2 Chronicles 32

Ilokano (Ti Biblia (1973))

← Chapter 31 Jump to: Chapter 33 →

1Calpasan dagitoy a banbanag, ken daytoy a kinamapagtalcan, immay ni Sennakerib nga ari ti Asiria ket simrec idiay Juda, ket nagpacarso a maibusor cadagiti il-ili a nasarikedkedan, ket impapanna nga abakenna ida a maipaay kencuana met laeng.

2Ket idi ni Ezekias nakitana a ni Sennakerib immayen, ket isu panggepenna idi ti makigubat a maibusor iti Jerusalem.

3Isu nakibinnalacad cadagiti pangpangoloen ken lallakina a mamaingel, tapno pasardengenda coma dagiti dandanum iti ubbog nga adda idi iti ruar ti ili, ket isu tinulonganda.

4Iti casta naurnong ti adu a tattao, ket pinasardengda dagiti amin nga ub-ubbog ken waig a nagayus iti tengnga ti daga, a kinunada, Apay aya nga umay coma dagiti ar-ari ti Asiria, ket masaracanda ti adu a danum?

5Ket isu immingel, ket binangonna ti amin a bacud a narba idi, ket impangatona agingga cadagiti tortorre, ken sabali a bacud iti ruar, ket pinalagdana ti Millo iti ili ni David, ket inaramidna dagiti ig-igam ken cal-calasag a nawadwad.

6Ket insaadna dagiti capcapitan ti gubat iti ngatoen dagiti tattao, ket inurnongna ida kencuana iti nalawa a disso idiay ruangan ti ili, ket nagsao a sililiwliwa cadacuada a kinunana.

7Bumilegcayo ken umingelcayo a naimbag, dicayo agbuteng wenno agcullayaw gapu iti ari ti Asiria, wenno gapu iti amin a caadu nga adda kencuana, ta adda dacdackel cadatayo, ngem ti adda kencuana:

8Kencuana adda maysa a tackiag a linalasag; ngem cadatayo adda ni Jehova a Diostayo a tumulong cadatayo, ken gumubat cadagiti gubgubattayo. Ket dagiti tattao nagtalecda cadagiti sasao ni Ezekias nga ari ti Juda.

9Calpasan daytoy ni Sennakerib nga ari ti Asiria imbaonna dagiti ad-adipenna idiay Jerusalem (adda idi iti sango ti Lakis, ket amin a pannacabalinna iti yanna), ken Ezekias nga ari ti Juda nga adda idi idiay Jerusalem, a kinunana,

10Castoy ti cuna ni Sennakerib nga ari ti Asiria, Ania ti pagtalcanyo tapno agtaengcayo iti pannacalacub ti Jerusalem?

11Saan aya nga uyutannacayo ni Ezekias, tapno iyawatnacayo a matay gapu iti bisin ken waw, a cunaenna, Ni Jehova a Diostayo ispalennatayto iti ima ti ari ti Asiria?

12Saan aya nga isu met laeng nga Ezekias ti nangiccat cadagiti nangato a disdissona ken al-altarna, ket binilinna ti Juda ken Jerusalem, a kinunana, Agcararagcayto iti sango ti maymaysa nga altar ken iti rabaw dayta puuranyonto ti incienso?

13Saanyo nga ammo aya no ania ti inaramidmi, siac ken dagiti ammac, cadagiti amin a tattao cadagiti dagdaga? Dagiti didios dagiti nasnacion dagiti dagdaga nacabalinda aya a nangispal uray casano iti dagada iti imac?

14Siasino aya cadagiti amin a didios dagidiay a nasnacion a dinadael nga inkisap dagiti ammac ti nacabalin a nangispal iti ilina iti imac, tapno ti Diosyo ispalennacayo iti imac?

15Ita ngarud dicayo palubosan ni Ezekias a mangallilaw cadacayo, wenno manguyut cadacayo iti castoy a wagas, isu dicayo met patien; ta awan ti dios ti uray ania a nacion wenno pagarian a nacabalin a nangispal ti ilina iti imac, ken iti ima dagiti ammac: casanonto cabassit ti panangispalna cadacayo ti Diosyo cadagiti imac?

16Ket dagiti ad-adipenna nagsaoda iti ad-adu pay a maibusor ken Jehova a Dios, ken maibusor ken adipenna nga Ezekias.

17Isu nagsurat met cadagiti sursurat, tapno rabngisenna ni Jehova, a Dios ti Israel, ken tapno isu ti nagsasawanna, a kinunana, A cas cadagiti didios dagiti nasnacion dagiti dagdaga a saanda a naisalacan ti ilida iti imac, casta met ti Dios ni Ezekias dinanto maisalacan ti ilina iti imac.

18Ket nagpuccawda iti natbag a timec iti pagsasao dagiti Judios cadagiti tattao ti Jerusalem nga adda idi iti rabaw ti bacud tapno pagbutngenda ida, ken mangriribuc cadacuada; tapno alaenda coma ti ili.

19Ket nagsaoda iti maipapan iti Dios ti Jerusalem a cas maipapan cadagiti didios dagiti il-ili ti lubong, nga isuda dagiti aramid dagiti imima dagiti tattao.

20Ket ni Ezekias nga ari ken ni Isaias a mammadto nga anac a lalaki ni Amos nagcararagda a gapu itoy, ket nagickisda iti langit.

21Ket ni Jehova imbaonna ti maysa nga angel, isu a nangdadael cadagiti amin a lallaki a mannacabalin ken mamaingel, ken dagiti mangidaldalan ken capcapitan idiay pacarso ti ari ti Asiria. Iti casta isu nagsubli a sibabain ti rupana agingga iti dagana met laeng. Ket idi dimteng iti balay ti diosna, dagiti nagtaud idi iti unegna met laeng, isu pinatayda sadiay iti campilan.

22Iti casta ni Jehova inispalna ni Ezekias ken dagiti agnaed idi idiay Jerusalem ken dagiti agnaed idi idiay Jerusalem iti ima ni Sennakerib nga ari ti Asiria, ken iti ima dagiti amin a sabsabali, ken nangidalan cadacuada iti tunggal sikigan.

23Ket aduda a nangyeg cadagiti sagsagut ken Jehova idiay Jerusalem, ken napateg a cucua ken Ezekias nga ari ti Juda; iti casta isu ti naitan-oc, iti imatang dagiti amin a nasnacion nanipud iti daydi a tiempo.

24Cadagidiay nga al-aldaw ni Ezekias nagsakit iti ipatay: ket nagcararag ken Jehova; ket isu nagsao kencuana, ket intedna kencuana ti maysa a tanda.

25Ngem ni Ezekias saan a nagsubad cas mayannurot iti imbag a naaramid kencuana ta ti pusona nagpalangguad gapuna nga adda idi pungtot a maicanniwas kencuana, ken maicanniwas iti Juda ken Jerusalem.

26Nupay casta ni Ezekias nagpacumbaba maipaan iti kinatangsit ti pusona, isu ken dagiti agnaed idiay Jerusalem nga agpadpada, iti casta ti pungtot ni Jehova saan nga immay cadacuada cadagiti aldaw ni Ezekias.

27Ket ni Ezekias naaddaan iti napalalo a kinawadwad ti kinabacnang ken dayaw: ket isu insaganana dagiti paggamengan a maipaay iti pirac, ken maipaay iti balitoc, kenmaipaay cadagiti napateg a batbato, ken maipaay cadagiti recrecado, ken maipaay cadagiti calcalasag, ken maipaay cadagiti amin a kita dagiti nasayaat nga al-alicamen;

28Balbalay met a pagidulinan ti apit dagiti bucbukel ken baro nga arac ken lana; ken pagtaengan dagiti amin a kita nga an-animal, ken pangyaponan cadagiti carcarnero.

29Maysa pay insaganana dagiti il-ili, ken cucua a pangpangen ken ar-arban a nawadwad; ta ti Dios intedna idi kencuana dagiti adu unay a cucua.

30Daytoy met laeng nga Ezekias pinasardengna met ti akinngato nga ubbog dagiti dandanum ti Gihon, ket indalanna ida iti baba iti akinlaud a bangir ti ili ni David. Ket ni Ezekias rimmang-ay cadagiti amin nga ar-aramidna.

31Nupay casta ti panggep dagiti emembajador dagiti pangpangoloen ti Babilonia, isuda a naibaon kencuana nga umintuud ti maipapan iti nacascasdaaw a maaramid iti daga, isu binaybay-an ti Dios tapno suutenna, tapno ammoenna coma ti amin nga adda iti pusona.

32Ket ti matda cadagiti ar-aramid ni Ezekias ken cadagiti naimbag nga ar-aramidna, adtoy, naisuratda iti sirmata ni Isias a mammadto nga anac a lalaki ni Amos, iti libro dagiti ar-ari ti Juda ken Israel.

33Ket ni Ezekias nakiturog cadagiti ammana, ket isu intabonda iti casang-atan dagiti tantanem dagiti annac ni David; ket amin a Juda ken dagiti agnaed idi idiay Jerusalem inaramidda kencuana ti pammadayaw iti ipapatayna. Ket ni Manases nga anacna a lalaki nagari iti saadna.

← Chapter 31 Jump to: Chapter 33 →