1 Chronicles 21

Ilokano (Ti Biblia (1973))

← Chapter 20 Jump to: Chapter 22 →

1Ket ni Satanas timmacder a maibusor iti Israel, ket tinignayna ni David a mangbilang iti Israel.

2Ket ni David kinunana ken Joab, kencadagiti pangpangoloen dagiti tattao, Incayo, bilangenyo ti Israel manipud Beer-seba agingga met laeng iti Dan; ket iyegyo caniac ti damag, tapno maammoac coma ti dagupda.

3Ket ni Joab kinunana, Paaduen coma ni Jehova ti ilina iti mamingasut iti adda a bilangda: ngem, apoc nga ari, saanda aya nga ad-adipen amin ti apoc? apayapay a ti apoc tarigagayanna daytoy a banag? apayapay nga isunto ti maysa a gapu ti basol iti Israel?

4Nupay casta ti sao ti ari pinarmecna ni Joab. Gapuna a ni Joab nagluas, ket napan iti amin nga Israel, ket simmangpet iti Jerusalem.

5Ket ni Joab intedna ti dagup ti bilang ti umili ken David. Ket isuda amin ti Israel adda idi sangariuriu ket sangagasut a ribu a lallaki a nagtagicampilan: ket ti Juda uppat a gasut ket pitopulo a ribu a lallaki a nagtagicampilan.

6Ngem ti Levi ken ti Benjamin saanda a naibilang cadacuada: ta ti sao ti ari nacarimon idi ken Joab.

7Ket ti Dios saan a naay-ayo itoy a banag: gapuna a kinabilna ti Israel.

8Ket ni David kinunana iti Dios, Nacabasolac iti dackel unay, iti panangaramidco itoy a banag: ngem ita umararawac kenca a iwacsim coma, ti kinadakes toy adipenmo; ta siac nagaramidac a simamaag unay.

9Ket ni Jehova nagsao ken Gad, a mammadto ni David, a kinunana,

10Inca ket saoem ken David, a cunaem, Castoy ti cuna ni Jehova, Tallo a banbanag ti igay-atco kenca; sica mangpilica iti maysa cadacuada, nga aramidec coma kenca.

11Iti casta ni Gad immay ken David, ket kinunana kencuana, Castoy ti cuna ni Jehova, Alaem ti caycayatmo:

12Tallo a tawen ti bisin: wenno tallo a bulan a madaddadaelca iti saclang dagiti cabusormo, iti bayat ti panangcamcamat kenca ti campilan dagiti cabusormo; wenno ti sabali tallo nga aldaw ti campilan ni Jehova, a ti met laeng angol iti daga, ket ti angel ni Jehova a mangdadael cadagiti amin a bedbeddeng ti Israel. Ita ngarud panunotem no ania ti sungbat nga idanonco iti nangibaon caniac.

13Ket ni David kinunana ken Gad, Addaac iti dackel a pacarigatan: dawatec nga agsaadac coma, iti ima ni Jehova; ta dadackelda unay dagiti caasina; ket diac coma matnag iti ima ti tao.

14Iti casta ni Jehova imbaonna ti maysa nga angol iti Israel; ket napasag iti Israel ti pitopulo a ribu a tattao.

15Ket ti Dios imbaonna ti maysa nga angel idiay Jerusalem tapno dadaelenna: ket idi a mangdadael, ni Jehova kimmita, ket imbabawina di dakes, ket kinunana iti angel a mangdadael, Isun; ita itukenmo ta takiagmo. Ket ti angel ni Jehova nagtactacder iti denna ti pagtaltagan ni Ornan a Jebuseo.

16Ket ni David intangadna dagiti matana, ket nakitana di angel ni Jehova nga agtactacder iti nagbaetan ti daga ken langit, nga addaan iti maysa a siaasut a campilan idi imana a siuunnat iti rabaw ti Jerusalem. Idin ni David ken dagiti lallacay, nagcawesda iti nakersang, nagpaclebda cadagiti ruprupada.

17Ket ni David kinunana iti Dios, Saan a siac aya ti nagbilin iti pannacabilang ti umili? siac met laeng ti nacabasol ken nagaramid a sidadangcoc unay; ngem dagitoy a carcarnero, ania ti inaramidda? agdawatac kenca, O Jehova a Diosco, palubosam ta imam a maibusor coma caniac, ken maibusor iti balay ni amac; ngem saan coma a maibusor iti ilim, tapno madidigrada.

18Idin ti angel ni Jehova binilinna ni Gad nga agsao ken David, a sumang-at coma ni David, ket mangbangon iti maysa nga altar ken Jehova idiay pagtaltagan ni Ornan a Jebuseo.

19Ket ni David simmang-at cas iti panagsao ni Gad, nga insaona iti nagan ni Jehova.

20Ket ni Ornan timmaliaw, ket nakitana ti angel; ket dagiti uppat a lallaki nga annacna nga addada idi kencuana naglemmengda. Ket ni Ornan agtaltaltag idi iti trigo.

21Ket idi a ni David dimteng ken Ornan, ni Ornan kimmita ket naimatanganna ni David, ket rimmuar idi pagtaltagan, ket incul-obna di rupana iti daga iti sango ni David.

22Idin ni David kinunana ken Ornan, Itdem caniac ti disso daytoy a pagtaltagan, tapno mangbangonac kencuana iti maysa nga altar ken ni Jehova: gapu iti maitutup a pateg isu ti pangtedamto caniac, tapno ti didigra maisardeng coma iti umili.

23Ket ni Ornan kinunana ken David, Isu ti alaem a maipaay kenca, ket aramiden coma ti apoc nga ari ti naimbag cadagiti matana: adtoy, itdec kenca dagiti vacvaca a maipaay iti daton a mapuuran, ken dagiti ar-aruaten ti agbayu a maipaay a pagsungrod, ken ti trigo a maipaay iti daton a macan: itdec ida amin.

24Ket ni ari David kinunana ken Ornan, Saan; no di ket pudno a gatangec iti umisu a pateg: ta diacto alaen ti cucuam a maipaay ken Jehova, diacto mangidatag iti maysa a daton a mapuuran nga awan ti baybayadna.

25Iti casta ni David intedna ken Ornan gapu iti disso ti innem a gasut a siclo a balitoc iti timbengna.

26Ket ni David nangbangon sadiay iti maysa nga altar ken Jehova, ket indatagna dagiti datdaton a mapuuran, ken datdaton ti cappia, ket inawaganna ni Jehova; ket isu simmungbat kencuana nanipud langit iti pannacaaramat ti apuy iti rabaw ti altar ti daton a mapuuran.

27Ket ni Jehova binilinna di angel; ket isu incabilna manen ti campilan iti calubanna.

28Idi a tiempo, idi a ni David nakitana a ni Jehova simmungbat kencuana idiay pagtaltagan ni Ornan a Jebuseo, nagidaton ngarud sadiay.

29Ta ti tabernaculo ni Jehova nga inaramid ni Moises idiay let-ang, ken ti altar ti daton a mapuuran, addada idi a tiempo iti nangato a disso idiay Gabaon.

30Ngem ni David dina nabalinan ti napan iti sangona tapno umuman iti Dios; isu agbuteng idi a gapu iti campilan ti angel ni Jehova.

← Chapter 20 Jump to: Chapter 22 →