2 Chronicles 1

Ilokano (Ti Biblia (1973))

Jump to: Chapter 2 →

1Ket ni Salomon nga anac a lalaki ni David napatibker iti pagarianna, ket ni Jehova a Diosna adda idi kencuana, ket pinatanocna iti napalalo.

2Ket ni Salomon nagsao iti amin nga Israel, cadagiti capcapitan dagiti rinibu ken ginasut, ken cadagiti oc-ocom, ken iti tunggal pangolo iti amin nga Israel, dagiti pangpangoloen dagiti balbalay dagiti amma.

3Iti casta ni Salomon, ken iti amin a gimong a naicuyog kencuana, napanda iti nangato a disso nga adda idi idiay Gabaon; ta adda idiay idi ti tolda ti gimong ti Dios, a ni Moises nga adipen ni Jehova inaramidna idiay let-ang.

4Ngem ti lacasa ti Dios inyeg ni David a naggapu idiay Kiriat-jearim agingga iti disso nga insagana ni David a maipaay iti lacasa; ta isu pinatacderna ti maysa a tolda a maipaay kencuana idiay Jerusalem.

5Maysa pay ti altar a ginambangan, nga inaramid idi ni Baseleel nga anac a lalaki ni Uri, nga anac a lalaki ni Hur, adda idi idiay sangoanan ti tabernaculo ni Jehova: ket ni Salomon ken ti gimong isu ti sinaracda.

6Ket ni Salomon simmang-at sadiay iti sango ni Jehova agingga iti altar a ginambangan, nga adda idi idiay tolda ti gimong, ket indatagna ti sangaribu a datdaton a mapuuran iti rabawna.

7Iti daydi a rabii ti Dios nagparang ken Salomon, ket kinunana kencuana, Kiddawem ti itedconto kenca.

8Ket ni Salomon kinunana iti Dios, Sica imparangarangmo ti dackel a kinamanangngaasim ken David nga amac, ket pinagarinac iti saadna.

9Ita, O Jehova a Dios, pasingkedam coma ti carim ken David nga amac; ta pinagarinac iti maysa nga umili a cas iti tapoc ti daga iti caaduda.

10Itdem caniac ita ti kinasirib ken pannacaammo, tapno macaruarac ken macastrecac iti sango daytoy nga umili; ta siasino ti macabalin nga agocom itoy nga ilim, a casta unay ti cadackelna?

11Ket ti Dios kinunana ken Salomon, Agsipud ta daytoy adda ita pusom, ket sica saanmo a dinawat ti kinabacnang, sanicua wenno dayaw, wenno ti biag dagidiay a gumura kenca, saanmo pay met a dinawat ti atiddug a panagbiag; no di ket kiniddawmo ti kinasirib ken pannacaammo a maipaay kenca, tapno mabalinmo ti agocom iti ilic, a cadacuada pinagarica:

12Kinasirib ken pannacaammo mayawatda kenca; ken itdecto kenca ti kinabacnang, sanicua, ken dayaw, a cas saan a nalac-aman ti uray asinoman cadagiti nagar-ari idi sacbaymo; ket awanto met iti calpasam ti macagun-od iti capadana.

13Iti casta ni Salomon napan nanipud iti nangato a disso nga adda idi idiay Gabaon, a naggapu iti sango ti tolda ti gimong agingga iti Jerusalem; ket nagari iti Israel.

14Ket ni Salomon inurnongna dagiti luglugan ken lallaki nga agcacabayo: ket adda kencuana idi sangaribu ket uppat a gasut a luglugan, ken sangapulo ket dua nga ribu dagiti lallaki nga agcacabayo; nga isu incabilna cadagiti il-ili dagiti lugan, ken cumuyog iti ari idiay Jerusalem.

15Ket ti ari inaramidna a ti pirac ken balitoc idiay Jerusalem cas la cadagiti batbato, ket dagiti cantingen isu inaramidna a cas la cadagiti caycayo a sicomoro nga adda iti daga a nababa, iti kinaruayda.

16Ket dagiti cabcabayo nga adda idi ken Salomon naigapuda sadi Egipto; ket dagiti pagbaniagaen ti ari isuda ti nangawat cadacuada iti pinangen, tunggal pangen iti maysa a pateg.

17Ket insang-atda ket inruarda sadi Egipto ti maysa a lugan a gapu iti innem a gasut a siclo a pirac, ket maysa a cabayo iti sangagasut ket limapulo: ken casta ti maipaay cadagiti amin nga ar-ari dagiti Jetteos, ken ti maipaay cadagiti ari ti Siria, isuda inruarda ida a gapu iti pannacaaramatda.

Jump to: Chapter 2 →