2 Chronicles 24

Ilokano (Ti Biblia (1973))

← Chapter 23 Jump to: Chapter 25 →

1Ket ni Joas agtawen iti pito idi nangrugi a nagari; ket nagari bayat iti uppat a pulo a tawen idiay Jerusalem: ket ti nagan ni inana Sebia a taga Beer-seba.

2Ket ni Joas inaramidna daydi a nalinteg cadagiti mata ni Jehova iti isu-amin nga al-aldaw ni Joiada a padi.

3Ket ni Joiada innalana a maipaay kencuana ti dua nga assawa; ket pinutotna dagiti annac a lallaki ken babbai.

4Ket calpasan daytoy naaramid a ni Joas pinanggepna a patarimaan ti balay ni Jehova.

5Ket inurnongna dagiti papadi ken Levitas, ket kinunana cadacuada, Incayo cadagiti il-ili ti Juda ket urnongenyo iti amin nga Israel ti cuarta tapno mapatarimaan ti balay ti Diosyo iti tinawentawen; ket kitaenyo ta padarasen ti panggep. Nupay casta dagiti Levitas saanda a pinadaras.

6Ket ti ari inayabanna ni Joiada a pangolo, ket kinunana kencuana, Apayapay saanmo nga impapilit cadagiti Levitas ti panangalada iti Juda ken iti Jerusalem ti pagpabuis ni Moises nga adipen ni Jehova, ken agtaud iti gimong ti Israel a maipaay iti tolda ti pammanecnec?

7Ta dagiti annac a lallaki ni Atalia, daydi dakes a babai, dinupracda idi ti balay ti Dios; ket casta met dagiti amin a naipaay a banbanag iti balay ni Jehova impaayda cadagiti Baales.

8Iti casta ti ari nagbilin, ket inaramidda ti maysa a lacasa, ket incabilda iti ruar idiay ruangan ti balay ni Jehova.

9Ket nangiwarragawagda iti Juda ken idiay Jerusalem, a mayeg coma ken Jehova ti buis, a ni Moises nga adipen ti Dios impatayna iti Israel idiay let-ang.

10Ket amin dagiti pangpangoloen ken amin dagiti tattao nagrag-oda, ket insangpetda, ket nagipisocda iti lacasa, inggana iti dida ginibusan.

11Ket castoy idi iti uray ania a tiempo a ti lacasa naiyeg cadagiti pagakemen ti ari a gapu iti ima dagiti Levitas, ket idi nakitada nga adu unay ti cuarta, a ti escriba ti ari ken ti agakem iti cangatoan a padi immayda ket iccatenda ti nagyan iti lacasa, ket innalada, ket impanda manen iti dissona. Casta ti inaramidda iti inaldaw-aldaw, ket inurnongda ti cuarta a nawadwad.

12Ket ti ari ken ni Joiada intedda cadagidiay nga agaramid idi ti panagannong iti balay ni Jehova; ket tinangdananda dagiti agcavcaviti ken al-allawagi a mangtarimaan iti balay ni Jehova, ken casta met dagidiay nga agpanpanday iti landoc ken gambang a maitarimaan iti balay ni Jehova.

13Iti casta dagiti agtartrabajo nagaramidda, ken ti aramid a panangtarimaan rimmang-ay cadagiti imimada, ket pinatacderda manen ti balay ti Dios iti casasaadna, ket pinalagdada.

14Ket idi nalpasda impanda ti natda a cuarta iti sango ti ari ken ni Joiada, ket iti dayta naaramid dagiti al-alicamen a maipaay ti balay ni Jehova, dagiti met laeng al alicamen a pangannong ken pagidatag, ken cuchara, ken al-alicamen a balitoc ken pirac. Ket indatagda dagiti datdaton a mapuuran iti balay ni Jehova a cancanayon cadagiti amin nga al-aldaw ni Joiada.

15Ngem ni Joiada limmacay ket napnoan cadagiti al-aldaw, ket natay; isu agtawen iti sangagasut ket tallopulo a tawen idi natay.

16Ket isu intabonda iti ili ni David iti nagtetengngaan dagiti ar-ari, agsipud ta nagaramid iti naimbag iti Israel, ken maipapan iti Dios ken ti balayna.

17Ket calpasan ti ipapatay ni Joiada immay dagiti pangoloen ti Juda, ket nagrucbabda iti ari. Idin ti ari impangagna ida.

18Ket binaybay-anda ti balay ni Jehova, a Dios dagiti ammada, ket nagservida, cadagiti Ashera ken cadagiti ladladawan a kinitikitan ket ti pungtot immapay iti Juda ken iti Jerusalem gapu iti daytoy a babacda.

19Nupay casta imbaonna cadacuada dagiti mammadto a mangpasubli cadacuada manen ken Jehova; ket pinanecnecanda ti maibusor cadacuada, ngem saanda nga impangag.

20Ket ti Espiritu ti Dios immay ken Zacarias nga anac a lalaki ni Joiada a padi; ket isu nagtacder iti ngatoen dagiti tattao, ket kinunana cadacuada, Castoy ti cuna ti Dios, Apayapay salungasingenyo dagiti bilbilin ni Jehova, iti casta dicayo mabalin ti rumang-ay? agsipud ta binay-anyo ni Jehova, isu binaybay-annacayo met.

21Ket bimmusorda kencuana, ket inuborda cadagiti batbato a mayannurot iti bilin ti ari idiay paraangan ti balay ni Jehova.

22Castoy ni Joas nga ari saanna a malagip ti kinaimbag a ni Joiada nga amana inaramidna kencuana, no di ket pinatayna ti anacna. Ket idi nga isu natay kinunana, Jehova kitaem, ket isu ti sapulem.

23Ket naaramid iti tapus ti tawen a ti buyot dagiti Sirios simmang-atda a maibusor kencuana: ket napanda idiay Juda ken idiay Jerusalem, ket dinadaelda dagiti amin a pangpangoloen dagiti umili iti nagtetengngaan dagiti tattao, ket impawitda ti amin a nasamsamsam cadacuada iti ari sadi Damasco.

24Ta ti buyot dagiti Sirios immay a bassit a bunggoy dagiti tattao; ket ni Jehova inyawatna ti dackel unay a buyot cadagiti imada, gapu ta binay-anda ni Jehova, a Dios dagiti ammada. Iti casta tinungpalda ti panangocom ken Joas.

25Ket idi pimmanawda kencuana (ta imbatida a masakit unay), dagiti ad-adipenna met laeng bimmusorda kencuana gapu iti dara dagiti annac a lallaki ni Joiada a padi, ket pinatayda iti iddana, ket isu natay; ket intabonda idiay ili ni David, ngem isu saanda nga intabon cadagiti tantanem dagiti ar-ari.

26Ket dagitoy isuda dagidi bimmusor kencuana: da Zabad nga anac a lalaki ni Simat nga Ammonita, ken Jozabad nga anac a lalaki ni Simrit a Moabita.

27Ket maipapan cadagiti annacna a lallaki, ken ti cadackel dagiti aw-awit a naipabaclay kencuana, ken ti pannacaipatacder manen ti balay ti Dios, adtoy naisuratda iti panglawlawag iti libro dagiti ar-ari. Ket ni Amasias nga anacna a lalaki nagari iti saadna.

← Chapter 23 Jump to: Chapter 25 →