1 Chronicles 19

Ilokano (Ti Biblia (1973))

← Chapter 18 Jump to: Chapter 20 →

1Ket naaramid iti calpasan daytoy, a ni Naas nga ari dagiti annac ti Ammon natay, ket ti anacna nagari iti saadna.

2Ket ni David kinunana, Iparangconto ti caasi ken Hanan nga anac a lalaki ni Naas, agsipud ta di amana imparangna caniac ti caasi. Iti casta ni David nangibaon cadagiti babaonen a mangliwliwa kencuana a maipanggep ken ni amana. Ket dagiti ad-adipen ni David dimtengda ken Hanan iti daga dagiti annac ti Ammon, tapno isu ti liwliwaenda.

3Ngem dagiti pangoloen dagiti annac ti Ammon kinunada ken Hanan, Pagarupem aya a ni David padayawanna ni amam, iti panangibaonna cadagiti mangliwliwa kenca? saan aya nga umay kenca dagiti ad-adipenna a mangsukimat, ken mangrebba, ken mangsiim iti daga?

4Iti casta ni Hanan innalana dagiti ad-adipen ni David, ket kiniskisanna ida, ket pinutedna dagiti cawesda a ginudua, agingga iti padingpadingda met laeng, ket pinagawidna ida.

5Iti casta napan dagiti dadduma a tattao, ket imbagada ken David no casano ti pannacaservi idi dagiti lallaki. Ket isu nagbaon ti nangsabet cadacuada; agsipud ta dagiti lallaki naibabainda iti casta unay. Ket ti ari kinunana, Agtactaccayo idiay Jerico agingga iti tumubo dagiti imingyo, ket calpasanna sumangpetcayo.

6Ket idi a dagiti annac ti Ammon nakitada nga isuda nagbalinda a macarurod ken David, ni Hanan ken dagiti annac ti Ammon nagpaibaonda iti sangaribu a talento a pirac panangdanda cadagidiay luglugan ken lallaki a nagcacabayo nga aggapu iti Mesopotamia, ken aggapu iti Aram-maaca, ken aggapu iti Soba.

7Iti casta nanangdanda cadagidiay iti tallopulo ket dua a ribu a luglugan, ken ti ari ti Maaca ken dagiti tattaona, isuda nga immay ket nagpacarsoda iti sango ti Medeba. Ket dagiti annac ti Ammon naguornongda a naggapu cadagiti il-ilida, ket immayda iti gubat.

8Ket idi a nangngegna ni David imbaonna ni Joab, ken amin a buyot dagiti mamaingel a lallaki.

9Ket dagiti annac ti Ammon rimmuarda, ket inornosda ti gubat iti ruangan ti ili: ket dagiti ar-ari nga immay addada idi a sangsangcatipon idiay away.

10Apaman a ni Joab nakitana a ti gubat adda a naisaganan a maibusor kencuana iti sango ken licudanna, nangpili cadagiti amin a napili a lallaki ti Israel, ket inornosna ida a maibusor cadagiti Sirios.

11Ket ti natda cadagiti tattao inyawatna iti ima ni Abisai a cabsatna; ket nagornosda a maibusor cadagiti annac ti Ammon.

12Ket kinunana, No dagiti Sirios napigsadanto unay a maibusor caniac, tulongannacto ngarud: ngem no napigsadanto unay a maibusor kenca dagiti annac ti Ammon, tulongancanto ngarud.

13Umingelca a naimbag, ket aglallalakita a maipaay iti ilitayo, ken maipaay cadagiti il-ili ti Diostayo: ket aramiden coma ni Jehova ti pagarupenna a naimbag.

14Iti casta ni Joab ken dagiti tattao a naicuyog kencuana immasidegda iti gubat a maibusor cadagiti Sirios; ket dagidiay intalawanda ti sangona.

15Ket idi a nakita dagiti annac ti Ammon a dagiti Sirios nagtalawdan, intalawanda met ti sangoanan ni Abisai a cabsatna, ket simrecda iti ili. Idin ni Joab immay iti Jerusalem.

16Ket idi a dagiti Sirios nakitada a naicabilda iti dacdakes iti sango ti Israel, nagibaonda cadagiti babaonen, ket pinaalada dagiti Sirios nga adda idi iti ballasiw ti Carayan, agraman ken ni Sofac a capitan ti buyot ni Adarezer iti unada.

17Ket naibaga idi ken David; ket inurnongna amin nga Israel, ket bimmallasiw iti Jordan, ket immay cadacuada, ket inornosna ti gubat a maibusor cadacuada. Iti casta idi a ni David inornosna ti gubat a maibusor cadagiti Sirios, isuda nakigubatda kencuana.

18Ket dagiti Sirios intalawanda ti sango ti Israel; ket ni David nangpatay cadagiti Sirio cadagiti lallaki dagiti pito a ribu a luglugan, ken namatay iti uppat a pulo a ribu a lallaki a sacasaca, ken pinatayna ni Sofac a capitan ti buyot.

19Ket idi a dagiti ad-adipen ni Adarezer nakitada a naisaadda iti dacdakes iti sango ti Israel, nakicappiada ken David, ket nagservida kencuana: uray caano dagiti Sirios dida kinayaten a tinulongan dagiti annac ti Ammon.

← Chapter 18 Jump to: Chapter 20 →