2 Chronicles 6

Ilokano (Ti Biblia (1973))

← Chapter 5 Jump to: Chapter 7 →

1Idi a casta nagsao ni Salomon, Ni Jehova kinunana nga isu agnaed coma iti nacaro a sipnget.

2Ngem siac imputaranca iti maysa a balay a pagnaedam, ken maysa a disso tapno pagnaedam iti agnanayon.

3Ket ti ari intaliawna ti rupana ket binendicionanna ti amin a gimong ti Israel: ket ti amin a gimong ti Israel timmacder.

4Ket isu kinunana, Bendito ni Jehova, a Dios ti Israel, isu a nagsao iti ngiwatna ken David nga amac, ket cadagiti imana tinungpalna a kinunana,

5Nanipud iti aldaw a panangaonco iti ilic iti daga nga Egipto, diac nagpili ti ili cadagiti capcaputotan ti Israel a mangputar iti maysa a balay, a pagyanan coma ti naganco; diac met pinili ti uray siasinoman a tao tapno isu ti pangoloen ti ilic nga Israel:

6Ngem pinilic ti Jerusalem, tapno ti naganco adda coma sadiay, ket pinilic ni David tapno agpangolo iti ilic nga Israel.

7Ket adda idi iti puso ni David nga amac ti panamutar iti maysa a balay a maipaay iti nagan ni Jehova, a Dios ti Israel.

8Ngem ni Jehova kinunana ken David nga amac, Agsipud ta adda iti pusom ti panamutar iti maysa a balay a maipaay iti naganco, sica naimbag ti inaramidmo nga adda iti pusom:

9Nupay casta sica saanmonto a putaren ti balay; ngem ti anacmo a rumuarto cadagita lomom, isu putarennanto ti balay a maipaay iti naganco.

10Ket ni Jehova pinasingkedanna ti saona a sinaona; ta siac binangonnac iti saad ni David nga amac, ket agtugawac iti trono ti Israel, a cas incari ni Jehova, ket pinutarco ti balay a maipaay iti nagan ni Jehova, a Dios ti Israel.

11Ket idiay insaadco ti lacasa, a yan ti tulag ni Jehova, nga isu inaramidna cadagiti annac ti Israel.

12Ket isu nagtacder iti sango ti altar ni Jehova iti sango ti amin a gimong ti Israel, ket inyunnatna dagiti imana.

13(Ta ni Salomon inaramidna ti maysa a pagbatayan a ginambangan, lima a sico ti caatiddugna, ken lima a sico ti caacabana, ken tallo a sico ti cangatona, ket incabilna iti tengnga ti paraangan; ket nagtacder iti rabawna, ket imparintumengna dagiti tumengna iti saclang ti amin a gimong ti Israel, ket inyunnatna dagiti imana a nagpalangit);

14Ket kinunana, O Jehova, a Dios ti Israel, awan ti Dios a cas kenca, uray iti langit, uray iti daga; a salimetmetanna ti tulag ken ti kinamanangngaasi cadagiti ad-adipenmo, a magna iti sangom iti amin a pusoda;

15A sinalimetmetam ken adipenmo a ni David nga amac ti incarim kencuana: wen, sica insaom iti ngiwatmo, ken tinungpalmo iti imam, a cas itoy nga aldaw.

16Ita ngarud, O Jehova, a Dios ti Israel, salimetmetam ken adipenmo a David nga amac ti incarim kencuana, a kinunam, Saanto nga agcurang kenca ti maysa a lalaki iti imatangco nga agtugaw iti trono ti Israel, no la ket ta dagiti annacmo aluadanda ti dalanda, a magnada iti lintegco a cas pannagnam iti sangoc.

17Ita ngarud, O Jehova a Dios ti Israel, ipalubosmo a ti saom mapasingkedan coma, isu nga insaom ken adipenmo a David.

18Ngem, agpayso aya a ti Dios makipagnaedto cadagiti tattao iti daga? Adtoy, dagiti langit ken ti langit dagiti langlangit saandaca a malaon; dinto ngarud ad-adda daytoy a balay a pinutarco!

19Nupay casta sica patgam coma ti cararag ti adipenmo, ken ti kiddawenna, O Jehova a Diosco, nga ipangagmo ti asug ken ti cararag a ti adipenmo icararagna iti sangom;

20A dagiti matam silulucatda coma a sumango itoy a balay iti rabii ken iti aldaw, a sumango met laeng iti disso nga isu ti nagcunaam nga icabilmonto ti naganmo idiay; a mangipangag iti cararag a ti adipenmo icararagnanto a sumango iti daytoy a disso.

21Ken ipangagmo ti ar-araraw ti adipenmo, ken ti ilim nga Israel, no isuda agcararagda a sumango ditoy a disso: wen, sica denggem manipud iti pagnaedam, nga manipud met laeng iti langit; ket intono mangngegmo, pacawanem.

22No maysa a tao agbasol iti maicaniwas iti caarrobana, ket maysa a sapata ti maisaad kencuana a pamagsapata kencuana, ket isu umay ket agsapata iti sango ti altarmo ditoy a balay;

23Iti casta denggem manipud langit, ket aramidem, ket ocomem dagiti ad-adipenmo, a dusaem ti nadangkes, a yegmo ti dalanna iti olona met laeng; ken justificarem ti nasingpet, nga isu ti gungunaam a cas ti kinalintegna.

24No ti ilim nga Israel macabil iti sango ti cabusor, ta isuda nagbasolda iti maicaniwas kenca, no isuda agsublida kenca, ket ipudnoda ti naganmo, ket agcararagda ken agpacaasida iti sangom ditoy a balay;

25Sica denggem ngarud manipud langit, ket pacawanem ti basol ti ilim nga Israel, ket ipanmo manen ida iti daga a sica intedmo cadacuada ken cadagiti ammada.

26No dagiti langlangit mapunitanda, ket awan ti tudo, gapu ta isuda nagbasolda iti maicaniwas kenca; no isuda agcararagda a sumango ditoy a disso, ket ipudnoda ti naganmo, ket sumiasida iti basolda, intono parigatem ida:

27Sica denggem ngarud manipud langit, ket pacawanem ti basol dagiti ad-adipenmo, ken ti ilim nga Israel, intono sica isurom cadacuada ti naimbag a dalan a rebbengda a pagnaan; ket agbaonca ti tudo iti dagam, isu nga intedmo iti ilim a pannacatawidna.

28No addanto bisin iti daga, no addanto angol, no addanto kebbet, wenno buot, dudon, wenno arabas; no dagiti cabusorda lacubenda ida iti daga dagiti il-ilida; aniaman a pannaplit, wenno aniaman a sakit nga adda;

29Aniaman a cararag ken aniaman a panagpacaasi nga aramiden ti siasinoman a tao, wenno ti amin nga ilim nga Israel, nga ammoento ti tunggal tao ti saplitna met laeng, ken ti ladingitna met laeng, ket yunnatna dagiti imana a sumango iti daytoy a balay:

30Sica denggem ngarud manipud langit a pagnaedam, ket mamacawanca, ket isupapacmo iti tumunggal tao ti mayanatup iti amin a dalanna, a ti pusona sica pagaammom (ta sica, sica laeng, ti macaammo cadagiti puspuso dagiti annac dagiti tattao);

31Tapno isuda agamangada kenca, a magna cadagiti dalanmo, bayat ti panagbiagda iti daga isu nga intedmo cadagiti ammami.

32Casta met iti maipanggep iti gangannaet, a saan a taga ilim nga Israel, no umay manipud iti daga nga adayu a gapu iti naindaclan a naganmo, ken ti mannacabalin nga imam, ken ti tackiagmo a siuunnat, intono umay ket agcararag a sumango ditoy a balay;

33Denggem ngarud manipud langit, a manipud met laeng iti pagnaedam, ket aramidem ti mayannurot iti amin a dawaten kenca ti gangannaet; tapno amin dagiti umili iti daga maammoanda iti naganmo, tapno agamangada kenca, a cas ti ilim nga Israel; ken tapno isuda maammoanda a daytoy a balay a pinutarco isu ti magaladan iti naganmo.

34No ti ilim rumuar iti paggugubatan a maibusor cadagiti cabusorda, iti uray sadino a pangibaonam cadacuada, ket isuda cumararagda kenca a sumango iti ili a pinilim, ken sumango iti balay a pinutarco a maipaay iti naganmo;

35Sica denggem ngarud manipud langit ti cararagda ken ti ararawda, ket saranayem ti calinteganda.

36No isuda agbasolda iti maicaniwas kenca (ta awan ti tao a di macabasol), ket sica agungetca cadacuada, ket yawatmo ida iti cabusor, tapno ipanda ida a kinayawan iti maysa a daga, adayu man wenno asideg;

37Nupay casta no isuda met laeng agpanunutda idiay daga a pacaipananda a cayaw, ket sumiasida, ket umararawda kenca idiay daga a nacacayawanda a cunada, Dacami nagbasolcami, nagaramidcami a sidadangkes, ket dacami nagaramidcami iti kinadakes;

38No isuda agsublida kenca iti amin a pusoda ken iti amin a cararuada idiay daga a nacacayawanda, iti disso a nangipananda cadacuada a nacayawan, ket cumararagda kenca a sumangoda iti dagada, isu nga intedmo cadagiti ammada, ken ti ili a sica pinilim, ken iti balay a pinutarco a maipaay iti naganmo:

39Sica denggem ngarud ti cararagda ken dagiti ararawda manipud langit, manipud met laeng iti pagnaedam, ket saranayem ti calinteganda, ket pacawanem ti ilim isu a nagbasol iti maicaniwas kenca.

40Ita, O Diosco, gumawawaac kenca, silulucatda coma dagiti matamken dagiti lapayagmo a siimdeng coma iti cararag a maaramid iti daytoy a disso.

41Ita ngarud bumangonca, O Jehova Dios, dita paginanaam, sica, ken ti lacasa ti pigsam: dagiti papadim, O Jehova Dios, macawesanda coma iti pannacaisalacan, ket dagiti sasantom agrag-oda coma iti kinaimbag.

42O Jehova Dios, dica tallicudan ti rupa ti pinulotam, laglagipem dagiti kinamanangngaasim ken David nga adipenmo.

← Chapter 5 Jump to: Chapter 7 →