1 Chronicles 17

Ilokano (Ti Biblia (1973))

← Chapter 16 Jump to: Chapter 18 →

1Ket naaramid, idi a ni David nagnaed idiay balayna, ni David kinunana ken mammadto a Natan, Adtoy, agnaedac iti maysa a balay a kinantingenan, ngem ti lacasa ti tulag ni Jehova agnaed iti siroc dagiti bengbeng.

2Ket ni Natan kinunana ken David, Aramidem amin nga adda ita pusom; ta ti Dios adda kenca.

3Ket naaramid idi met laeng a rabii, a ti sao ti Dios immay ken Natan, a kinunana,

4Inca ket ibagam ken adipenco a David, Castoy ti cuna ni Jehova, Sica dinacto yaramidan iti maysa a balay a pagtaengac:

5Gapu ta saanac idi a nagnaed iti maysa a balay nanipud idi aldaw a pinangaonco iti Israel agingga itoy nga aldaw, no di ket nagnaac manipud iti tolda ken tolda, ken manipud iti maysa a tabernaculo ken iti sabali.

6Cadagiti amin a disdisso a nakipagnaac iti amin nga Israel, nangisaoac aya iti sangcabalicas iti uray siasinoman cadagiti oc-ocom ti Israel, a nangibilinac a mangipaarab idi ilic nga Israel, a kinunac, Apayapay a didac imbangonan iti maysa a balay a kinantingenan?

7Ita ngarud castoy ti cunamto ken adipenco a David, Castoy ti cuna ni Jehova dagiti buybuyot, Siac innalaca nanipud iti pagaponan dagiti carnero, ken nanipud iti pagsarsarunoan cadagiti carnero, tapno sica coma ti pangolo ti Israel nga ilic:

8Ket addaac idi kenca iti uray sadinoman a napnapanam, ket kineltayco amin dagiti cabusormo iti sangoanam; ket pagbalinencanto a maysa a nagan, a cas iti nagan dagiti dadackel nga adda ditoy daga.

9Ket itudingconto ti maysa a lugar a maipaay iti ilic nga Israel, ket imulacto ida, tapno agnaedda iti lugarda met laeng, ket dida coma mayallatiwen: iti uray caano dagiti annac ti kinadakes didanto parigatenen ida, a cas la idi unana,

10Ken cas nanipud idi aldaw a nagbilinac cadagiti oc-ocom iti ilic nga Israel; ket parucmaecto amin dagiti cabusormo. Casta met a saoec kenca a ni Jehova ibangonannacanto iti maysa a balay.

11Ket maaramidto, intono maturposen coma dagiti aldawmo a mapancan makipagyan cadagiti ammam, a bangonecto ti putotmo a sumaruno kenca, nga isunto ti maala cadagiti annacmo a lallaki; ket pasingkedacto ti pagarianna.

12Isu ibangonannacto iti maysa a balay, ket pasingkedacto iti agnanayon ti tronona.

13Siacto ti amana, ket isunto ti anacco: ket diacto iccaten kencuana ti naayat a kinaimbagco, cas iti panangiccatco iti daydi immun-una ngem sica;

14No di ket pasingkedacto kencuana iti balayco ken iti pagariac iti agnanayon; ket agtalinaedto iti agnanayon ti tronona.

15Mayannurot cadagiti amin a sasao, ken mayannurot iti amin itoy a parparmata, casta ti panangisao ni Natan ken David.

16Idin ni David nga ari simrec, ket nagtugaw iti sango ni Jehova; ket kinunana, Asinoac aya, O Jehova a Dios, ken ania aya ti balayco, tapno yegnac agingga iti castoy?

17Ket daytoy bassit pay laeng cadagita matam, O Dios; ngem saoem met ti maipapan iti balay ti adipenmo iti naunday a tiempo a sumungad; ket incancanonac a mayalubog iti casasaad ti lalaki a natan-oc, O Jehova a Dios.

18Ania pay laeng ti mabalin a saoen ni David kenca ti maipapan iti dayaw a maaramid iti adipenmo? ta sica ammom ti adipenmo.

19O Jehova gapu iti adipenmo, ken mayalubog ita pusom met laeng, inaramidmo amin daytoy a kinadackel, tapno ipacaammom amin dagitoy dadackel a banag.

20O Jehova, awan ti cas kenca, awan ti siasinoman a Dios iti lacsidmo, a mayalubog iti isu-amin a nangegmi babaen cadagiti lapayagmi.

21Ket ania ti maysa a nacion iti daga ti adda a cas iti ilim nga Israel, isu a ti Dios napan a nangsubbot a maipaay kencuana met laeng a maysa nga umili; tapno aramidennaca a maysa a nagan gapu iti dackel ken nacakigkigtot a banag, iti panamagtalawna cadagiti nasnacion iti saclang ti ilim isu a sinubbotmo iti Egipto?

22Ta iti ilim nga Israel inaramidmo nga ilim met laeng iti agnanayon; ket sica, Jehova, nagbalinca a Diosda.

23Ket ita, O Jehova, ipalubosmo a ti sao nga insaom a maipapan iti adipenmo, ken maipapan iti balayna, mapasingkedan coma iti agnanayon, ket aramidem ti cas insaom.

24Ket mabangon ken madaydayaw coma ti naganmo iti agnanayon, a cunaen, Ni Jehova dagiti buybuyot isu ti Dios ti Israel, maysa a Dios met laeng ti Israel: ket ti balay ni adipenmo a David mapasingkedan iti sangoanam.

25Ta sica, O Diosco, impaltiingmo iti adipenmo nga isu ti ibangonamto iti maysa a balay: gapuna a ti adipenmo natignay nga agcararag iti sangoanam.

26Ket ita, O Jehova, sica ti Dios, ket incarim daytoy naimbag a banag iti adipenmo:

27Ket ita naay-ayoca a nangbendicion iti balay ti adipenmo, tapno agnanayon coma iti sangoanam; ta sica, O Jehova, binendicionam, ket isu ti bendita iti agnanayon.

← Chapter 16 Jump to: Chapter 18 →