Leviticus 8

Ilonggo (Ang Biblia (1982))

← Chapter 7 Jump to: Chapter 9 →

1Ang Ginoo nagsiling kay Moises,

2“Kuhaa si Aaron kag ang iya mga anak upud sa iya, kag ang mga panapton, kag ang lana nga ihalaplas, kag ang tinday nga baka nga lalaki nga halad-tungud-sa-sala, kag ang duha ka carnero nga lalaki, kag ang alat nga may mga tinapay nga wala sing tapay;

3kag tipona ang bug-os nga katilingban sa ganhaan sang layanglayang nga tiliponan.”

4Kag ginhimo ni Moises sono sa ginsogo sa iya sang Ginoo; kag nagtipon ang katilingban sa ganhaan sang layanglayang nga tiliponan.

5Kag si Moises nagsiling sa katilingban, “Ini amo ang butang nga ginsogo sang Ginoo nga himoon.”

6Kag gindala ni Moises si Aaron kag ang iya mga anak, kag ginhinawan sila sing tubig.

7Kag ginsuklub niya sa iya ang bayo, kag ginwagkusan sia sang wagkus, kag ginpanaptan sia sang bayo nga malaba, kag gintakud sa iya ang efod, kag ginwagkusan sia sang hinabol nga matahum nga wagkus sang efod, kag ginhigot niya ini sa iya.

8Kag ginbutang niya sa iya ang hapin sa dughan, kag ginbutang niya sa sulud sang hapin sa dughan ang Urim kag ang Tumim.

9Kag gintakbong niya ang turbante sa iya olo, kag ginbutang niya sa ibabaw sang turbante sa atubangan ang pinanid nga bulawan, ang purungpurung nga balaan, sono sa ginsogo sang Ginoo kay Moises.

10Niyan ginkuha ni Moises ang lana nga ihalaplas, kag ginhaplas ang kayangkayang pati ang tanan nga yara sa sini, kag ginpakabalaan sila.

11Kag ginwisikan niya sini ang halaran sing makapito, kag ginhaplas niya ang halaran pati ang tanan niyang gamit, kag ang batiya kag ang iya tulungtungan, sa pagpakabalaan sa ila.

12Kag ginboboan niya sing lana nga ihalaplas ang olo ni Aaron, kag ginhaplas sia, sa pagpakabalaan sa iya.

13Kag gindala ni Moises an mga anak ni Aaron, kag ginsukluban sila sang mga bayo, kag ginwagkusan sila sing mga wagkus, kag ginbugkusan sila sa olo, sono sa ginsogo sang Ginoo kay Moises.

14Niyan gindala niya ang tinday nga baka nga lalaki nga halad-tungud-sa-sala; kag ginbutang ni Aaron kag sang iya mga anak ang ila mga kamut sa olo sang baka nga halad-tungud-sa-sala.

15Kag gin-ihaw niya ini, kag ginkuha ni Moises ang dugo, kag ginpalhit ini sang iya tudlo sa mga sungay sang halaran palibut, kag ginpaputli ang halaran, kag ang dugo gin-ula sa tiilan sang halaran, kag ginpakabalaan ini, sa paghimo sing katumbasan tungud sini.

16Kag ginkuha ni Moises ang tanan nga sapay nga yara sa mga kasudlan, kag ang putus sang atay, kag ang duha ka batobato lakip ang ila sapay, kag ginsonog sila ni Moises sa halaran.

17Apang ang tinday nga baka, kag ang iya panit, kag ang iya unud, kag ang iya ipot, ginsonog niya sa kalayo sa gowa sang dologan, sono sa ginsogo sang Ginoo kay Moises.

18Niyan gindala niya ang carnero nga lalaki sang halad-nga-sinonog; kag ginbutang ni Aaron kag sang iya mga anak ang ila mga kamut sa olo sang carnero.

19Kag gin-ihaw ni Moises ini, kag ginwisik ni Moises ang dugo sa ibabaw sang halaran palibut.

20Kag sang nahiwa niya ang carnero sa mga binahin, ginsonog ni Moises ang olo kag ang mga hiniwa kag ang sapay.

21Kag sang nahugasan niya ang mga kasudlan kag ang mga paa sing tubig, ginsonog ni Moises ang bug-os nga carnero sa ibabaw sang halaran, subong nga halad-nga-sinonog, sa kaamyon, halad tungud sa kalayo sa Ginoo, sono sa ginsogo sang Ginoo kay Moises.

22Niyan gindala niya ang isa pa ka carnero, ang carnero sang paghalad; kag ginbutang ni Aaron kag sang iya mga anak ang ila mga kamut sa olo sang carnero.

23Kag gin-ihaw ni Moises ini, kag nagkuha sia sang dugo sini kag ginpalhit sa labit sang too nga dulunggan ni Aaron kag sa kumalagku sang iya kamut nga too kag sa kumalagku sang iya tiil nga too.

24Kag gindala ni Moises ang mga anak ni Aaron, kag ginbutangan ni Moises sing dugo ang labit sang too nga dulunggan nila kag sa kumalagku sang kamut nila nga too kag sa kumalagku sang tiil nila nga too; kag ginwisik ni Moises ang dugo sa ibabaw sang halaran palibut.

25Niyan ginkuha niya ang sapay, kag ang ikog nga matambok, kag ang tanan nga sapay nga yara sa mga kasudlan, kag ang putus sang atay, kag ang duha ka batobato lakip ang ila sapay, kag ang paa nga too;

26kag gikan sa alat sang tinapay nga walay tapay nga yara sa atubangan sang Ginoo nagkuha sia sing isa ka kihad nga kalan-onon nga walay tapay, kag isa ka kihad nga tinapay nga nalanahan, kag isa ka manipis nga tinapay, kag ginbutang sila sa ibabaw sang sapay kag sang paa nga too;

27kag ginbutang niya ini tanan sa mga kamut ni Aaron kag sa mga kamut sang iya mga anak, kag ginhabog ini sila nga halad-nga-hinabog sa atubangan sang Ginoo.

28Niyan ginkuha ini sila ni Moises sa ila mga kamut, kag ginsonog sila sa halaran sa ibabaw sang halad-nga-sinonog, subong nga dolot sa paghalad, nga sa kaamyon, halad ini tungud sa kalayo sa Ginoo.

29Kag ginkuha ni Moises and dughan, kag ginhabog ini nga halad-nga-hinabog sa atubangan sang Ginoo; ini bahin ni Moises sang carnero nga lalaki sang paghalad, sono sa ginsogo sang Ginoo kay Moises.

30Niyan nagkuha si Moises sang lana nga ihalaplas kag sa dugo nga yara sa ibabaw sang halaran, kag ginwisik ini kay Aaron kag sa iya mga panapton, kag sa iya mga anak kag sa mga panapton sang iya mga anak; gani ginpakabalaan si Aaron kag ang iya mga panapton, kag ang iya mga anak kag ang mga panapton sang iya mga anak upud sa iya.

31Kag si Moises nagsiling kay Aaron kag sa iya mga anak, “Lagaa ang unud sa ganhaan sang layanglayang nga tiliponan, kag didto kaonon ini kag ang tinapay nga yara sa alat sang mga dolot sa paghalad, sono sa ginsogo ko, nga nagasiling, ‘Si Aaron kag ang iya mga anak magkaon sini’;

32kag ang mabilin sang unud kag tinapay sonogon ninyo sa kalayo.

33Kag dili kamo maggowa sing pito ka adlaw sa ganhaan sang layanglayang nga tiliponan, tubtub nga matuman ang mga adlaw sang paghalad sa inyo, kay pito ka adlaw ang paghalad sa inyo.

34Subong sang nahimo sini nga adlaw, amo ang ginsogo sang Ginoo nga himoon sa paghimo sing katumbasan tungud sa inyo.

35Magpabilin kamo sa ganhaan sang layanglayang nga tiliponan sa adlaw kag gab-i sing pito ka adlaw, kag bantayan ang tinulin sang Ginoo, agud nga indi kamo mapatay; kay amo ini ang ginsogo sa akon.”

36Kag ginhimo ni Aaron kag sang iya mga anak ang tanan nga butang nga ginsogo sang Ginoo paagi kay Moises.

← Chapter 7 Jump to: Chapter 9 →