Leviticus 7

Ilonggo (Ang Biblia (1982))

← Chapter 6 Jump to: Chapter 8 →

1“Amo ini ang kasogoan sang halad-sa-paglapas. Ini labi gid kabalaan;

2sa duug diin ginaihaw nila ang halad-nga-sinonog ihawon nila ang halad-sa-paglapas, kag ang dugo sini iwisik niya sa ibabaw sang halaran palibut.

3Kag gikan sini ihalad niya ang tanan nga sapay, ang ikog nga matambok, kag ang sapay nga nagaputus sang mga kasudlan,

4ang duha ka batobato kag ang sapay nga yara sa ila nga yara sa mga balikawang, kag ang putus sang atay pati ang mga batobato kuhaon niya;

5sonogon sila sang sacerdote sa ibabaw sang halaran nga halad tungud sa kalayo sa Ginoo; ini halad-sa-paglapas.

6Ang tagsa ka lalaki sa tunga sang mga sacerdote makakaon sini; sa duug nga balaan kaonon ini; ini labi gid kabalaan.

7Subong sang halad-tungud-sa-sala amo man ang halad-sa-paglapas, may isa lamang ka kasogoan sa ila; mangin-iya ini sang sacerdote nga nagahimo sing katumbasan sa iya.

8Kag ang sacerdote nga nagadolot sang halad-nga-sinonog ni bisan sin-o nga tawo ang panit sang halad-nga-sinonog mangin-iya sang sacerdote nga naghalad.

9Kag ang tagsa ka halad-nga-kalan-on nga nabibingka sa horno kag ang tanan nga naaman sa kalaha kag sa sartin mangin-iya sang sacerdote nga nagadolot sini.

10Kag ang tagsa ka halad-nga-kalan-on, nga nasamoan sing lana ukon mamala, mangin-iya sang tanan nga anak ni Aaron, ang isa subong man sa isa.

11“Kag amo ini ang kasogoan sang halad sang mga halad-sa-paghidait nga idolot sang isa sa Ginoo.

12Kon idolot niya ini sa pagpasalamat, niyan magdolot sia upud sa halad sang pagpasalamat sing mga kalan-onon nga walay tapay nga nasamoan sing lana, kag manipis nga mga tinapay nga walay tapay nga nahibo sing lana, kag mga kalan-onon nga nasamoan sing lana nga harina nga mapino nga tinusmog.

13Pati sang mga binilog sang tinapay nga may tapay idolot niya ang iya halad upud ang iya mga halad-sa-paghidait nga sa pagpasalamat.

14Kag gikan sini magdolot sia sing isa gikan sa tagsa ka halad nga sa halad-nga-binayaw sa Ginoo; mangin-iya ini sang sacerdote nga nagawisik sang dugo sang mga halad-sa-paghidait.

15Kag ang unud sang halad sang iya mga halad-sa-paghidait nga sa pagpasalamat kaonon sa adlaw sang iya paghalad; wala sia sing ibilin sini tubtub sa aga.

16Apang kon ang halad sang iya halad isa ka saad ukon kinabubut-on-nga-halad, kaonon ini sa adlaw nga sia nagadolot sang iya halad, kag sa adlaw nga madason kaonon ang nabilin sini,

17apang ang mabilin sang unud sang halad sa adlaw nga ikatlo sonogon sa kalayo.

18Kon ang bisan ano sang unud sang halad sang iya mga halad-sa-paghidait kaonon sa adlaw nga ikatlo, ang halad indi pagbatonon, kag indi ini pag-ipahanungud sa iya nga nagadolot sini; manginkangil-aran ini, kag sia nga nagakaon sini magaantus sang iya kalautan.

19“Ang unud nga nagatandug sang bisan ano nga butang nga dimatinlo indi pagkaonon; sonogon ini sa kalayo. Kag nahanungud sa unud, ang tagsatagsa nga matinlo makakaon sini,

20apang ang tawo nga nagakaon sang unud sang halad sang mga halad-sa-paghidait nga naigo sa Ginoo nga yara sa iya ang iya pagkadimatinlo ina nga tawo utdon gikan sa iya katawohan.

21Kag kon ang bisan sin-o magtandug sang bisan ano nga dimatinlo nga butang, ang pagkadimatinlo sang tawo ukon sapat nga dimatinlo ukon bisan ano nga dimatinlo nga kangil-aran, kag magkaon sang unud sang halad sang mga halad-sa-paghidait nga naigo sa Ginoo, ina nga tawo utdon gikan sa iya katawohan.”

22Ang Ginoo nagpamolong kay Moises,

23“Ipamolong sa katawohan sang Israel, Dili kamo magkaon sing sapay, sang baka, ukon sang carnero, ukon sang kanding.

24Ang sapay sang sapat nga napatay sa iya kaugalingon, kag ang sapay sang kinusnit sang mga sapat, magamit sa bisan ano nga iban nga katuyoan, apang dili kamo nga mas-a magkaon sini.

25Kay ang bisan sin-o nga nagakaon sang sapay sang sapat nga ginadolot sang mga tawo nga halad tungud sa kalayo sa Ginoo utdon gikan sa iya katawohan.

26Labut pa dili kamo magkaon sing bisan ano nga dugo sa tanan ninyo nga puluy-an, bisan iya sang pispis ukon sang sapat.

27Ang bisan sin-o nga nagakaonsang bisan ano nga dugo, ina nga tawo utdon gikan sa iya katawohan.”

28Nagpamolong ang Ginoo kay Moises,

29“Ipamolong sa katawohan sang Israel, Ang nagadolot sa Ginoo sang halad sang iya mga halad-sa-paghidait magdala sa Ginoo sang iya halad; gikan sa halad sang iya mga halad-sa-paghidait

30ang iya kaugalingon nga mga kamut magdala sang mga halad tungud sa kalayo sa Ginoo; dalhon niya ang sapay upud sang dughan, agud nga ang dughan habogon nga halad-nga-hinabog sa atubangan sang Ginoo.

31Sonogon sang sacerdote ang sapay sa halaran, apang ang dughan mangin-ila ni Aaron kag sang iya mga anak.

32Kag ihatag man ninyo sa sacerdote ang too nga paa nga halad-nga-binayaw gikan sa mga halad sang inyo mga halad-sa-paghidait;

33sia nga gikan sa mga anak ni Aaron nga nagadolot sang dugo sang mga halad-sa-paghidait kag sang sapay mangin-iya bahin ang too nga paa.

34Kay ako nagkuha sa katawohan sang Israel gikan sa mga halad sang ila mga halad-sa-paghidait sang dughan-nga-hinabog kag sang paa-nga-binayaw, kag ginhatag sila sa sacerdote nga si Aaron kag sa iya mga anak, subong nga bahin nila sa gihapon gikan sa katawohan sang Israel.

35Ini amo ang bahin-sang-paghaplas kay Aaron kag ang bahin-sang-paghaplas sang iya mga anak gikan sa mga halad tungud sa kalayo sa Ginoo, sang adlaw nga gintugyan niya sila sa pag-alagad sa Ginoo sa pagkasacerdote;

36ang Ginoo nagsogo sini nga ihatag sa ila gikan sa katawohan sang Israel, sang adlaw nga ginhaplas niya sila; ini bahin nila sa gihapon sa bug-os nila nga mga kaliwatan.”

37Amo ini ang kasogoan sang halad-nga-sinonog, sang halad-nga-kalan-on, sang halad-tungud-sa-sala, sang halad-sa-paglapas, sang paghalad, kag sang mga halad-sa-paghidait,

38nga ginsogo sang Ginoo kay Moises sa Bukid nga Sinai, sang adlaw nga nagsogo sia sa katawohan sang Israel sa pagdolot sang ila mga halad sa Ginoo, sa kamingawan sang Sinai.

← Chapter 6 Jump to: Chapter 8 →