Leviticus 14 — Ilonggo (Ang Biblia (1982))

2“Mangin-amo ini ang kasogoan nahanungud sa aroon sa adlaw sang iya pagpaninlo. Dalhon sia sa sacerdote;

3kag ang sacerdote maggowa sa dologan, kag magtan-aw ang sacerdote. Niyan, kon ang balatian nga aro nag-ayo sa aroon,

4ang sacerdote magsogo sa ila sa pagkuha tungud sa iya nga pagatinloan sing duha ka buhi nga pispis nga matinlo kag kahoy nga cedro kag escarlata kag isopo;

5kag ang sacerdote magsogo sa ila sa pag-ihaw sang isa sang mga pispis sa suludlan nga daga sa ibabaw sang tubig nga nagailig.

6Kuhaon niya ang pispis nga buhi lakip ang kahoy nga cedro kag ang escarlata kag ang isopo, kag itusmog sila kag ang pispis nga buhi sa dugo sang pispis nga gin-ihaw sa ibabaw sang tubig nga nagailig;

7kag wisikan niya sing makapito sia nga tinloan gikan sa aro; niyan lawagon sia nga matinlo, kag buhian sa wayang ang pispis nga buhi.

8Kag sia nga pagatinloan magabunak sang iya mga panapton, kag magkiskis sang bug-os niyang bohok, kag magpaligos sa tubig, kag magamatinlo sia; kag sa tapus sina magsulud sia sa dologan, apang magpuyo sa gowa sang iya layanglayang sing pito ka adlaw.

9Kag sa ikapitong adlaw magkiskis sia sang bug-os niyang bohok sa olo; kiskisan niya ang iya bungut kag ang iya mga kilay, ang bug-os niyang bohok. Niyan nagbunak sia sang iya mga panapton, kag magdigos sang iya lawas sa tubig, kag magamatinlo sia.

10“Kag sa ikawalong adlaw magkuha sia sing duha ka cordero nga walay kasawayan, kag isa ka cordera nga isa ka tuig nga walay kasawayan, kag tatlo ka ikapulo nga bahin sang isa ka efa nga harina nga mapino nga nasamoan sing lana, kag isa ka log nga lana nga sa halad-nga-kalan-on.

11Kag ang sacerdote nga nagatinlo sa iya magdala sang tawo nga pagatinloan kag sadtong mga butang sa atubangan sang Ginoo, sa ganhaan sang layanglayang nga tiliponan,

12kag ang sacerdote magkuha sang isa sang mga cordero, kag idolot sia nga halad-sa-paglapas, kag sang isa ka log nga lana, kag habogon sila nga halad-nga-hinabog sa atubangan sang Ginoo;

13kag ihawon niya ang cordero sa duug diin ginaihaw nila ang halad-tungud-sa-sala kag ang halad-nga-sinonog, sa duug sang santuario; kay subong nga iya sang sacerdote ang halad-tungud-sa-sala, subong man ang halad-sa-paglapas; ini labi gid kabalaan.

14Ang sacerdote magkuha sa dugo sang halad-sa-paglapas, kag ipalhit ini sang sacerdote sa labit sang dulunggan nga too sang pagatinloan, kag sa kumalagku sang iya kamut nga too, kag sa kumalagku sang iya tiil nga too.

15Niyan ang sacerdote magakuha sing isa ka log nga lana, kag ibobo ini sa palad sang iya kamut nga wala,

16kag ang sacerdote magtusmog sang iya tudlo nga too sa lana nga yara sa iya kamut nga wala, kag sa iya tudlo magwisik sang lana sing makapito sa atubangan sang Ginoo.

17Kag sa nabilin sang lana nga yara sa iya kamut ang sacerdote magpalhit sa labit sang dulunggan nga too sang pagatinloan, kag sa kumalagku sang iya kamut nga too, kag sa kumalagku sang iya tiil nga too, sa ibabaw sang dugo sang halad-sa-paglapas;

18kag ang nabilin sang lana nga yara sa kamut sang sacerdote ibutang niya sa olo sang pagatinloan. Niyan ang sacerdote maghimo sing katumbasan tungud sa iya sa atubangan sang Ginoo.

19Ang sacerdote magdolot sang halad-tungud-sa-sala, sa paghimo sing katumbasan tungud sa iya nga pagatinloan bangud sang iya pagkadimatinlo. Kag ugaling ihawon niya ang halad-nga-sinonog;

20kag ang sacerdote magdolot sang halad-nga-sinonog kag sang halad-nga-kalan-on sa ibabaw sang halaran. Sa amo ang sacerdote maghimo sing katumbasan tungud sa iya, kag magamatinlo sia.

21“Apang kon imol sia kag indi makasarang sang among kadamuon, niyan magkuha sia sing isa ka cordero nga halad-sa-paglapas nga habogon, sa paghimo sing katumbasan tungud sa iya, kag isa ka ikapulo nga bahin sang efa nga harina nga mapino nga nasamoan sing lana nga sa halad-nga-kalan-on, kag isa ka log nga lana;

22kag duha ka tukmo ukon duha ka kuyabog nga salampati, sono sa sarang niya makuha; ang isa sa halad-tungud-sa-sala kag ang isa sa halad-nga-sinonog.

23Kag sa ikawalong adlaw dalhon niya sila sa sacerdote tungud sa iya pagpaninlo, sa ganhaan sang layanglayang nga tiliponan, sa atubangan sang Ginoo;

24kag ang sacerdote magkuha sang cordero sang halad-sa-paglapas, kag sang isa ka log nga lana, kag habogon sila sang sacerdote nga halad-nga-hinabog sa atubangan sang Ginoo.

25Kag sia mag-ihaw sang cordero sang halad-sa-paglapas; kag magkuha ang sacerdote sa dugo sang halad-sa-paglapas, kag ipalhit ini sa labit sang dulunggan nga too sang pagatinloan, kag sa kumalagku sang iya kamut nga too, kag sa kumalagku sang iya tiil nga too.

26Kag ang sacerdote magbobo sang lana sa palad sang iya kamut nga wala;

27kag ang sacerdote sa tudlo nga too niya magwisik sang iban sang lana nga yara sa iya kamut nga wala sing makapito sa atubangan sang Ginoo;

28kag ang sacerdote magpalhit sang lana nga yara sa iya kamut sa labit sang dulunggan nga too sang pagatinloan, kag sa kumalagku sang iya kamut nga too, kag sa kumalagku sang iya tiil nga too, sa duug sang dugo sang halad-sa-paglapas;

29kag ang nabilin sang lana nga yara sa kamut sang sacerdote iya ibutang sa olo sang pagatinloan, sa paghimo sing katumbasan tungud sa iya sa atubangan sang Ginoo.

30Kag magdolot sia sing isa sang mga tukmo ukon sang mga kuyabog nga salampati sono sa sarang niya makuha,

31ang sono sa iya sarang makuha, ang isa sa halad-tungud-sa-sala kag ang isa sa halad-nga-sinonog, pati ang halad-nga-kalan-on; kag ang sacerdote maghimo sing katumbasan tungud sa pagatinloan sa atubangan sang Ginoo.

32Ini amo ang kasogoan nahanungud sa may balatian nga aro, nga wala sing ikasarang sang mga halad sa iya pagpaninlo.”

33Ang Ginoo nagsiling kay Moises kag kay Aaron,

34“Kon mag-abut kamo sa duta sang Canaan, nga ginahatag ko sa inyo nga kaugalingon, kag ako magbutang sang balatian nga aro sa balay sa duta nga kaugalingon ninyo,

35niyan ang tag-iya sang balay magkadto kag magsugid sa sacerdote, ‘Daw may ginatan-aw ako nga balatian sa balay.’

36Niyan ang sacerdote magsogo nga kuhaan sing unud ang balay sa wala pa ang sacerdote magsulud sa pagtan-aw sang balatian, agud nga ang tanan nga yara sa balay indi mahimo nga dimatinlo; kag sa tapus sini magsulud ang sacerdote sa pagtan-aw sang balay.

37Kag tan-awon niya ang balatian; kag kon ang balatian yara sa mga dingding sang balay nga may luhobluhob nga mga gurayguray nga buluberde ukon mapulapula, kag ang dagway niya madalum pa sa dingding,

38niyan ang sacerdote maggowa sa balay sa ganhaan sang balay, kag takpan ang balay sing pito ka adlaw.

39Kag sa ikapitong adlaw ang sacerdote magbalik, kag magtan-aw; kag kon ang balatian naglapta sa mga dingding sang balay,

40niyan ang sacerdote magsogo nga kuhaon nila ang mga bato nga yara ang balatian kag ihaboy sila sa gowa sang banwa sa duug nga dimatinlo;

41kag pakiskisan niya ang balay sa sulud palibut, kag ila iula ang galagala nga ginkiskis nila sa gowa sang banwa sa duug nga dimatinlo;

42niyan magkuha sila sing iban nga mga bato kag ibutang nila sa baylo sadtong mga bato, kag magkuha sia sing iban nga galagala kag galagalahan ang balay.

43“Kon ang balatian magbalik kag magbuka sa balay sa tapus nakuha niya ang mga bato kag sa tapus nga nakiskisan niya ang balay, kag sa tapus nga nagalagalahan ini,

44niyan ang sacerdote magsulud kag magtan-aw; kag kon ang balatian naglapta sa balay, aro ini nga malala sa balay; dimatinlo ini.

45Kag gub-on niya ang balay, ang iya mga bato kag ang iya mga kahoy kag ang tanan nga galagala sang balay; kag dalhon sila niya sa gowa sang banwa sa duug nga dimatinlo.

46Labut pa ang nagasulud sa balay sa bug-os nga tion nga natakpan ini mangindimatinlo sia tubtub sa kahaponon;

47kag ang nagahigda sa balay magbunak sang iya mga panapton; kag ang nagakaon sa sulud sang balay magbunak sang iya mga panapton.

48“Apang kon magsulud ang sacerdote kag magtan-aw, kag ang balatian wala maglapta sa balay sa tapus nga nagalagalahan ang balay, niyan ang sacerdote maglawag nga ang balay matinlo, bangud nga ang balatian nag-ayo.

49Kag sa pagtinlo sang balay magkuha sia sing duha ka pispis, kag kahoy nga cedro kag escarlata kag isopo,

50kag ihawon niya ang isa sang mga pispis sa suludlan nga daga sa ibabaw sang tubig nga nagailig,

51kag kuhaon niya ang kahoy nga cedro kag ang isopo kag ang escarlata, kag ang pispis nga buhi, kag itusmog sila sa dugo sang gin-ihaw nga pispis kag sa tubig nga nagailig, kag wisikan ang balay sing makapito.

52Sa amo tinloan niya ang balay sang dugo sang pispis, kag sang tubig nga nagailig, kag sang pispis nga buhi, kag sang kahoy nga cedro kag sang isopo kag sang escarlata;

53kag buhian niya ang pispis nga buhi sa gowa sang banwa sa wayang; amo ini ang himoon niya sa katumbasan tungud sa balay, kag magamatinlo ini.”

54Ini amo ang kasogoan nahanungud sa tanan nga dagway sang balatian sang aro: sang kagidkid,

55sang aro sa panapton ukon sa balay,

56kag sa panghabal ukon sa dukut ukon sa lamuti,

57sa pagtudlo kon ini dimatinlo kag kon ini matinlo. Amo ini ang kasogoan nahanungud sa aro.