Leviticus 10

Ilonggo (Ang Biblia (1982))

← Chapter 9 Jump to: Chapter 11 →

1Karon ang mga anak nga lalaki ni Aaron, si Nadab kag si Abiu, nagkuha ang tagsa sa ila sang iya incensario, kag ginsudlan sing kalayo, kag ginbutangan sing incienso, kag naghalad sa atubangan sang Ginoo sing kalayo nga dibalaan, nga wala niya masogo sa ila.

2Kag may naggowa nga kalayo gikan sa atubangan sang Ginoo kag naglamon sa ila, kag napatay sila sa atubangan sang Ginoo.

3Niyan si Moises nagsiling kay Aaron, “Ini amo ang ginsiling sang Ginoo, ‘Sa mga nagapalapit sa akon pakabalaanon ako sa ila, kag sa atubangan sang bug-os nga katawohan himayaon ako.’” Kag si Aaron naghipus.

4Kag gintawag ni Moises si Misael kag si Elzafan, mga anak nga lalaki ni Uziel nga tiyo ni Aaron, kag nagsiling sa ila, “Palapit kamo, dalha ang inyo mga utud gikan sa atubangan sang santuario pagowa sa dologan.”

5Gani nagpalapit sila, kag gindala sila sa ila mga bayo pagowa sa dologan, subong sang nasiling ni Moises.

6Kag si Moises nagsiling kay Aaron kag kay Eleazar kag kay Itamar, nga iya mga anak nga lalaki, “Dili ninyo pagbunghayon ang inyo buhok, ukon kusniton ang inyo mga panapton, agud nga indi kamo mapatay, kag indi sia magsingkal batok sa bug-os nga katilingban; apang ang inyo mga utud, ang bug-os nga balay sang Israel, maghaya bangud sang pagsonog nga ginpadabdab sang Ginoo.

7Kag dili kamo maggowa sa ganhaan sang layanglayang nga tiliponan, basi kon mapatay kamo; kay ang lana nga ihalaplas sang Ginoo yara sa inyo.” Kag ginhimo nila sono sa polong ni Moises.

8Kag ang Ginoo nagpamolong kay Aaron, nga nagasiling,

9“Dili kamo mag-inum sing alak ukon masingkal nga ilimnon, ikaw ukon ang imo mga anak nga lalaki kaupud nimo, kon kamo magsulud sa layanglayang nga tiliponan, agud nga indi kamo mapatay; palatukuran nga dayon ini sa inyo mga kaliwatan.

10Butangan ninyo sing katuhayan ang balaan kag dibalaan, kag ang dimatinlo kag matinlo;

11kag tudloan ninyo ang katawohan sang Israel sang tanan nga palatukuran nga ginpamolong sa ila sang Ginoo paagi kay Moises.”

12Kag si Moises nagpamolong kay Aaron kag kay Eleazar kag kay Itamar, ang iya mga anak nga lalaki nga nabilin, “Kuhaa ang halad-nga-kalan-on nga nabilin sa mga halad tungud sa kalayo sa Ginoo, kag kaona ini nga walay tapay sa luyo sang halaran, kay ini labi gid kabalaan;

13kaonon ninyo ini sa duug nga balaan, bangud nga ini imo bahin kag bahin sang imo mga anak, gikan sa mga halad tungud sa kalayo sa Ginoo; kay amo ini ang ginsogo sa akon.

14Apang ang dughan-nga-hinabog kag ang paanga-binayaw kaonon ninyo sa duug nga matinlo, ikaw kag ang imo mga anak nga lalaki kag ang imo mga anak nga babayi upud sa imo; kay ginhatag sila nga inyo bahin, kag bahin sang imo mga anak, gikan sa mga halad sang mga halad-sa-paghidait sang katawohan sang Israel.

15Magadala sila sang paa-nga-binayaw kag sang dughan-nga-hinabog pati sang mga halad tungud sa kalayo sang sapay, sa paghabog sining halad-nga-hinabog sa atubangan sang Ginoo, kag ini imo, kag iya sang imo mga anak upud sa imo, subong nga bahin nga dayon; sono sa ginsogo sang Ginoo. ”

16Karon ginpangita sing maid-id ni Moises ang kanding sang halad-tungud-sa-sala, kag yari karon, nabatok ini! Kag si Moises naakig kay Eleazar kag kay Itamar, ang mga anak ni Aaron nga nabilin, nga nagasiling,

17“Ngaa bala nga wala ninyo pagkaona ang halad-tungud-sa-sala sa duug sang santuario, sa ginatan-aw nga ini labi gid kabalaan kag nahatag ini sa inyo sa pagdala sang kalautan sang katilingban, sa paghimo sing katumbasan tungud sa ila sa atubangan sang Ginoo?

18Yari karon, ang dugo sini wala madala sa sulud sang santuario. Sa pagkamatuud ginkaon ninyo kuntani ini sa santuario, sono sa ginsogo ko.”

19Kag si Aaron nagpamolong kay Moises, “Yari karon, sa sining adlaw sila naghalad sang ila halad-tungud-sa-sala kag sang ila halad-nga-sinonog sa atubangan sang Ginoo; kag walay sapayan sa akon nahanabu ang subong sining mga butang! Kon ako nakakaon na sang halad-tungud-sa-sala karon nga adlaw, nanginkalahamut-an bala ayhan ini sa itololok sang Ginoo?”

20Kag sang nabatian ina ni Moises, nagpahamuut ini sa iya.

← Chapter 9 Jump to: Chapter 11 →