1 Chronicles 13

Ilokano (Ti Biblia (1973))

← Chapter 12 Jump to: Chapter 14 →

1Ket ni David nakiuman cadagiti capcapitan dagiti rinibu ken dagiti ginasut, iti tunggal mangidalan met laeng.

2Ket ni David kinunana iti amin a gimong ti Israel, No maipagarup a naimbag cadacayo, ken naggapu ken ni Jehova a Diostayo, mangibaontayo comai ti tunggal disso cadagiti cacabsattayo a nabati iti amin a daga ti Israel, a caduada dagiti papadi ken Levitas cadagiti il-ilida nga addaan cabangibang a tumiponda coma cadatayo;

3Ket yegtayo manen coma cadatayo ti lacasa ti Diostayo: ta isu ti ditay sinapul cadagidi al-aldaw ni Saul.

4Ket amin a gimong kinunana nga aramidenna ti casta; ta ti banag nalinteg iti imatang ti amin nga umili.

5Iti casta ni David ginimongna amin nga Israel, manipud Sihor nga waig ti Egipto agingga met laeng iti wangawangan ti Hamat, tapno yegda ti lacasa ti Dios manipul Kiriat-jearim.

6Ket simmang-at ni David ken amin nga Israel agingga iti Baala, nga isu iti Kiriat-jearim, a biang ti Juda, tapno yegda manipud idiay ti lacasa ni Dios Jehova a sisasaad iti ngato dagiti querubin, a nanaganan a gapu iti Nagan.

7Ket impanda ti lacasa ti Dios iti rabaw ti maysa a baro a carison, ket isu ti inyegda manipud iti balay ni Abinadab: ket ni Uzza ken ni Ahio pinaguyodda di carison.

8Ket ni David ken amin nga Israel nagragsacda iti sango ti Dios iti amin a cabaelanda, cadagiti met laeng cancanta, ken ar-arpa, ken salsalterio, ken panpandereta, ken piangpiangpiang, ken tangtangguyob.

9Ket idi a dimtengda iti pagtaltagan ni Kidon inyunnat ni Uzza ti imana nga iniggamanna di lacasa; ta dagiti vacvaca nagtibcolda.

10Ket ti pungtot ni Jehova simged a maibusor ken Uzza, ket isu ti kinabilna, agsipud ta inyunnatna di imana iti lacasa; ket natay idiay iti sango ti Dios.

11Ket ni David napaladingit, agsipud ta ni Jehova binuracna ni Uzza: ket ninaganna daydiay a disso iti Perez-uzza, inggana iti daytoy nga aldaw.

12Ket ni David nagbuteng iti Dios iti daydi nga aldaw, a kinunana, Casano ti panangisangpetco idiay pagnaedac iti lacasa ti Dios?

13Iti casta ni David saanna nga inyallatiw kencuana ti lacasa ni Jehova iti ili ni David, ngem isu ti impanna iti balay ni Obed-edom a Geteo.

14Ket ti lacasa ti Dios nakipagnaed iti familia ni Obed-edom idiay balayna bayat iti tallo a bulan: ket ni Jehova binendicionanna ti balay ni Obed-edom, ken iti isu-amin nga icutanna idi.

← Chapter 12 Jump to: Chapter 14 →