1 Chronicles 29

Ilokano (Ti Biblia (1973))

← Chapter 28 Jump to:

1Ket ni ari David kinunana iti amin a gimong, Ni anacco a Salomon, isu a maymaysa a pinili ti Dios, ubing pay laeng ken naganus, ket ti aramid dackel; ta ti palacio saan a maipaay iti tao, no di ket maipaay iti Dios.

2Iti amin a cabaelac nagsaganaac a maipaay iti balay ti Diosco iti balitoc a maipaay cadagiti banbanag a binalitocan, ken iti pirac a maipaay cadagiti banbanag a piniracan, ken iti gambang a maipaay cadagiti banbanag a ginambangan, iti landoc a maipaay cadagiti banbanag a linandocan, ken caycayo a maipaay cadagiti banbanag a kinayoan; batbato nga onix, ken batbato tapno maisaadda, batbato a maipaay iti aramid nga imbutac, ken cadagiti nadumaduma a burburic, ken amin a kita dagiti napateg a batbato, ken batbato a marmol a nawadwadda unay.

3Maysa pay, agsipud ta insaadco ti ragragsacco iti balay ti Diosco, idinto ta addaanac ti gameng a cucuac met laeng a balitoc ken pirac, isu intedco iti balay ti Diosco, sabali laeng ti insaganac a maipaay iti nasantoan a balay,

4A tallo a ribu met laeng a talento a balitoc, ti balitoc ti Ofir, ken pito a ribu a talento a nagugoran a pirac, isuda a pangcalupcup cadagiti diding dagiti balay,

5Iti balitoc a maipaay cadagiti banbanag a binalitocan, ken iti pirac a maipaay cadagiti banbanag a piniracan, ken maipaay iti amin a kita ti aramid tapno maaramid gapu cadagiti im-ima dagiti nalaing nga agar-aramid. Asino ngarud ti agidaton iti sibubulos a nakemna tapno iconsagrarna ti bagina ken Jehova itoy nga aldaw?

6Idin dagiti pangoloen dagiti balbalay dagiti amma, ken dagiti pangoloen dagiti caputotan ti Israel, ken dagiti capcapitan dagiti rinibu ken dagiti ginasgasut, agraman cadagiti agturturay iti aramid ti ari, nagidatonda iti sububulos a nakemda;

7Ket intedda a maipaay iti panagservi ti balay ti Dios ti balitoc lima a ribu a talento ken sangalacsa a daric, ket iti pirac sangalacsa a talento, ket ti gambang sangapulo ket walo a ribu a talento, ken iti landoc sangagasut a ribu a talento.

8Ket isuda agraman dagiti nacasaracan cadagiti napateg a batbato intedda ida a gaming ti balay ni Jehova, babaen ti ima ni Jeiel a Gersonita.

9Idi a casta nagrag-o dagiti umili, ta nagidatonda iti sibubulos a nakemda, agsipud ta nagidatonda ken Jehova a binuyog ti maysa a puso a sipapalungdo iti sibubulos a nakemda: ket ni David nga ari nagrag-o met iti dackel a rag-o.

10Gapuna a ni David binenditona ni Jehova iti sango ti amin a gimong; ket ni David kinunana, Benditoca, O Jehova, a Dios ni Israel nga amami, iti agnanayon nga awan ti inggana.

11Cucuam, O Jehova, ti kinadackel, ken ti pannacabalin, ken ti gloria, ken ti balligi, ken ti kinadayag: ta amin nga adda cadagiti langlangit, ken iti daga cucuam; cucuam ti pagarian, O Jehova, ket maitan-occa a cas olo iti rabaw ti isu-amin.

12Dagiti kinabacnang ken dayaw agpadpadada nga aggpau kenca, ket agturayca iti isu-amin; ket mannacabalin ken maingel ta imam; ket ita imam ti yan ti mamadackel ken mamapigsa iti isu-amin.

13Ita ngarud, Diosmi, agyamancami kenca, ken agdayawcami iti nagloriana a naganmo.

14Ngem asinoac, ken ania ti ilic, tapno cabaelanmi coma ti mangidaton iti sibubulos a cas iti daytoy a kita? ta naggapu amin a banbanag kenca, ket iti cucuan ti itdenmi kenca.

15Ta gangannaetcami iti sangom, ken aglaslasatcami cas cadagiti amin nga ammami dagiti al-aldawmi iti daga cacasda la aniniwan, ket saan nga agtaeng.

16O Jehova a Diosmi, amin daytoy a kinawadwad nga insaganami a tapno ibangonandaca iti maysa a balay a maipaay iti nasantoan a naganmo naggapu ita imam, ket cucuam amin.

17Ammoc met, Diosco, a suutem ti puso, ket maay-ayoca iti nalinteg. No maipapan caniac, iti kinalinteg ti pusoc indatonco iti sibubulos a nakemco amin dagitoy a banbanag: ket ita sirarag-oac a nacakita cadagiti umilim, nga addada a sisasango ditoy, agidatonda iti sibubulos a nakemda kenca.

18O Jehova, a Dios ni Abraham, ni Isaac, ken ni Israel, nga ammami, salimetmetam daytoy iti agnanayon iti balabalaen dagiti panpanunot ti puso ti umilim, ket isaganam ti pusoda kenca;

19Ket iccam ni anacco a Salomon iti maysa a puso a napalongdo, tapno salimetmetanna dagiti bilbilinmo, panpanecnecmo, ken ipapaalagadmo, ken tapno aramidenna amin dagitoy a banbanag, ken bangonenna ti palacio, isu nga insaganaac.

20Ket ni David kinunana iti amin a gimong, Ita benditoenyo ni Jehova a Diosyo. Ket binendito ti amin a gimong ni Jehova, a Dios dagiti ammada, ket inculobda dagiti ol-oloda, ket nagrucbabda ken Jehovam ken iti ari.

21Ket nagsacrificarda cadagiti sacrificios ken Jehova, ken nagidatagda ken Jehova cadagiti datdaton mapuuran iti bigat calpasan daydi nga aldaw, a sangaribu met laeng a vacvaca a lallaki, sangaribu a carcarnero, ken sangaribu a corcordero, agraman cadagiti datdatonda a mainum, ken sacrificios a nawadwad a maipaay iti amin nga Israel,

22Ket nanganda ken imminumda iti sango ni Jehova idi nga aldaw a binuyog ti dackel a ragsac. Ket pinagarida ni Salomon nga anac ni David iti sumaganad, ket isu ti pinulutanda ken Jehova tapno agpangolo, ken ni Sadoc tapno agpadi.

23Idin ni Salomon timmugaw iti trono ni Jehova a cas ari iti saad ni David nga amana, ket nagrang-ay; ket amin nga Israel nagtulnogda kencuana.

24Ket amin a pangpangoloen, ken dagiti lallaki a mamaingel, ken amin met dagiti annac a lallaki ni ari David inrucbabda ti bagbagida ken ari Salomon.

25Ket ni Jehova intan-ocna ni Salomon iti casta unay iti imatang ti amin nga Israel, ket impaayna kencuana ti casta a kinadayag a naarian a di nagun-odan iti uray siasinoman nga ari iti sacbayna iti Israel.

26Ngarud ni David nga anac ni Jesse nagari iti amin nga Israel.

27Ket ti tiempo ti pinagarina iti Israel uppat a pulo a tawen; pito a tawen ti pinagarina idiay Hebron, ket tallo pulo ket tallo a tawen ti pinagarina idiay Jerusalem.

28Ket isu natay iti maysa a naimbag a kinalacay, a napno cadagiti al-aldaw, kinacbacnang, ken dayaw: ket nagari iti saadna ni anacna a Salomon.

29Dagiti ar-aramid ni ari David, immuna man ken naudi, adtoy, naisuratda iti historia ni Samuel a macakita iti masacbayan, ken iti historia ni Natan a mammadto, ken iti historia ni Gad a macakita iti masacbayan,

30Agraman amin a pagarianna ken pannacabalinna, ken dagiti tiempo a naglasat kencuana, ken iti Israel, ken cadagiti amin a pagpagarian dagiti dagdaga.

← Chapter 28 Jump to: