Leviticus 9

Ilonggo (Ang Biblia (1982))

← Chapter 8 Jump to: Chapter 10 →

1Sa adlaw nga ikawalo gintawag ni Moises si Aaron kag ang iya mga anak kag ang mga tigulang sang Israel;

2kag nagsiling sia kay Aaron, “Kuha ka sing isa ka tinday gikan sa kabakahan nga sa halad-tungud-sa-sala, kag isa ka carnero nga lalaki nga sa halad-nga-sinonog, nga walay kasawayan, kag ihalad sila sa atubangan sang Ginoo.

3Kag isiling sa katawohan sang Israel, ‘Kuha kamo sing kanding nga lalaki nga sa halad-tungud-sa-sala, kag isa ka tinday nga baka kag isa ka cordero, nga tag-isa ka tuig nga walay kasawayan, nga sa halad-nga-sinonog,

4kag isa ka baka nga lalaki kag isa ka carnero nga lalaki nga sa mga halad-sa-paghidait, sa paghalad sa atubangan sang Ginoo, kag halad-nga-kalan-on nga nasamoan sing lana; kay karon nga adlaw ang Ginoo nagapahayag sa inyo.’”

5Kag nagdala sila sa atubangan sang layanglayang nga tiliponan sang ginsogo ni Moises; kag nagpalapit ang bug-os nga katilingban kag nagtindug sa atubangan sang Ginoo.

6Kag si Moises nagsiling, “Amo ini ang butang nga ginsogo sang Ginoo nga himoon ninyo; kag magapahayag sa inyo ang himaya sang Ginoo.”

7Niyan si Moises nagsiling kay Aaron, “Palapit ka sa halaran, kag ihalad ang imo halad-tungud-sa-sala kag ang imo halad-nga-sinonog, kag maghimo sing katumbasan tungud sa imo kaugalingon kag tungud sa katawohan; kag idolot ang halad sang katawohan, kag mahimo sing katumbasan tungud sa ila; sono sa ginsogo sang Ginoo.”

8Gani nagpalapit si Aaron sa halaran, kag nag-ihaw sang tinday nga baka sang halad-tungud-sa-sala, nga sa iya kaugalingon.

9Kag ang mga anak ni Aaron nagdala sa iya sang dugo, kag gintom-oy niya sa dugo ang tudlo niya kag ginpalhit ini sa mga sungay sang halaran, kag ang dugo gin-ula sa tiilan sang halaran;

10apang ginsonog niya sa halaran ang sapay kag ang mga batobato kag ang putus sang atay sang halad-tungud-sa-sala, sono sa ginsogo sang Ginoo kay Moises.

11Ang unud kag ang panit ginsonog niya sa kalayo sa gowa sang dologan.

12Kag gin-ihaw niya ang halad-nga-sinonog; kag ang mga anak ni Aaron nagdala sa iya sang dugo, kag ginwisik niya ini sa ibabaw sang halaran palibut.

13Kag ginhatag nila sa iya ang halad-nga-sinonog, sa hiniwahiwa, kag ang olo; kag ginsonog niya sila sa ibabaw sang halaran.

14Kag ginhugasan niya ang mga kasudlan kag ang mga tiil, kag ginsonog sila sa ibabaw sang halad-nga-sinonog sa ibabaw sang halaran.

15Niyan gindala niya ang halad sang katawohan, kag ginkuha ang kanding nga halad-tungud-sa-sala nga sa katawohan, kag gin-ihaw ini, kag ginhalad ini tungud sa sala, subong sang nahauna.

16Kag gindala niya ang halad-nga-sinonog, kag ginhalad ini sono sa pagsolondan.

17Kag gindala niya ang halad-nga-kalan-on, kag nagkuha sa sini sing isa ka hakop, kag ginsonog ini sa ibabaw sang halaran, luwas sang halad-nga-sinonog sa aga.

18Gin-ihaw man niya ang baka nga lalaki kag ang carnero nga lalaki, ang halad sang mga halad-sa-paghidait nga sa katawohan; kag ang mga anak ni Aaron naghatag sa iya sang dugo, nga ginwisik niya sa ibabaw sang halaran palibut,

19kag ang sapay sang baka nga lalaki kag sang carnero nga lalaki, ang ikog nga matambok, kag ang nagatabon sang mga kasudlan, kag ang mga batobato, kag ang putus sang atay;

20kag ginbutang nila ang sapay sa ibabaw sang mga dughan, kag ginsonog niya ang sapay sa halaran,

21apang ang mga dughan kag ang paa nga too ginhabog ni Aaron nga halad-nga-hinabog sa atubangan sang Ginoo; sono sa ginsogo ni Moises.

22Niyan ginbayaw ni Aaron ang iya mga kamut nayon sa katawohan kag ginpakamaayo sila; kag nagpanaug sia gikan sa paghalad sang halad-tungud-sa-sala kag sang halad-nga-sinonog kag sang mga halad-sa-paghidait.

23Kag si Moises kag si Aaron nagsulud sa layanglayang nga tiliponan; kag sang paggowa nila ginpakamaayo nila ang katawohan, kag nagpahayag ang himaya sang Ginoo sa bug-os nga katawohan.

24Kag gikan sa atubangan sang Ginoo naggowa ang kalayo kag nag-upus sa ibabaw sang halaran sang halad-nga-sinonog kag sang sapay; kag sang nakita ini sang bug-os nga katawohan, nagsinggit sila, kag naghapa.

← Chapter 8 Jump to: Chapter 10 →