Leviticus 18

Ilonggo (Ang Biblia (1982))

← Chapter 17 Jump to: Chapter 19 →

1Kag ang Ginoo nagpamolong kay Moises,

2“Ipamolong sa katawohan sang Israel, Ako amo ang Ginoo nga inyo Dios.

3Dili kamo maghimo sono sa mga ginahimo sa duta sang Egipto, diin nagpuyo kamo, kag dili kamo maghimo sono sa mga ginahimo sa duta sang Canaan, diin ginadala ko kamo. Dili kamo maglakat sono sa ila mga palatukuran.

4Himoon ninyo ang akon mga pagsolondan kag bantayan ninyo ang akon mga palatukuran sa paglakat sa ila. Ako amo ang Ginoo nga inyo Dios.

5Busa bantayan ninyo ang akon mga palatukuran kag ang akon mga pagsolondan, nga kon himoon sang tawo magakabuhi sia sa ila: Ako amo ang Ginoo.

6“Wala gid sa inyo sing magpalapit sa bisan kay sin-o nga iya himata nga malapit sa pagbukas sang kahubo. Ako amo ang Ginoo.

7Dili mo pagbuksan ang kahubo sang imo amay, bisan ang kahubo sang imo iloy; iloy mo sia, dili mo pagbuksan ang kahubo niya.

8Dili mo pagbuksan ang kahubo sang asawa sang imo amay; kahubo sia sang imo amay.

9Ang kahubo sang imo utud nga babayi, ang babayi nga anak sang imo amay ukon anak nga babayi sang imo iloy, bisan natawo sa balay ukon natawo sa luwas ang kahubo nila dili mo pagbuksan.

10Ang kahubo sang babayi nga anak sang imo anak nga lalaki ukon sang anak nga babayi sang imo anak nga babayi, ang kahubo nila dili mo pagbuksan kay ang ila kahubo imo kaugalingon nga kahubo.

11Ang kahubo sang babayi nga anak sang asawa sang imo amay, nga gin-anak sa imo amay, utud mo sia nga babayi, ang kahubo niya dili mo pagbuksan.

12Dili mo pagbuksan ang kahubo sang babayi nga utud sang imo amay; himata sia nga malapit sang imo amay.

13Dili mo pagbuksan ang kahubo sang utud nga babayi sang imo iloy, kay himata sia nga malapit sang imo iloy.

14Dili mo pagbuksan ang kahubo sang utud nga lalaki sang imo amay, dili ka magpalapit sa asawa niya; dada mo sia.

15Dili mo pagbuksan ang kahubo sang imo umagad nga babayi; asawa sia sang imo anak nga lalaki, dili mo pagbuksan ang kahubo niya.

16Dili mo pagbuksan ang kahubo sang asawa sang imo utud nga lalaki; kahubo sia sang imo utud nga lalaki.

17Dili mo pagbuksan ang kahubo sang babayi kag sang iya anak nga babayi, dili ka magpangasawa sang babayi nga anak sang iya anak nga lalaki ukon sang anak nga babayi sang iya anak nga babayi sa pagbukas sang iya kahubo; mga himata sila nga malapit sa iya; pagkamalaut ini.

18Kag dili ka magpangasawa sa isa ka babayi sa pagpaindis sa iya utud nga babayi, sa pagbukas sang iya kahubo samtang nagakabuhi pa ang iya utud nga babayi.

19“Dili ka magpalapit sa isa ka babayi sa pagbukas sang iya kahubo samtang nga dimatinlo sia sa iya pamulanon.

20Kag dili ka magpakighilawas sa asawa sang imo isigkatawo, sa pagdagta sang imo kaugalingon upud sa iya.

21Dili mo pag-ihatag ang bisan sin-o sang imo kaliwat nga ihalad paagi sa kalayo kay Moloc, kag dili mo pagpasipalahan ang ngalan sang imo Dios; Ako amo ang Ginoo.

22Dili ka maghulid sa lalaki subong sang sa babayi; kangil-aran ini.

23Kag dili ka magpakighilawas sa bisan ano nga sapat sa pagdagta sang imo kaugalingon sa iya, ang bisan sin-o nga babayi dili magpakighilawas sa sapat: sinapat ini.

24“Dili kamo magpadagta sa bisan ano sining mga butang, kay sa sini tanan nadagtaan ang mga pungsud nga ginsobol ko sa atubangan nimo;

25kag ang duta nadagtaan, gani ginsilotan ko ang kalautan niya, kag ginsuka sang duta ang iya mga pumuluyo.

26Apang magbantay kamo sang akon mga palatukuran kag sang akon mga pagsolondan kag dili maghimo sang bisan ano sining mga kangil-aran, bisan ang tumandok ukon ang dumuloong nga nagapanlugayaw sa tunga ninyo

27(kay ini tanan nga kangil-aran nahimo sang mga tawo sang duta, nga una sa inyo, kag nadagtaan ang duta);

28agud nga kamo indi pag-isuka man sang duta, kon dagtaan ninyo ini, subong nga ginsuka niya ang pungsud nga una sa inyo.

29Kay ang bisan sin-o nga maghimo sang bisan ano sining mga kangil-aran, ang mga tawo nga nagahimo sa ila sini utdon gikan sa tunga sang ila katawohan.

30Gani magbantay kamo sang akon tinulin nga dili kamo maghimo sang bisan ano sining mga batasan nga kangil-aran nga ginhimo sing una sa inyo, kag nga dili kamo magpadagta sa ila: Ako amo ang Ginoo nga inyo Dios.”

← Chapter 17 Jump to: Chapter 19 →