2 Chronicles 28

Ilokano (Ti Biblia (1973))

← Chapter 27 Jump to: Chapter 29 →

1Agtawen idi iti duapulo a tawen idi nangrugi a nagari ni Acaz, ket nagari idiay Jerusalem bayat iti sangapulo ket innem a tawen: ket saanna nga inaramid daydi a nalinteg cadagiti mata ni Jehova a cas ken David nga amana;

2No di ket nagna cadagiti daldalan dagiti ar-ari ti Israel, ket inaramidna met dagiti ladladawan a sinucog a maipaay cadagiti Baales.

3Maysa pay pinuuranna ti incienso idiay lobong ti anac a lalaki ni Hinnom, ket pinuuranna dagiti annacna iti apuy, a mayalubog cadagiti kinarimon dagiti nasnacion, a pinagtalaw idi ni Jehova iti sango dagiti annac ti Israel.

4Ket nagidaton ken nagpuur iti incienso cadagiti nangato a disdisso, ken iti rabaw dagiti turturod, ken iti siroc dagiti isu-amin a caycayo a narucbos.

5Gapuna a ni Jehova a Diosna isu ti inyawatna iti ima ti ari ti Siria: ket isu kinabilda ket innalada kencuana cadagiti cucuana ti umariwecec, ket impanda ida idiay Damasco. Ket isu nayawat met iti ima ti ari ti Israel, isu a nangcabil kencuana iti dackel a pannacapapatay.

6Ta ni Peca nga anac a lalaki ni Remelias pinatayna idiay Juda ti sangagasut ket duapulo a ribu iti maysa nga aldaw, isuda amin lallakida a mamaingel; agsipud ta binaybay-anda ni Jehova, a Dios dagiti ammada.

7Ket ni Zicri, maysa a mannacabalin a lalaki ti Efraim, pinatayna ni Maasias nga anac a lalaki ti ari, ken ni Azricam nga agturay iti balay, ken ni Elcana a sumaganad iti ari.

8Ket dagiti annac ti Israel innalada a nacayawan cadagiti cacabsatda ti duagasut a ribu, babbai, ken annac a lallaki ken babbai, ket innalada, met ti adu a nasamsam cadacuada, ket insangpetda ti nasamsam idiay Samaria.

9Ngem maysa a mammadto ni Jehova adda idi sadiay, a ti naganna Obed: ket isu napan simmabet iti buyot a simmangpet idiay Samaria, ket kinunana cadacuada, Adtoy, agsipud ta ni Jehova, a Dios dagiti ammayo, nagpungtot iti Juda, isu inyawatna iti imayo, ket pinatayyo ida iti maysa a pungtot a dumanon iti langit.

10Ket ita panggepyo nga adipenen dagiti annac ti Juda ken ti Jerusalem a maipaay a bag-enyo a lallaki ken babbai: ngem awan aya cadacayo met laeng dagiti bucudyo a salungasing a maicaniwas ken Jehova a Diosyo?

11Ita denggendac ngarud, ket pasublienyo dagiti nacayawan, a kinayawanyo cadagiti cacabsatyo; ta ti narungsot a pungtot ni Jehova adda iti rabawyo.

12Idin ti dadduma cadagiti pangoloen dagiti annac ti Efraim, da Azarias nga anac a lalaki ni Johanan, ni Berekias nga anac a lalaki ni Mesillemot, ken Ezekias nga anac a lalaki ni Sallum, ken ni Amasa nga anac a lalaki ni Hadlai, nagtacderda a bimmusor cadagidiay a simmangpet a naggapu iti gubat.

13Ket kinunada cadacuada, Dicayto iserrec ditoy dagiti nacayawan: ta panggepenyo iti daydiay nga iparabawto cadatayo ti salungasing a maicaniwas ken Jehova, tapno inayonyo cadagiti basbasol ken salsalungasingtayo; ta dackel ti salungasingtayo ket adda narungsot a pungtot a maibusor iti Israel.

14Iti casta dagiti lallaki a naigaman imbatida dagiti nacayawan ken ti samsam iti sango dagiti pangpangoloen ken iti amin a gimong.

15Ket dagiti lallaki a nainaganan timmacderda, ket innalada dagiti nacayawan, ket kinawesanda dagiti amin a lamolamo cadacuada cadagiti samsam ket inornosda ida, ket sinapatosanda ida, ket nangtedda cadacuada ti canen ken inumen, ket sinapsapoanda ida, ket impasacayda dagiti amin a nacapuy cadacuada cadagiti as-asno, ket impanda ida idiay Jerico a pagilian dagiti caycayo a palma, cadagiti cacabsatda: sada nagsubli idiay Samaria.

16Iti daydi a tiempo nagbaon ni ari Acaz cadagiti ar-ari ti Asiria tapno isu ti tulonganda.

17Ta dagiti Idumeos addada manen idi, ket kinabildan ti Juda, ket innaladan dagiti nacayawan.

18Dagiti Filisteos met sinilongda idi dagiti il-ili ti nababa a daga, ken ti akinabagatan iti Juda, ket innalada idi ti Bet-semes, ken Ajalon, ken Gaderot, ken Soco agraman cadagiti il-ilina, ken Timna agraman cadagiti il-ilina, castamet ti Gimzo ken dagiti il-ilina: ket nagnaedda sadiay.

19Ta ni Jehova pinarucmana ti Juda gapu ken Acaz nga ari ti Israel; ta isu nagaramid a sililiway iti Juda, ket simmalungasing iti nacaro a maicaniwas ken Jehova.

20Ket ni Tiglat-pilneser nga ari ti Asiria immay kencuana, ket isu pinaleddaangna, saanna a pinapigsa.

21Ta ni Acaz innalana ti maysa nga apag a naggapu iti balay ni Jehova, naggapu iti balay ti ari ken cadagiti pang-pangoloen, ket intedna iti ari ti Asiria: ngem saanna a tinulongan.

22Ket idi tiempo ti pannacapaldaangna simmalungasing pay laeng a maicaniwas ken Jehova, daytoy met laeng ari Acaz.

23Ta nagidaton cadagiti didios ti Damasco, a nangcabil kencuana; ket kinunana, Agsipud ta dagiti didios dagiti ar-ari ti Siria timmulong da cadacuada, gapuna agidatonacto cadacuada, tapno tulongandacto. Ngem isuda ti pacadadaelanna, ken ti amin a Israel.

24Ket ni Acaz inurnongna dagiti alicamen ti balay ti Dios, ket pinutputedna dagiti al-alicamen ti balay ti Dios, ket rinikepanna dagiti ruangan ti balay ni Jehova; ket nagaramid cadagiti al-altar nga agpaay kencuana iti tunggal suli ti Jerusalem.

25Ket iti tunggal ili ti Juda inaramidna dagiti nangato a disso a pagpuuran ti incienso cadagiti sabsabali a didios, ket ginargarina nga agpungtot ni Jehova a Dios dagiti ammana.

26Ti natda cadagiti ar-aramidna, ken amin a daldalanna, umuna ken maudi, adtoy, naisuratda iti libro dagiti ar-ari ti Juda ken Israel.

27Ket ni Acaz nakiturog cadagiti ammana, ket isu intabonda iti ili, iti met laeng Jerusalem, ta isu saanda nga inserrec cadagiti tanem dagiti ar-ari ti Israel; ket ni Ezekias nga anacna a lalaki nagari iti saadna.

← Chapter 27 Jump to: Chapter 29 →