1 Chronicles 16

Ilokano (Ti Biblia (1973))

← Chapter 15 Jump to: Chapter 17 →

1Ket inyegda ti lacasa ti Dios, ket isu ti insaadda iti tengnga ti tolda a binangon ni David a maipaay kencuana: ket nagidatagda cadagiti datdaton a mapuuran, ken datdaton ti cappia iti saclang ti Dios.

2Ket idi a ni David nalpasna ti nagidatag iti daton a mapuuran ken datdaton ti cappia, binendicionanna ti umili iti nagan ni Jehova.

3Ket binunonganna ti tunggal maysa ti Israel, lalaki ken babai agpadpadada, iti tunggal maysa maysa a tinapay, ken sangcaapag a lasag, ken sangcatipkel nga uvas a pinakebbet.

4Ket tinudinganna cadagiti Levitas ti agannong iti sango ti lacasa ni Jehova, ken agakem ken agyaman ken agdayaw ken Jehova, ti Dios ti Israel:

5Ni Asaf ti pangolo, ket ti maicadua kencuana da Zacarias, Jeiel, Semiramot, ken Jehiel, ken Matitias, Eliab, Benaias, ken Obed-edom, ken Jeiel, a sisasalterio ken siaar-pada; ket ni Asaf agpaaweng iti natbag cadagiti piangpiang;

6Ket da Benaias, ken Jahaziel a papadi sitatangguyobda a cancanayon, iti sango ti lacasa ti tulag ti Dios.

7Iti daydi nga aldaw intuyang ngarud ni David iti umuna ti panagyaman ken Jehova, iti pannacaaramat ti ima ni Asaf ken dagiti cacabsatna.

8O agyamancayo ken Jehova awaganyo ti naganna; ipacaammoyo cadagiti il-ili dagiti ar-aramidna.

9Isu ti icantaanyo, dagiti panagdayaw icantayo kencuana; saoenyo ti maipapan cadagiti nacascasdaaw nga ar-aramidna.

10Agrag-ocayo iti nasantoan a naganna; agrag-o coma ti puso dagiti agsapul ken Jehova.

11Sapulenyo ni Jehova ken ti pigsana; sapulenyo a cancanayon ti rupana.

12Lagipenyo dagiti nacascasdaaw nga ar-aramid nga inaramidna, dagiti datdatlagna, ken dagiti panangoc-ocom ti ngiwatna.

13O dacayo a putot ni Israel nga adipenna, dacayo annac ni Jacob, a pinilina.

14Isu ni Jehova a Diostayo; dagiti panangoc-ocomna addada iti amin a daga.

15Lagipenyo ti tulagna iti agnanayon, ti sao nga imbilinna cadagiti sangaribu a capcapounan,

16Ti tulagna nga inaramidna ken Abraham, ken ti sapatana ken Isaac,

17Ket pinasingkedanna daydiay met laeng ken Jacob a maysa nga ipaalagad, iti Israel a maipaay a maysa nga agnanayon a tulag,

18A kinunana, Ti daga ti Canaan kenca itdecto, ti gasat ti tawidyo;

19Idi dacayo bassit laeng a tattao iti bilangyo, wen, bassit unay, ket kencuana gangannaetcayo:

20Ket nagnada iti nacion ken nacion, ken iti maysa a pagarian iti sabali nga umili.

21Isu dina pinalubosan ti tao a mangpadakes cadacuada; wen, tinubngarna dagiti ar-ari gapu met laeng cadacuada,

22A kinunana, Dicayo sagiden dagiti pinulotac, dicayo ranggasan dagiti mammadtoc.

23Icantaanyo ni Jehova, dacayo amin a dagdaga; iparangarangyo ti panangispalna iti inaldawaldaw.

24Ket ipalawagyo ti dayagna iti tengnga dagiti nasnacion, dagiti nacascasdaaw nga ar-aramidna iti tengnga dagiti amin nga inilin-ili.

25Ta ni Jehova dackel, ken sidadaeg a madaydayaw: isu met a mapagbutngan a nangnangrona ngem cadagiti amin a didios.

26Ta amin dagiti didiosen dagiti inilin-ili ladladawanda: ngem ni Jehova inaramidna dagiti langlangit.

27Kinatan-oc ken kinadaeg addada iti sangona: kinapigsa ken kinaragsac addada iti taengna.

28Ipaayyo ken Jehova, dacayo nga agcacabagian cadagiti il-ili, ipaayyo ken Jehova ti dayag ken kinapigsa;

29Ipaayyo ken Jehova ti dayag a rumbeng iti naganna; mangyegcayo iti maysa a daton, ket umaycayo iti saclangna: iti nasantoan nga ornos agrucbabcayo ken Jehova.

30Agkintayegcayo iti saclangna, dacayo amin a daga: ti lubong mapasingkedan met, tapno di mabalin a magaraw.

31Agragsac coma dagiti langlangit, ket agrag-o coma ti daga; saoenda coma iti tengnga dagiti nasnacion, Agari ni Jehova.

32Agungor coma ti baybay, ken ti pannacapunnona; agrag-o coma ti away ken amin nga adda kencuana;

33Iti casta agcantanto dagiti caycayo iti bakir gapu iti rag-o iti sango ni Jehova; ta umay a mangocom iti daga.

34O agyamancayo ken Jehova; ta isu naimbag; ta ti naayat a kinaimbagna agibtur iti agnanayon.

35Ket saoenyo, Isalacannacami, O Dios ti pannacaisalacami, ket urnongennacami ken isalacannacami cadagiti nasnacion, tapno agyamancami iti nasantoan a naganmo, ken tapno agballigicami iti pannacaidayawmo.

36Mabendito coma ni Jehova, ti Dios ti Israel, manipud iti agnanayon agingga iti agnanayon. Ket isu-amin a tattao kinunada, sapay coma, ket dinaydayawda ni Jehova.

37Iti casta imbatina idiay, iti sango ti lacasa ti tulag ni Jehova, da Asaf ken dagiti cacabsatna, tapno agannongda a cancanayon, iti sango ti lacasa cas sapulen ti aramid iti inaldaw;

38Ken ni Obed-edom agraman cacabsatna, innem a puloda ket walo; castamet ni Obed-edom nga anac a lalaki ni Jedutun, ken ni Hosa, tapno agbantayda iti ruangan;

39Ken ni Sadoc a padi, ken dagiti cacabsatna a papadi, iti sango ti tabernaculo ni Jehova iti nangato a disso nga adda idi idiay Gabaon,

40Ken tapno idatagda ken Jehova dagiti datdaton a mapuuran iti rabaw ti altar ti daton a mapuuran a cancanayon iti bigat ken iti malem, a mayannurot met laeng iti amin a naisurat iti linteg ni Jehova, nga imbilinna iti Israel;

41Ket caduada da Heman ken Jedutun, ken ti matda a napili idi, a nainagananda idi, tapno agyamanda ken Jehova, agsipud ta ti naayat a kinaimbagna agtaeng iti agnanayon;

42Ket caduada da Heman ken Jedutuan agraman tangtangguyob ken piangpiangpiang ta isuda ti agaweng iti natbag, ken agraman ar-arwaten a maipaay iti cancanta ti Dios; ken dagiti annac a lallaki ni Jedutum tapno agyanda iti ruangan.

43Ket amin a tattao pimmanawda tunggal lalaki a napan iti balayna: ket ni David nagsubli tapno bendicionanna ti balayna.

← Chapter 15 Jump to: Chapter 17 →