Leviticus 3

Ilonggo (Ang Biblia (1982))

← Chapter 2 Jump to: Chapter 4 →

1“Kon ang iya dolot halad sang mga halad-sa-paghidait, kon maghalad sia gikan sa kabakahan, bisan lalaki ukon babayi, ihalad niya ini nga walay kasawayan sa atubangan sang Ginoo.

2Kag ibutang niya ang iya kamut sa olo sang iya halad kag ihawon ini sa ganhaan sang layanglayang nga tiliponan; kag ang mga anak ni Aaron nga mga sacerdote magwisik sang dugo sa ibabaw sang halaran palibut.

3Kag idolot niya ang halad sang mga halad-sa-paghidait, nga halad tungud sa kalayo sa Ginoo, ang sapay nga nagaputus sang mga kasudlan kag ang tanan nga sapay nga yara sa mga kasudlan,

4kag ang duha ka batobato kag ang sapay nga yara sa ila nga yara sa mga balikawang, kag ang putus sa atay pati ang mga batobato kuhaon niya.

5Niyan sonogon ini sang mga anak ni Aaron sa halaran sa ibabaw sang halad-nga-sinonog, nga yara sa ibabaw sang gatong sa kalayo; halad tungud sa kalayo ini, nga maamyon sa Ginoo.

6“Kon ang iya dolot nga sa halad sang mga halad-sa-paghidait sa Ginoo gikan sa panong, lalaki ukon babayi, ihalad niya ini nga walay kasawayan.

7Kon magdolot isa sing isa ka cordero nga halad niya, niyan idolot niya ini sa atubangan sang Ginoo,

8ibutang niya ang iya kamut sa olo sang iya halad kag ihawon siya sa atubangan sang layanglayang nga tiliponan; kag iwisik sang mga anak ni Aaron ang dugo niya sa ibabaw sang halaran palibut.

9Niyan idolot niya gikan sa halad sang mga halad-sa-paghidait ang halad tungud sa kalayo sa Ginoo ang sapay niya, ang bug-os nga matambok nga ikog, iya kuhaon sing suup sa tuluktukon, kag ang sapay nga nagaputus sang mga kasudlan, kag ang tanan nga sapay nga yara sa mga kasudlan,

10kag ang duha ka batobato kag ang sapay nga yara sa ila nga yara sa mga balikawang, kag ang patus sa atay pati ang mga batobato kuhaon niya.

11Kag sonogon ini sila sang sacerdote sa ibabaw sang halaran subong nga kalan-on gikan sa halad tungud sa kalayo sa Ginoo.

12“Kon ang iya halad kanding, niyan ihalad niya ini sa atubangan sang Ginoo,

13kag ibutang niya ang iya kamut sa olo sini, kag ihawon ini sa atubangan sang layanglayang nga tiliponan; kag iwisik sang mga anak ni Aaron ang dugo sa ibabaw sang halaran palibut.

14Niyan idolot niya gikan sini ang iya halad, nga halad tungud sa kalayo sa Ginoo, ang sapay nga nagaputus sang mga kasudlan, kag ang bug-os nga sapay nga yara sa mga kasudlan,

15kag ang duha ka batobato kag ang sapay nga yara sa ila nga yara sa mga balikawang, kag ang putus sa atay pati ang mga batobato kuhaon niya.

16Kag sonogon sila sang sacerdote sa halaran subong nga kalan-on gikan sa halad tungud sa kalayo nga maamyon. Ang bug-os nga sapay iya sang Ginoo.

17Manginpalatukuran sa gihapon ini sa bug-os ninyo nga mga kaliwatan, sa tanan ninyo nga puluy-an, nga indi kamo magkaon sing sapay ukon dugo.”

← Chapter 2 Jump to: Chapter 4 →