Leviticus 21

Ilonggo (Ang Biblia (1982))

← Chapter 20 Jump to: Chapter 22 →

1Kag ang Ginoo nagpamolong kay Moises, “Ipamolong sa mga sacerdote, ang mga anak ni Aaron, kag isiling sa ila nga walay bisan sin-o sa iya kaugalingon magpadagta tungud sa patay sa iya katawohan,

2luwas sa iya himata nga malapit sa iya, sa iya iloy, sa iya amay, sa iya anak nga lalaki, sa iya anak nga babayi, sa iya utud nga lalaki,

3ukon sa iya utud nga babayi nga ulay (nga malapit sa iya nga walay bana; sarang sia madagtaan tungud sa iya).

4Subong nga bana dili sia magpadagta sa iya kaugalingon sa iya katawohan kag sa amo magpasipala sang iya kaugalingon.

5Ang mga sacerdote dili magpakiskis sa ila olo, ukon magpakiskis sang mga kilid sang ila bungut, ukon magpilas sang ila unud.

6Magpakabalaan sila sa ila Dios, kag dili pagpasipalahan ang ngalan sang ila Dios; kay nagahalad sila sa Ginoo sang mga halad tungud sa kalayo, ang tinapay sang ila Dios; busa magpakabalaan sila.

7Dili sila magpangasawa sang makihilawason ukon dinagtaan; kag dili magpangasawa sang binulagan sang iya bana; kay ang sacerdote balaan sa iya Dios.

8Pakabalaanon mo sia, kay sia nagadolot sang tinapay sang imo Dios; manginbalaan sia sa imo; kay ako ang Ginoo, nga nagapakabalaan sa inyo, balaan.

9Kag ang babaying anak sang isa ka sacerdote, kon magpasipala sia sang iya kaugalingon sa pagkamahilawason, ginapasipalahan niya ang iya amay; sonogon sia sa kalayo.

10“Ang pinakamataas nga sacerdote sa tunga sang iya mga utud, nga sa iya olo ginbobo ang lana nga ihalaplas, kag ginhalad sa pagsuklub sang mga panapton nga balaan, dili magbunghay sang bohok sang iya olo, ukon magkusnit sang iya mga panapton;

11dili sia magpalapit sa bisan anong bangkay, ukon magpadagta sia tungud sa iya amay ukon tungud sa iya iloy;

12dili sia maggowa sa santuario, ukon magpasipala sang santuario sang iya Dios; kay ang paghalad sang lana nga ihalaplas sang iya Dios yara sa ibabaw niya: Ako amo ang Ginoo.

13Kag magpangasawa sia sing babaying ulay.

14Ang balo, ukon binulagan, ukon dinagtaan nga babayi, ukon makihilawason, ini sila dili niya pagpangasawon; apang sa isa ka ulay sa iya katawohan makapangasawa sia,

15nga dili niya pagpasipalahan ang iya mga anak sa tunga sang iya katawohan; kay Ako amo ang Ginoo nga nagapakabalaan sa iya.”

16Kag ang Ginoo nagpamolong kay Moises,

17“Ipamolong kay Aaron, Ang bisan sin-o sang imo mga kaliwatan sa bug-os nila nga mga kaliwatan nga may kasawayan dili sia pagpapalapita sa pagdolot sang tinapay sang iya Dios.

18Kay ang bisan sin-o nga lalaki nga may kasawayan dili sia magpalapit, ang tawo nga bulag ukon piang, ukon may ilong nga bungad ukon may bahin nga labaw,

19ukon ang lalaki nga may tiil nga bali ukon kamut nga bali,

20ukon buktot, ukon inano, ukon may samad sa mata ukon arikison ukon agis-ison ukon napus-an;

21wala sing lalaki sa mga kaliwatan ni Aaron nga sacerdote nga may kasawayan nga magpalapit sa pagdolot sang mga halad tungud sa kalayo sa Ginoo; sanglit may kasawayan sia, dili sia magpalapit sa pagdolot sang tinapay sang iya Dios.

22Magkaon sia sang kalan-on sang iya Dios, sang mga labi gid kabalaan kag sang balaan,

23apang dili sia magkadto sa sulud sang kumbung ukon magpalapit sa halaran, bangud nga may kasawayan sia, agud nga indi niya mapasipalahan ang akon mga santuario; kay Ako amo ang Ginoo nga nagapakabalaan sa ila.”

24Gani si Moises nagpamolong kay Aaron kag sa iya mga anak kag sa bug-os nga katawohan sang Israel.

← Chapter 20 Jump to: Chapter 22 →