Romans 12

ibibio

← Chapter 11 Jump to: Chapter 13 →

1Ke ntodo, ami mmikpeiye ndufo, nditọete, ke ntak mfọn Abasi, nte yak enịm idem ndufo nte aduuwem uwa, asanake anyʌñ anem Abasi esịd-ami ado akpan-akpan ye eti usʌñ adikpono Abasi.

2Ikiinañña ñkpọ aba ikeene naña ederimbod enam, ado ikpəhọ akikere mme esịd ndufo ke edidu ufa uwem. Ndin ndufo eyaekan edomo enyʌñ enyịmme se ido mfọnñkan uduak Abasi eti ido, afọnnọ, anyʌñ anem Abasi esịd.

3Sia ato ke mfọn e-nnọọhọ miin, ami mbo ndufo keed-e-keed: kuukịt idem mfo akpon akan naña akpena akịd, ado kap nie eti iwuod mme mfara ke idem mfo nọ asaña akekem ke udomo mbuọdidem a-Abasi inọọhọ ndufo keed-e-keed.

4Kpa naña ñnyịn keed-e-keed inie abʌkidem keed ye mme uwak ndido, ndin, mme ndido ami inieeghe ukem ubọkutom,

5ntodo ñko ke Krais akpasʌkado ñnyịn i-iwakka, ido abʌkidem keed, ndin afịd ñnyịn idoñño ndido inọ keed-e-akan.

6Ñnyịn inie nsio-nsio enọ, a-asañake ke mfọn a-Abasi inọọhọ ñnyịn keed-e-keed. Adieke enọ mfo adooho ukịd ñkukịd, ndin kịd nkukịd nọ asaña akekem ke mme mbuọdidem mfọ.

7Adieke adooho adinam ñkpọ nnọ awo, yak anye anam ñkpọ; adieke adooho adikpeeb ñkpọ, ndin kpeep;

8adieke adooho adinọ item, nọ item; adieke adooho adinọ mbon unanna ñkpọ, tat ubọk nọ, adieke adooho adidat usʌñ, dat usʌñ; adieke adooho adiwọt mbọm, nam ado ke inemesịd.

9Ima ana ado ke akpanikọ. Isua se ido idiọọk; isọọñọ iyiire ke se ifọn.

10Inam ñkpọ inọ keed aken ke ima nditọete. Ikpono keed aken ikan idem ndufo.

11Ikiinana akpọsọñ udọñ, ado inie ekamba ufiop udọñ ke Sịbidịd, ke adinam ñkpọ nnọ Abọọñ.

12Ndufo idara ke idodanyen, inie ime ke ini afanikọñ, inyʌñ ibọñ akam afịd ini.

13Wana inie mfo ye mme ikọd Abasi e-ebaaha ke unana. Ka iso adinam etiido.

14Idiọñ mbon i-kọbbọke ndufo, diọñ ado kuusuuñọ ammọ.

15Idara ye mbon se idara, itua ye mbon e-etuaahake.

16Idʌñ ke emem mme keed aken, ikiiwʌt idem, ado inyịmme idiwana mme mbon awo ke usuuk itie. Ikiikokko idem ndufo.

17Ikiidat idiọọk isio awo ndomokeed usieene idiọọk ñkpọ. Ikpeme adinam se ifọn ke anyen afịd awo.

18Daña ndufo akpekakan, iyem usʌñ idʌñ ke emem mme afịd awo.

19Ikiisio awo usieene, mme ndima ufan mmi, ado iyak ufañ inọ ifiopesịd Abasi, sia emaewet: “Usieene annie miin; Ami ñyaasio usieene,” Abọọñ abo.

20Utu ke ndo, ñwed Abasi abo ate: “Adieke abiọñ adọññọ awo usua mfo, nọ anye ndidia, adieke itọñ asatta anye, nọ anye ñkpọ ñwọñ. Ke adinam ntom, afo ayaabək ufiop ikañ ke iwuod amọ.”

21Ikiiyak idiọọkñkpọ ikan ndufo ubọk, ado idat nti ñkpọ ikan idiọọk ñkpọ.

← Chapter 11 Jump to: Chapter 13 →