1 Chronicles 23

Ilokano (Ti Biblia (1973))

← Chapter 22 Jump to: Chapter 24 →

1Ita ni David lacayen idi ken napno cadagiti al-aldaw; ket inaramidna ni anacna a Salomon nga ari iti Israel.

2Ket inurnongna amin a pangpangoloen ti Israel, agraman cadagiti papadi ken cadagiti Levitas.

3Ket nabilang dagiti Levitas manipud iti agtawen iti tallopulo ken agpangato: ket ti bilangda iti oloda, lalaki ken lalaki, tallopuloda ket walo a ribu.

4Cadagitoy, duapulo ket uppat a ribu dagiti agaywan idi iti aramid ti balay ni Jehova: ket innem a ribu idi dagiti agturturay ken oc-ocom;

5Ket uppat a ribu dagiti agbanbantay iti ruangan; ket uppat a ribu dagiti agdaydayaw ken Jehova a mapacuyogan cadagiti pagtocaran nga inaramidco, kinuna ni David, a pangdayawda.

6Ket ni David biningayna ida iti dinasindasig a mayannurot cadagiti annac ni Levi: da Gerson, Coat, ken Merari.

7Cadagiti Gersonitas: da Ladan ken Simi.

8Dagiti annac a lallaki ni Ladan: ni Jehiel ti pangolo, ni Zetan, ken ni Joel, talloda.

9Dagiti annac a lallaki ni Simi: da Selomit, Haziel, ken Aran, talloda. Dagitoy isuda idi dagiti pangoloen dagiti balbalay dagiti amma ti Ladan.

10Ket dagiti annac a lallaki ni Simi: da Jahat, Zinat, Jeus, ken Berias. Dagitoy nga uppat isuda dagiti annac ni Simi.

11Ket ni Jahat ti pangolo, ket ni Sinat ti maicadua: ngem da Jeus ken Berias awananda idi iti adu nga annac a lallaki; gapuna a nagbalinda idi a maysa a balay dagiti amma iti maysa a bilang.

12Dagiti annac a lallaki ni Coat: da Amram, Isar, Hebron, ken Uzziel, uppatda.

13Dagiti annac a lallaki ni Amram: da Aaron ken Moises; ket nailasin ni Aaron, tapno mangsantificar cadagiti casasantoanan a banbanag, isu ken dagiti annacna a lallaki, iti agnanayon, tapno agpuurda iti incienso iti sango ni Jehova, tapno agannongda kencuana, ken tapno mangbendicionda iti naganna iti agnanayon.

14Ngem ti maipapan ken Moises a lalaki ti Dios, dagiti annacna a lallaki nainagananda idi iti caputotan ni Levi.

15Dagiti annac a lallaki ni Moises: da Gerson ken Eliezer.

16Dagiti annac a lallaki ni Gerson: ni Sebuel ti pangolo.

17Ket dagiti annac a lallaki ni Eliezer: ni Rehabia ti pangolo; ket ni Eliezer awanan idi iti sabali nga annac a lallaki; ngem dagiti annac a lallaki ni Rehabia aduda unay idi.

18Dagiti annac a lallaki ni Isar: ni Selomit ti pangolo.

19Dagiti annac a lallaki ni Hebron: ni Jeria ti pangolo, ni Amarias ti maicadua, ni Jahziel ti maicatlo, ket ni Jecaman ti maicapat.

20Dagiti annac a lallaki ni Uzziel: ni Mica ti pangolo, ni Isia ti maicadua.

21Dagiti annac a lallaki ni Merari: da Mali ken Musi. Dagiti annac a lallaki ni Mali: da Eleazar ken Kis.

22Ket natay ni Eleazar, ket awanan idi iti annac a lallaki, no di laeng babbai: ket dagiti cacabsatda nga annac a lallaki ni Kis innalada ida nga assawada.

23Dagiti annac a lallaki ni Musi: da Mali, Eder, ken Jerimot, talloda.

24Dagitoy isuda idi dagiti annac a lallaki ni Levi a mayannurot cadagiti balbalay dagiti ammada, dagiti met laeng pangpangoloen dagiti balbalay dagiti amma dagidiay nabilang idi, iti bilang dagiti nagnagan cadagiti inolonolo cadacuada, a nagaramid iti aramid a maipaay iti panagservi ti balay ni Jehova, manipud iti agtawen iti duapulo ken agpangato.

25Ta ni David kinunana, Ni Jehova, ti Dios ti Israel, intedna ti inana iti ilina; ket agtaeng idiay Jerusalem iti agnanayon:

26Ket casta met dagiti Levitas didanto masapulen nga awiten ti tabernaculo ken amin nga al-alicamenna a maipaay iti pinagservianna.

27Ta cadagiti naudi a sasao ni David dagiti annac a lallaki ni Levi nabilangda, manipud iti agtawen iti duapulo ken agpangato.

28Ta ti annongda isu idi ti panangcuyog cadagiti annac a lallaki ni Aaron a maipaay iti panagannong ti balay ni Jehova, cadagiti paraangan, ken cadagiti sagumbi, ken iti pananggugor cadagiti amin a nasantoan a banbanag, a ti met laeng aramid ti panagannong iti balay ti Dios;

29Maipaay iti tinapay ti pamarang met, ken iti namayecmec a harina a maipaay a daton a macan cadagiti di nalevaduraan a cancanen a naingpis, wenno iti maihorno nga imbandeja, wenno iti impaagsep, ken iti maipaay iti amin a kita ti rucod ken cadackel;

30Ken tapno agtacderda iti tunggal bigat nga agyaman ken agdayaw ken Jehova, ken casta met iti malem;

31Ken tapno idatagda ken Jehova dagiti amin a datdaton a mapuuran, cadagiti al-aldaw a panaginana, cadagiti luttuad, ken cadagiti nakedngan a fiesta, iti bilang a mayannurot iti annuroten a cancanayon a maipaay cadacuada iti sango ni Jehova:

32Ken tapno salimetmetandanto ti panangaluad ti tolda ti gimong, ken ti panangaluad ti nasantoan a disso, ken ti panangaluad dagiti annac a lallaki ni Aaron a cabsatda a maipaay iti panagannong ti balay ni Jehova.

← Chapter 22 Jump to: Chapter 24 →