Leviticus 22

Ilonggo (Ang Biblia (1982))

← Chapter 21 Jump to: Chapter 23 →

1Kag ang Ginoo nagpamolong kay Moises,

2“Ipamolong kay Aaron kag sa iya mga anak nga mag-amlig sila sa mga butang nga balaan sang katawohan sang Israel, nga ginapakabalaan nila sa akon, kag nga indi nila pagpasipalahan ang akon balaan nga ngalan; Ako amo ang Ginoo.

3Isiling sa ila, ‘Ang bisan sin-o sa bug-os ninyo nga mga kaliwatan nga nagapalapit sa mga butang nga balaan, nga ginapakabalaan sang katawohan sang Israel sa Ginoo, samtang may pagkadimatinlo sa iya, ina nga kalag utdon gikan sa atubangan nakon: Ako amo ang Ginoo.

4Ang bisan sin-o nga tawo nga aroon sa kaliwatan ni Aaron ukon may panggowa dili sia magkaon sang mga butang nga balaan tubtub nga magtinlo sia. Ang bisan sin-o nga magtandug sang bisan ano nga butang nga dimatinlo bangud sa patay ukon tawo nga ginaawasan sang binhi,

5kag ang bisan sin-o nga magtandug sang bisan ano nga nagasaug nga butang nga paagi sini nangindimatinlo sia ukon tawo nga gikan sa iya nalatnan sia sing pagkadimatinlo, bisan ano nga pagkadimatinlo niya—

6ang tawo nga makatandug sang subong mangindimatinlo tubtub sa kahaponon kag dili magkaon sing mga butang nga balaan kon indi makadigos sang iya lawas sa tubig.

7Kon natunud na ang adlaw manginmatinlo sia; kag ugaling makakaon sia sang mga butang nga balaan, bangud nga iya kalan-on ini.

8Dili sia magkaon sang napatay sing kinaugalingon ukon kinusnit sang mga sapat, sa pagdagta sa iya: Ako amo ang Ginoo.’

9Busa bantayan nila ang akon tinulin, basi nga magdala sila sing sala tungud sini kag mapatay sa sini kon pasipalahan nila ini: Ako amo ang Ginoo nga nagapakabalaan sa ila.

10“Wala sing dumuloong nga magkaon sang butang nga balaan. Ang manlulugayaw sang sacerdote ukon ang sinoholan dili magkaon sang butang nga balaan;

11apang kon ang sacerdote magbakal sang bisan sin-o nga ulipon nga mabakal sang iya cuarta, magakaon sia sini; kag ang natawo sa iya balay sila magakaon sang iya kalan-on.

12Kon ang babayi nga anak sang sacerdote mapa-asawa sa dumuloong dili sia magkaon sang halad nga binayaw sang mga butang nga balaan.

13Apang kon ang babayi nga anak sang sacerdote mabalo ukon binayaan, kag wala sing anak, kag nagbalik sa balay sang iya amay, subong sang iya pagkapamatan-on, magakaon sia sang kalan-on sang iya amay; apang walay dumuloong nga magakaon sini.

14Kag kon ang isa ka tawo magkaon sang butang nga balaan sing dihungud, niyan magdugang sia sa sini sang ikalima nga bahin sini, kag ihatag sa sacerdote ang butang nga balaan.

15Ang mga sacerdote dili magpasipala sang mga butang nga balaan sang katawohan sang Israel, nga ginahalad nila sa Ginoo,

16kag sa amo ginpaantus sila sang kalautan nga nagadala sing silot, kon magkaon sila sang ila mga butang nga balaan: kay Ako amo ang Ginoo nga nagapakabalaan sa ila.”

17Kag ang Ginoo nagpamolong kay Moises,

18“Ipamolong kay Aaron kag sa iya mga anak kag sa bug-os nga katawohan sang Israel, Ang bisan sin-o sa panimalay sang Israel ukon sa mga manlulugayaw sa Israel nga nagadolot sang iya halad, bisan ano sang ila mga saad ukon bisan ano sang ila mga halad-nga-kinabubut-on nga ginadolot nila sa Ginoo nga halad-nga-sinonog,

19agud nga mahamut-an kamo magdolot kamo sing lalaki nga walay kasawayan, gikan sa kabakahan ukon sa mga carnero ukon sa mga kanding.

20Ang bisan ano nga may kasawayan ina dili ninyo pag-idolot, kay dili ini manginkalahamut-an nga sa inyo.

21Kag ang bisan sin-o nga nagadolot sing halad ang mga halad-sa-paghidait sa Ginoo, sa pagtuman sing saad ukon halad-nga-kinabubut-on, gikan sa kabakahan ukon gikan sa carnero, manginhimpit ini agud nga mahamut-an; manginwalay kasawayan ini.

22Dili kamo magdolot sa Ginoo sang bulag ukon bali ukon piang ukon hubagon ukon arikison ukon agis-ison, dili kamo maghalad tungud sa kalayo sini sa ila sa ibabaw sang halaran sa Ginoo.

23Madolot mo nga halad-nga-kinabubut-on ang tinday nga baka nga lalaki ukon cordero nga may bahin nga labaw ukon kulang; apang sa halad nga sa saad dili mabaton ini.

24Dili kamo maghalad sa Ginoo sang may itlog nga nahanog ukon napigsa ukon nakusnit ukon nautas, kag dili ninyo paghimoon ang subong sini sa inyo duta;

25kag dili kamo magdolot nga tinapay sang inyo Dios sang bisan ano sini sa ila gikan sa kamut sang dumuloong. Sanglit nga ang ila kalaw-ayan yara sa ila, may kasawayan sa ila, dili sila pagbatonon nga sa inyo.”

26Kag ang Ginoo nagpamolong kay Moises,

27“Kon mabun-ag ang tinday nga baka ukon carnero ukon kanding, magpabilin sia sa iya iloy sing pito ka adlaw; kag kutub sa adlaw nga ikawalo kag pa ibabaw batonon sia nga halad tungud sa kalayo sa Ginoo.

28Kag bisan ini baka ukon oveja, dili ninyo pag-ihawon sing tingub ini kag ang iya tinday sa isa ka adlaw.

29Kag kon maghalad kamo sa pagpasalamat sa Ginoo, ihalad ninyo ini sa bagay nga mabaton kamo.

30Sa amo nga adlaw kaonon ini, dili kamo magbilin sini tubtub sa aga: Ako amo ang Ginoo.

31“Gani bantayan ninyo ang akon mga sogo kag himoon sila: Ako amo ang Ginoo.

32Kag dili ninyo pagpasipalahan ang akon balaan nga ngalan, kondi pakabalaanon ako sa tunga sang katawohan sang Israel; Ako amo ang Ginoo nga nagapakabalaan sa inyo,

33nga nagpagowa sa inyo gikan sa duta sang Egipto nga mangin-inyo Dios: Ako amo ang Ginoo.”

← Chapter 21 Jump to: Chapter 23 →