pito ka adlaw; subong sang mga adlaw sang iya pamulanon, mangindimatinlo sia.

3Kag sa ikawalong adlaw circuncidahon ang bata sa iya napunta nga panit.

4Niyan ang iloy magpadayon sing katloan kag tatlo ka adlaw sa iya pagpaninlo sang dugo; dili sia magtandug sang bisan ano nga butang nga balaan, ukon magkadto sa santuario, tubtub nga matuman ang mga adlaw sang iya pagpaninlo.

5Apang kon mag-anak sia sing babayi, niyan mangindimatinlo sia sa duha ka semana, subong sang iya pamulanon; kag magpadayon sia sing kan-uman kag anum ka adlaw sa iya pagpaninlo sang dugo.

6“Kag kon matuman ang mga adlaw sang iya pagpaninlo, tungud sa anak nga lalaki ukon tungud sa anak nga babayi, magdala sia sa sacerdote sing cordero nga isa ka tuig nga sa halad-nga-sinonog, kag kuyabog nga salampati ukon tukmo nga sa halad-tungud-sa-sala sa ganhaan sang layanglayang nga tiliponan,

7kag ihalad niya ini sa atubangan sang Ginoo, kag maghimo sing katumbasan tungud sa iya; niyan sia manginmatinlo sa paggowa sang iya dugo. Ini amo ang kasogoan nahanungud sa iya nga nagaanak, sing lalaki ukon babayi.

8Kag kon sia indi makasarang sing isa ka cordero, niyan magkuha sia sing duha ka tukmo ukon duha ka kuyabog nga salampati, ang isa sa halad-nga-sinonog, kag ang isa sa halad-tungud-sa-sala; kag ang sacerdote maghimo sing katumbasan tungud sa iya, kag manginmatinlo sia.”

← Chapter 11 Jump to: Chapter 13 →