1 Chronicles 28

Ilokano (Ti Biblia (1973))

← Chapter 27 Jump to: Chapter 29 →

1Ket ginimong ni David dagiti amin a pangpangoloen ti Israel, dagiti pangoloen dagiti caputotan, ken dagiti capitan dagiti buyot a nagservi iti ari iti binungbunggoy, ken dagiti capitan dagiti rinibu, ken dagiti capitan dagiti ginasut, ken dagiti agturturay iti amin a cucua ken icutan ti ari ken dagiti annacna a lallaki, agraman agturturay, ken dagiti mamaingel a lallaki, amin met laeng a lallaki a mannacabalin ken mamaingel, idiay Jerusalem.

2Idin ni ari David nagtacder, ket kinunana, Denggendac, cacabsatco, ken ilic: ti maipapan caniac, adda idi iti pusoc ti panangbangon iti maysa a balay a paginanaan a maipaay iti lacasa ti tulag ni Jehova, ken maipaay iti pagbatayan ti Dios tayo; ket nagsaganaac ti maipaay iti panangbangon.

3Ngem ti Dios kinunana caniac, Dicanto mangbangon iti maysa a balay a maipaay iti naganco, agsipud ta maysaca a lalaki ti gubat, ket nagibuyatca iti dara.

4Nupay casta ni Jehova, a Dios ti Israel, pinilinac iti amin a balay ni amac nga agari iti Israel iti agnanayon: ta pinilina ni Juda nga agpangolo; ket iti balay ni Juda ti balay ni amac: ket cadagiti annac a lallaki ni amac naay-ayo a namagari caniac iti amin nga Israel;

5Ket cadagiti amin nga annacco a lallaki (ta iniccannac ni Jehova iti adu nga annac a lallaki), pinilina ni Salomon nga anacco tapno agtugaw iti trono ti pagarian ni Jehova iti Israel;

6Ket kinunana caniac, Ni anacmo a Salomon bangonennanto ti balayco ken dagiti paraanganco ta isu ti pinilic tapno isu ti anacco, ken siacto ti amana.

7Ket pasingkedacto ti pagarianna iti agnanayon, no sitatalinaed a mangaramid cadagiti bilbilinco ken cadagiti ipaannurotco, a cas itoy nga aldaw.

8Ita ngarud, iti imatang ti amin nga Israel, a gimong ni Jehova, ken iti pannacangngeg ti Diostayo, sungputenyo ken birukenyo amin a bilbilin ni Jehova a Diosyo; tapno matagicuayo daytoy naimbag a daga, ken isu ti maibatiyo a maysa a tawid nga agnanayon cadagiti annacyo a sumaruno cadacayo.

9Ket sica, Salomon nga anacco, ammoem ni Dios ti amam, ken agservica kencuana a buyogen ti maysa a puso a sipapalungdo ken iti maysa a nakem a natulnog; ta ni Jehova sukimatenna dagiti amin a puspuso, ken maawatanna amain dagiti ar-arapaap dagiti panpanunot. No isu ti sapulem, isu masaracmonto; ngem no isu idiam, iwacsinacanto iti agnanayon.

10Agannadca ita: ta pinilinaca ni Jehova a mangbangon iti maysa a balay a maipaay iti santuario: pumigsaca, ket isu ti aramidem.

11Sa ni David intedna ken anacna a Salomon ti pacawadan ti balcon ti templo, ken dagiti balayna, ken dagiti paggamenganna, ken dagiti nangatngato a cadsaaranna, ken dagiti naununeg a sagumbina, ken ti disso ti tugaw ti caasi:

12Ken ti pacawadan ti amin nga adda idi iti espirituna, maipaay cadagiti paraangan ti balay ni Jehova, ken maipaay cadagiti amin a sagumbi iti aglicmut, maipaay cadagiti paggamengan ti balay ti Dios, ken maipaay cadagiti paggamengan dagiti naipaay a banbanag;

13Casta met ti maipaay cadagiti pannacadasdasig dagiti papadi ken Levitas, ken maipaay iti amin nga aramid ti panagservi ti balay ni Jehova, ken maipaay cadagiti amin nga al-alicamen ti panagservi ti balay ni Jehova;

14Iti balitoc a tinimbeng a maipaay cadagiti alicamen a balitoc, maipaay iti amin nga al-alicamen ti tunggal kita ti panagannong; iti pirac a maipaay cadagiti amin nga alicamen a pirac a tinimbeng, maipaay cadagiti amin nga alicamen ti tunggal kita ti panagannong:

15Iti tinimbeng met a maipaay cadagiti candelero a balitoc, ken maipaay cadagiti pagsilawanna, iti balitoc, iti tinimbeng a maipaay iti tunggal candelero ken maipaay cadagiti pagsilawanna; ken maipaay cadagiti candelero a pirac, pirac a tinimbeng a maipaay iti tunggal candelero ken maipaay cadagiti pagsilawanna, a mayalubog iti pannacaaramat ti tunggal candelero:

16Ken iti balitoc a tinimbeng a maipaay cadagiti lamesaan ti tinapay ti pamarang, a maipaay iti tunggal lamesaan; ken pirac a maipaay cadagiti lamesaan a pirac;

17Ken dagiti pagadaw iti lasag, ken dagiti palangana, ken dagiti tagayan, a biig a balitoc; ken maipaay cadagiti binalitocan a malucong a tinimbeng a maipaay iti tunggal malucong; ken maipaay cadagiti malucong a pirac a tinimbeng a maipaay iti tunggal malucong;

18Ket ti maipaay iti altar ti incienso balitoc a ginugoran a tinimbeng; ken balitoc a pacawadan dagiti lugan, uray dagiti kerubin, a mangyucrad cadagiti payacda, ken mangabbong iti lacasa ti tulag ni Jehova.

19Amin daytoy, kinuna ni David, ni Jehova impaawatna caniac iti panan surat babaen ti panangidalanna caniac, cadagiti met laeng amin nga ar-aramid daytoy a pacawadan.

20Ket ni David kinunana ken Salomon nga anacna, Pumigsaca ket tumuredca, ket isu ti aramidem: dica agbuteng, dica maupay ta ni Jehova a Dios, a Diosco met laeng, adda kenca; isu dinto agcurang kenca, dinacanto idian agingga iti di malpas amin nga aramid a maipaay iti panagannong ti balay ni Jehova.

21Ket, adtoy, adda dagiti pannacadasdasig dagiti papadi ken Levitas, a maipaay iti panagannong ti balay ti Dios: ket addadanto kenca iti amin a kita ti aramid ti tunggal natulnog a lalaki nga addaan kinalaing, a mai paay iti aniaman a kita ti panagservi: casta met dagiti capcapitan ken amin nga umili addadanto iti panagbilinmo.

← Chapter 27 Jump to: Chapter 29 →