1 Chronicles 27

Ilokano (Ti Biblia (1973))

← Chapter 26 Jump to: Chapter 28 →

1Dagiti annac ti Israel a mayannurot iti bilangda, isu ti ammoen, dagiti pangpangoloen, dagiti balbalay dagiti amma ken dagiti iti capcapitan dagiti rinibu ken dagiti ginasgasut, ken dagiti agturturayda a nagservi idi iti ari, iti uray aniaman a panggep dagiti bungbunggoy a sumrec idi ken rumuar iti binulanbulan cadagiti amin a bulbulan ti tawen-ti tunggal bunggoy adda idi duapulo ket uppat a ribu.

2Ti pangolo ti umuna a bunggoy a maipaay iti umuna a bulan isu idi ni Jasobam, nga anac ni Zabdiel: ket iti bunggoyna adda idi duapulo ket uppat a ribu.

3Isu nagtaud cadagiti annac ni Fares, ti pangolo dagiti amin a capcapitan ti buyot a maipaay iti umuna a bulan.

4Ket ti pangolo ti bunggoy ti maicadua a bulan isu idi ni Dodai nga Ahohita, ken ti bunggoyna: ket ni Miclot ti agturay: ket ti bunggoyna duapulo ket uppatda a ribu idi.

5Ti maicatlo a capitan ti buyot a maipaay iti maicatlo a bulan isu idi ni Benaias, nga anac ni Joiada a padi, a pangolo: ket iti bunggoyna adda idi duapulo ket uppat a ribu.

6Daytoy isu ti Benaias, a maingel a lalaki ken pangolo dagiti tallopulo, ket iti bunggoyna adda idi ni Amisabad nga anacna a lalaki.

7Ti maicapat a capitan a maipaay iti maicapat a bulan isu idi ni Asael a cabsat ni Joab, ket ni Zebadias nga anacna a lalaki iti sumaganad kencuana: ket iti bunggoyna adda idi duapulo ket uppat a ribu.

8Ti maicalima a capitan a maipaay iti maicalima a bulan isu idi ni Sambut a Izrita: ket iti bunggoyna adda idi duapulo ket uppat a ribu.

9Ti maicanem a capitan a maipaay iti micanem a bulan isu idi ni Hira nga anac ni Ickes a Tecuita: ket iti bunggoyna adda idi duapulo ket uppat a ribu.

10Ti maicapito a capitan a maipaay iti maicapito a bulam isu idi ni Helles a Pelonita, cadagiti annac ni Efraim: ket iti bunggoyna adda idi duapulo ket uppat a ribu.

11Ti maicawalo a capitan a maipaay iti maicawalo a bulan isu idi ni Libbecai nga Husasita, cadagiti Zarahitas: ket iti bunggoyna adda idi duapulo ket uppat a ribu.

12Ti maicasiam a capitan a maipaay iti maicasiam a bulan isu idi ni Abiezer nga Anatotita, cadagiti Benjamitas: ket iti bunggoyna adda idi duapulo ket uppat a ribu.

13Ti maicasangapulo a capitan a maipaay iti maicasangapulo a bulan isu idi ni Maharai a Netofatita, cadagiti Zarahitas: ket iti bunggoyna adda idi duapulo ket uppat a ribu.

14Ti maicasangapulo ket maysa a capitan a maipaay iti maicasngapulo a maipaay iti maicasangapulo ket maysa a bulan isu idi ni Benaias a Piratonita, cadagiti annac ni Efraim: ket iti bunggoyna adda idi duapulo ket uppat a ribu.

15Ti maicasangapulo ket dua a capitan a maipaay iti maicasangapulo ket dua a bulan isu idi ni Heldai a Netofatita, ni Otniel: ket iti bunggoyna adda idi duapulo ket uppat a ribu.

16Maysa pay iti ngatoen dagiti capcaputotan ti Israel: cadagiti Rubenitas ni Eliezer nga anac ni Zecri isu idi ti agturay: cadagiti Simeonitas, ni Safatias nga anac ni Maaca:

17Iti Levi, ni Hasabias nga anac ni Camuel: iti Aaron, ni Sadoc:

18Iti Juda, ni Eliu, maysa cadagiti cacabsat ni David: iti Isacar, ni Omri nga anac a lalaki ni Micael:

19Iti Zabulon, ni Ismaias nga anac a lalaki ni Abdias: iti Neftali, ni Jerimot nga anac a lalaki ni Azriel:

20Cadagiti annac ni Efraim, ni Oseas nga anac a lalaki ni Azasia: iti caguddua ti caputotan ni Manases, ni Joel nga anac a lalaki ni Pedaia:

21Iti caguddua ti caputotan ni Manases idiay Galaad, ni Iddo nga anac a lalalki ni Zacarias: iti Benjamin, ni Jaciel nga anac a lalaki ni Abner:

22Iti Dan, ni Azara nga anac a lalaki ni Jeroam. Dagitoy isuda idi dagiti capcapitan dagiti capcaputotan ti Israel.

23Ngem ni David saanna nga innala ti bilang dagiti agtawen iti duapulo ken agpababa, agsipud ta ni Jehova kinunana a pawadwadenna ti Israel a cas cadagiti bitbitwen ti langit.

24Ni Joab nga anac ni Sarvia rinugianna ti nagbilang, ngem dina nagibusan; ket immay ti pungtot gapu itoy iti rabaw ti Israel; uray ti bilang saan a naicabil iti pacasaritaan dagiti cronicas ni ari David.

25Ket ti agaywan cadagiti gamgameng ti ari isu idi ni Azmabet nga anac ni Adiel: ket ti agaywan cadagiti gameng cadagiti aw-away, cadagiti il-ili, ken cadagiti purpuroc, ken cadagiti castillo, isu idi ni Jonatan nga anac ni Uzzias:

26Ket ti agaywan cadagiti agtrabajo idiay away a maipaay iti pannacatrabajo ti daga isu idi ni Ezri nga anac ni Kelub:

27Ket ti agaywan cadagiti cauvasan isu idi ni Simi a Ramatita: ket ti agaywan iti apit ti cauv-uvasan a maipaay iti pagidulinan ti arac isu idi ni Zabdias a Sifmita:

28Ket ti agaywan cadagiti olivo ken cadagiti sicomoro nga adda idi iti daga a nababa isu idi ni Baal-hanan a Gederita: ket ti agaywan cadagiti pagidulinan ti lana isu idi ni Joas:

29Ket ti agaywan cadagiti arban nga agarab idi idiay Saron isu idi ni Sitrai a Saronita: ket ti agaywan cadagiti arban nga adda idi cadagiti lobong isu idi ni Safat nga anac ni Adlai:

30Ket ti agaywan cadagiti camello isu idi ni Obil nga Ismaelita: ket ti agaywan cadagiti asno isu idi ni Jedias a Meronotita: ket ti agaywan cadagiti isu idi ni Jaziz nga Agareno.

31Amin dagitoy isuda idi dagiti agturturay cadagiti cucua idi ni ari David.

32Ni Jonatan met nga uliteg ni David, maysa idi a consejero, maysa a lalaki a mannacaawat, ken maysa nga escriba: ket ni Jehiel nga anac ni Hamoni adda idi cadagiti annac ti ari:

33Ket ni Ahitofel isu idi ti consejero ti ari: ket ni Husai nga Arkita isu idi ti gayyem ni David:

34Ket iti calpasan ni Ahitofel isu idi ni Joiada nga anac ni Benaias, ken ni Abiatar: ket ti capitan ti buyot ti ari isu idi ni Joab.

← Chapter 26 Jump to: Chapter 28 →