Leviticus 23

Ilonggo (Ang Biblia (1982))

← Chapter 22 Jump to: Chapter 24 →

1Ang Ginoo nagpamolong kay Moises,

2“Ipamolong sa katawohan sang Israel, Ini amo ang tinangdoan nga mga piesta sang Ginoo nga ibantala ninyo nga mga pagtilipon nga balaan, ini sila akon tinangdoan nga mga piesta.

3Sa anum ka adlaw himoon ang buluhaton; apang sa ikapito nga adlaw isa ka inugpahuway sang maligdong nga pahuway, pagtilipon nga balaan; dili kamo maghimo sing bisan ano nga bagay sang buluhaton; ini inugpahuway sa Ginoo sa tanan ninyong puluy-an.

4“Ini sila amo ang tinangdoan nga mga piesta sang Ginoo, mga pagtilipon nga balaan, nga ibantala ninyo sa ila panag-on nga tinangdo.

5Sa nahauna nga bulan, sa adlaw nga ikapulog apat sang bulan sa kahaponon, amo ang pascua sang Ginoo.

6Kag sa adlaw nga ikapulog lima sang amo nga bulan amo ang piesta sang tinapay nga walay tapay sa Ginoo; sa pito ka adlaw magkaon kamo sang tinapay nga walay tapay.

7Sa nahauna nga adlaw may balaan kamo nga pagtilipon; dili kamo maghimo sing buluhaton nga inalagad.

8Apang magdolot kamo sing mga halad tungud sa kalayo sa Ginoo sa pito ka adlaw; sa ikapito nga adlaw may balaan nga pagtilipon; dili kamo maghimo sing buluhaton nga inalagad.”

9Kag ang Ginoo nagpamolong kay Moises,

10“Ipamolong sa katawohan sang Israel, Kon magsulud kamo sa duta nga ginahatag ko sa inyo kag mag-ani sang alanyon niya, magdala kamo sa sacerdote sang linaylay nga binugkus sang nahaunang mga bunga sang inyo alanyon;

11kag habogon niya ang linaylay nga binugkus sa atubangan sang Ginoo, nga batonon tungud sa inyo; sa madason nga adlaw sang inugpahuway habogon ini sang sacerdote.

12Kag sa adlaw nga habogon ninyo ang linaylay nga binugkus, maghalad kamo sing isa ka tuig nga cordero nga walay kasawayan nga halad-nga-sinonog sa Ginoo.

13Kag ang halad-nga-kalan-on sa sini duha ka ikapulo sang isa ka efa nga harina nga mapino nga nasamoan sing lana, nga halad tungud sa kalayo sa Ginoo, nga sa kaamyon; kag ang iya halad-nga-ilimnon magagikan sa alak, nga ikap-at nga bahin sang isa ka hin.

14Kag dili kamo magkaon sing tinapay ukon uyas nga sinanlag ukon hilaw nga mga uhay tubtub sining adlaw, tubtub nga makadala kamo sing halad sang inyo Dios: ini manginpalatukuran nga dayon sa bug-os ninyong mga kaliwatan sa tanan ninyong puluy-an.

15“Kag mag-isip kamo sa inyo kutub sa adlaw nga madason sa tapus ang inugpahuway, kutub sa adlaw nga nagdala kamo sang linaylay nga binugkus sang halad-nga-hinabog; manginpito ka inugpahuway nga bug-os,

16nga nagaisip kamo sing kalim-an ka adlaw tubtub sa adlaw nga madason sa tapus ang ikapitong inugpahuway; niyan maghalad kamo sing bag-ong halad-nga-kalan-on sa Ginoo.

17Magdala kamo gikan sa inyo mga puluy-an sing duha ka bilog nga tinapay nga sa halad-nga-hinabog, nga duha ka ikapulo nga bahin sang isa ka efa: sila harina nga mapino, bibingkahon sila nga may tapay, subong nga nahaunang mga bunga sa Ginoo.

18Kag upud sang tinapay magdala kamo sing pito ka cordero nga isa ka tuig nga walay kasawayan, kag isa ka tinday nga baka, kag duha ka carnero nga lalaki; sila manginhalad-nga-sinonog sa Ginoo, pati sang ila halad-nga-kalan-on kag sang ila mga halad-nga-ilimnon, halad tungud sa kalayo, nga maamyon sa Ginoo.

19Kag magdolot kamo sing isa ka kanding nga lalaki nga halad-tungud-sa-sala, kag duha ka cordero nga isa ka tuig subong nga dolot sang mga halad-sa-paghidait.

20Kag ang sacerdote maghabog sa ila pati ang tinapay sang nahaunang mga bunga nga halad-nga-hinabog sa atubangan sang Ginoo, pati ang duha ka cordero; balaan sila sa Ginoo nga sa sacerdote.

21Kag magbantala kamo sa among adlaw; may balaan kamo nga pagtilipon; dili kamo maghimo sing buluhaton nga inalagad: palatukuran ini nga dayon sa tanan ninyong puluy-an sa bug-os ninyong mga kaliwatan.

22“Kag kon mag-ani kamo sang mga alanyon sang inyo duta, dili mo pag-orotan ani ang mga pamusud sang imo latagon, kag dili mo pagtiponon ang salaghawon sang imo alanyon; ibilin mo sila sa imol kag sa manlulugayaw: Ako amo ang Ginoo nga inyo Dios.”

23Kag ang Ginoo nagsiling kay Moises,

24“Ipamolong sa katawohan sang Israel, Sa bulan nga ikapito, sa nahaunang adlaw sang bulan, may maligdong nga pahuway sa inyo, handumanan sang pagpatonog sang mga budyong, pagtilipon nga balaan.

25Dili kamo maghimo sing buluhaton nga inalagad; kag magdolot kamo sang mga halad tungud sa kalayo sa Ginoo.”

26Kag ang Ginoo nagsiling kay Moises,

27“Sa adlaw nga ikapulo sining ikapitong bulan amo ang adlaw sang katumbasan; ini balaan nga pagtilipon sa inyo, kag pit-an ninyo ang inyo mga kalag kag magdolot kamo sing halad tungud sa kalayo sa Ginoo.

28Kag dili kamo maghimo sing bisan anong bagay sang buluhaton sa sina gid nga adlaw; kay adlaw ini sang katumbasan, sa paghimo sing katumbasan tungud sa inyo sa atubangan sang Ginoo nga inyo Dios.

29Kay ang bisan sin-o nga indi mapit-an sa sinang adlaw utdon ko sia gikan sa iya katawohan.

30Kag ang bisan sin-o nga maghimo sang bisan anong bagay sang buluhaton sa sinang adlaw, laglagon ko sia gikan sa tunga sang iya katawohan.

31Dili kamo maghimo sing bisan anong bagay sang buluhaton: ini palatukuran nga dayon sa bug-os ninyong mga kaliwatan sa tanan ninyong puluy-an.

32Ini inugpahuway sa inyo sang maligdong nga pahuway, kag pit-an ninyo ang inyo mga kalag; sa ikasiam nga adlaw sang bulan sa kahaponon, kutub sa kahaponon tubtub sa kahaponon bantayan ninyo ang inyo inugpahuway.”

33Kag ang Ginoo nagsiling kay Moises,

34“Isiling sa katawohan sang Israel, Sa adlaw nga ikapulog lima sining ikapitong bulan amo ang piesta sang mga payagpayag sa Ginoo sa pito ka adlaw.

35Sa nahaunang adlaw may balaan nga pagtilipon; dili kamo maghimo sing buluhaton nga inalagad.

36Sa pito ka adlaw magdolot kamo sing halad tungud sa kalayo sa Ginoo; sa ikawalong adlaw may pagtilipon kamo nga balaan kag magdolot kamo sing halad tungud sa kalayo sa Ginoo; ini pagtilipon nga maligdong; dili kamo maghimo sing buluhaton nga inalagad.

37“Ini sila amo ang tinangdoan nga mga piesta sang Ginoo, nga ibantala ninyo nga balaan nga mga pagtilipon, sa pagdolot sa Ginoo sang halad tungud sa kalayo, halad-nga-sinonog kag halad-nga-kalan-on, mga halad, kag mga halad-nga-ilimnon, ang tagsa sa iya kaugalingon nga adlaw;

38walay labut sang mga inugpahuway sang Ginoo, kag walay labut sang tanan ninyong dolot, kag walay labut sang tanan ninyong saad, kag walay labut sang tanan ninyong halad-nga-kinabubut-on, nga ginahatag ninyo sa Ginoo.

39“Sa adlaw nga ikapulog lima sang bulan nga ikapito, kon matipon na ninyo ang mga bunga sang duta, hiwaton ninyo sa Ginoo ang piesta sa pito ka adlaw; sa nahaunang adlaw may maligdong nga pahuway, kag sa adlaw nga ikawalo may maligdong nga pahuway.

40Kag magkuha kamo nga sa inyo sa adlaw nga nahauna sang bunga sang mga kahoy nga maayo, mga paklang, kag mga sanga sang mga kahoy nga madabung, kag sang mga sauce sang sapa; kag magkalipay kamo sa atubangan sang Ginoo nga inyo Dios sing pito ka adlaw.

41Hiwaton ninyo ining piesta sa Ginoo sing pito ka adlaw sa tagsa ka tuig; ini palatukuran nga dayon sa bug-os ninyong mga kaliwatan; sa bulan nga ikapito hiwaton ninyo ini.

42Sa pito ka adlaw magpuyo kamo sa mga payagpayag; ang tanan nga tumandok sa Israel magpuyo sa mga payagpayag,

43agud nga ang inyo mga kaliwatan makahibalo nga ginpapuyo ko sa mga payagpayag ang katawohan sang Israel sang ginpagowa ko sila gikan sa duta sang Egipto: Ako amo ang Ginoo nga inyo Dios.”

44Sa amo ginpahayag ni Moises sa katawohan sang Israel ang tinangdoan nga mga piesta sang Ginoo.

← Chapter 22 Jump to: Chapter 24 →