2 Chronicles 29

Ilokano (Ti Biblia (1973))

← Chapter 28 Jump to: Chapter 30 →

1Ni Ezekias nangrugi a nagari idi agtawen iti duapulo ket lima; ket nagari idiay Jerusalem bayat iti duapulo ket siam a tawen: ket ti nagan ni inana Abia, nga anac a babai ni Zacarias.

2Ket inaramidna daydi a nalinteg cadagiti mata ni Jehova, cas mayalubog cadagiti isu-amin nga inaramid ni amana a David.

3Iti umuna a tawen ti panagarina, iti umuna a bulan, linuctanna dagiti ruangan ti balay ni Jehova, ket pinatarimaanna ida.

4Ket impastrecna dagiti papadi ken Levitas, ket inurnongna ida iti nalawa a disso iti daya.

5Ket kinunana cadacuada, Denggendac, dacayo a Levitas; ita santificarenyo dagiti bagiyo met laeng, ket santificarenyo ti balay ni Jehova, a Dios dagiti ammayo, ket ipanyo ti kinarugit iti ruar ti nasantoan a disso.

6Ta dagiti ammatayo simmalungasingda, ket inaramidda daydi a dakes iti imatang ni Jehova a Diostayo, ket isu binaybay-anda, ket imbawingda dagiti rupada iti nagtaengan ni Jehova, ket timmallicudda.

7Casta met inrikepda dagiti ruangan ti balcon, ket ineddepda dagiti pagsilawan, ket saanda a pinuuran ti incienso wenno indatag dagiti datdaton a mapuuran iti nasantoan a disso iti Dios ti Israel.

8Gapuna a ti pungtot ni Jehova adda idi iti rabaw ti Juda ken ti Jerusalem, ket isu inyawatna ida a mayallaalla, tapno agbalinda a maysa a pacasdaawan, ket maysa a pagsanamtican, a cas makitayo cadagiti matayo.

9Ta, adtoy, dagiti ammatayo napasagda iti campilan, ken dagiti annactayo a lallaki ken babbai ken dagiti assawatayo nacayawanda a maipanggep itoy.

10Ita ipapusoc ti makitulag ken Jehova, a Dios ti Israel, tapno ti narungsot a pungtotna maipanaw coma cadatayo.

11Annacco, saancayo coma a naliway; ta ni Jehova pinilinacayo nga agtacder iti sangona, nga agannong kencuana, ken tapno dacayo coma dagiti ministrosna, ken puuranyo ti incienso.

12Idin dagiti Levitas nagtacderda, da Mahat nga anac a lalaki ni Amasai, ken Joel nga anac a lalaki ni Azarias, cadagiti annac dagiti Coatitas; ken dagiti annac ni Merari, da Kis nga anac a lalaki ni Abdi, ken Azarias nga anac a lalaki ni Jehaleleel; ken cadagiti Gersonitas, da Joa nga anac a lalaki ni Zimma, ken Eden nga anac a lalaki ni Joa;

13Ken cadagiti annac a lallaki ni Elisafan, da Simri ken Jehiel; ken cadagiti annac a lallaki ni Asaf, da Zacarias ken Matanias;

14Ken cadagiti annac a lallaki ni Heman, da Jehiel ken Simi; ken cadagiti annac a lallaki ni Jedutun, da Semeias ken Uzziel.

15Ket inurnongda dagiti cacabsatda, ket sinantificarda dagiti bagida met laeng, ket simrecda a mayannurot iti bilin ti ari iti pannacaaramat dagiti sasao ni Jehova, tapno dalusanda ti balay ni Jehova.

16Ket dagiti papadi simrecda iti akinuneg a paset ti balay ni Jehova, tapno dalusanda, ket inruarda ti amin a kinarugit a nasaracanda iti templo ni Jehova agingga iti paraangan ti balay ni Jehova. Ket dagiti Levitas innalada, tapno ipanda idiay waig a Cedron.

17Ngarud nangrugida iti umuna nga aldaw ti umuna a bulan a nangsantificar, ket iti maicawalo nga aldaw ti bulan dimmanonda iti balcon ni Jehova; ket sinantificarda ti balay ni Jehova bayat iti walo nga aldaw: ket iti maicasangapulo ket innem nga aldaw ti umuna a bulan nalpasdan.

18Idin napanda ken Ezekias nga ari iti uneg ti palacio, ket kinunada, Dacami dinalusanmi ti amin a balay ni Jehova, ken ti altar a maipaay iti daton a mapuuran agraman cadagiti amin nga al-alicamenna, ken ti lamesaan ti tinapay ti pamarang agraman cadagiti amin nga al-alicamenna.

19Maysa pay amin dagiti al-alicamen, a ni ari Acaz iti panagarina imbellengna idi simmalungasing, insaganami ken sinantificarmi; ket, adtoy, addada iti sango ti altar ni Jehova.

20Idin ni Ezekias nga ari bimmangon a masapa, ket inurnongna dagiti pangpangoloen ti ili, ket simmang-atda iti balay ni Jehova.

21Ket inyegda ti pito a vaca a lallaki, ken pito a carnero a lallaki, ken pito a cordero, ken pito a calding a lallaki a maipaay a daton gapu iti basol gapu iti pagarian ken gapu iti santuario ken gapu iti Juda. Ket binilinna dagiti papadi nga annac a lallaki ni Aaron a mangidatag cadacuada iti rabaw ti altar ni Jehova.

22Iti casta pinatayda dagiti vacvaca a lallaki, ket dagiti papadi innalada ti dara, ket inwarsida iti rabaw ti altar: ket pinatayda dagiti carnero a lallaki: ket inwarsida ti dara iti rabaw ti altar: pinatayda met dagiti cordero, ket inwarsida ti dara iti rabaw ti altar.

23Ket inyasidegda dagiti calding a lallaki a maipaay iti daton gapu iti basol iti sango ti ari ken ti gimong; impatayda dagiti imimada cadagidiay.

24Ket dagiti papadi pinatayda ida, ket inaramidda ti daton gapu ti basol iti dara iti rabaw ti altar, tapno agaramid iti pangabbong gapu iti amin nga Israel; ta ti ari imbilinna a ti daton a mapuuran ken ti daton gapu iti basol maaramidda coma gapu iti amin nga Israel.

25Ket insaadna dagiti Levitas iti balay ni Jehova agraman cadagiti piangpiang, agraman salsalterio ken agraman ar-arpa a mayalubog iti bilin ni David ken ni Gad a macakita iti masacbayan ti ari, ken ni Natan a mammadto; ta ti bilin naggapu ken Jehova iti pannacaaramat dagiti mammadto.

26Ket dagiti Levitas nagtacderda agraman cadagiti ig-igam ni David, ken dagiti papadi agraman cadagiti tororot.

27Ket ni Ezekias imbilinna ti panagidatag ti daton a mapuuran iti rabaw ti altar. Ket idi nairugi ti daton a mapuuran, nairugi met ti canta ken Jehova, ken dagiti tororot agraman pay cadagiti ig-igam ni David nga ari ti Israel.

28Ket ti amin a gimong nagcararag, ken dagiti cumacanta nagcantada, ken dagiti managtortororot nagpagunida; amin daytoy naituloy agingga iti nalpas ti daton a mapuuran.

29Ket idi nalpasda a nangidatag ti ari ken ti amin nga adda a naitallaong kencuana nagrucbabda ken nagcararagda.

30Maysa pay ni Ezekias nga ari ken dagiti pangpangoloen imbilinda cadagiti Levitas a cantaenda dagiti pangdayaw ken Jehova agraman cadagiti sasao da David, ken ni Asaf a macakita iti masacbayan. Ket kinantada dagiti panagdayaw a siraragsac, ket nagrucnoyda ket nagcararagda.

31Idin ni Ezekias simmungbat ket kinunana, Ita kinonsagraryon dagiti bagiyo met laeng ken Jehova; umadanicayo ken yegyo dagiti sacrificio ken datdaton a pagyaman iti balay ni Jehova. Ket ti gimong inyegda dagiti sacrificio ken datdaton a pagyaman; ket isu-amin a naaddaan iti puso a siaayat inyegda dagiti datdaton a mapuuran.

32Ket ti bilang dagiti datdaton a mapuuran nga inyeg ti gimong pitopulo a vaca a lallaki, sangagasut a carnero a lallaki, ken dua gasut a cordero: amin dagitoy naipaayda a daton a mapuuran ken Jehova.

33Ket ti naipaay idi innem a gasut a vacvaca a lallaki ken tallo ribu a carcarnero.

34Ngem dagiti papadi nakirangda, iti casta dida umanay a manglalat coma cadagiti amin a datdaton a mapuuran gapuna a dagiti cacabsatda a Levitas timmulongda cadacuada agingga iti nalpas ti aramid, ken agingga iti sinantificar dagiti papadi dagiti bagida met laeng; ta dagiti Levitas nalinlintegda iti puso a mangsantificar cadagiti bagida met laeng ngem dagiti papadi.

35Ket dagiti datdaton a mapuuran nawadwadda, agraman iti taba dagiti datdaton ti cappia, ken agraman cadagiti datdaton a mainum a maipaay iti tunggal daton a mapuuran. Iti casta ti panagannong iti balay ni Jehova naornos idi.

36Ket ni Ezekias nagragsac, ken castamet amin a tattao, gapu iti daya a sinagana ti Dios a maipaay iti umili; ta ti banag naaramid idi a sikekel-laat.

← Chapter 28 Jump to: Chapter 30 →