2 Chronicles 30

Ilokano (Ti Biblia (1973))

← Chapter 29 Jump to: Chapter 31 →

1Ket ni Ezekias nagbaon iti amin nga Israel ken Juda, ken nagsurat met cadagiti sursurat iti Efraim ken Manases, tapno umayda coma iti balay ni Jehova idiay Jerusalem a mangsalimetmet iti pascua ken Jehova, a Dios ti Israel.

2Ta ti ari nabalacadan, ken amin a pangpangoloenna, ken amin a gimong idiay Jerusalem, a mangsalimetmet ti pascua iti maicadua a bulan.

3Ta saanda a nacasalimetmet iti daydi a tiempo, agsipud ta dagiti papadi saanda idi a sinantificar dagiti bagida met laeng iti naananay a bilang, ket dagiti tattao saanda met a naguornong idi idiay Jerusalem.

4Ket ti banag nalinteg idi cadagiti mata ti ari ken ti amin a gimong.

5Iti casta pinasingkedanda ti maysa a pangeddeng a mangiwarragawag iti amin nga Israel, manipud Beer-seba agingga met laeng iti Dan, nga umayda coma mangsalimetmet ti pascua ken Jehova, a Dios ti Israel, idiay Jerusalem: ta saanda idi a sinalimetmetan iti nabayagen iti cas ti wagas a cas adda a naisurat.

6Iti casta dagiti nangorreo intugotda dagiti sursurat a naggapu iti ari ken cadagiti pangpangoloenna a mapan iti amin nga Israel ken Juda, ken mayannurot iti bilin ti ari, a kinunada, Dacayo nga annac ti Israel, agsublicayo ken Jehova, a Dios da Abraham, Isaac, ken ni Israel, tapno isu agsubli cadagiti natda cadacayo a nacatalaw cadagiti ima dagiti ar-ari ti Asiria.

7Ket saancayo coma a cas la cadagiti ammayo, ken cas la cadagiti cacabsatyo, a simmalungasing ken Jehova, ti Dios dagiti ammada, iti casta isu inyawatna ida iti pannacalangalang a cas makitayo.

8Ita saanyo coma a patangkenen dagiti teltelyo, a cas cadagiti ammayo; no di ket agtuloccayo ken Jehova, ket sumreccayo iti santuariona, isu a sinantificarna iti agnanayon, ket agservicayo ken Jehova a Diosyo, tapno ti narungsot a pungtotna maipanaw cadacayo.

9Ta no agsublicayo ken Jehova, dagiti cacabsatyo ken annacyo masaracandanto ti asi iti sango dagidiay a nangayaw cadacuada, ket umaydanto manen iti daytoy a daga: ta ni Jehova a Diosyo naparabur ken naasi, ket saannanto nga itallicod ti rupana cadacayo, no agsublicayo kencuana.

10Iti casta dagiti nangorreo limmabasda iti inilinili iti daga ti Efraim ken Manases, agingga met laeng iti Zabulon: ngem kinatawaanda ida nga inab-abi, ket inuyuyawda ida.

11Nupay casta ti dadduma cadagiti lallaki ti Aser ken Manases ken Zabulon nagpacumbabada, ket napanda idiay Jerusalem.

12Casta met nga iti rabaw ti Juda immay ti ima ti Dios a nangipaay cadacuada a sangsangcanakem, tapno tungpalenda ti bilin ti ari ken dagiti pangpangoloen iti pannacaaramat ti sao ni Jehova.

13Ket naguornong idiay Jerusalem ti adu unay a tattao a mangsalimetmet iti fiesta ti tinapay nga awan levadurana iti maicadua a bulan, maysa a dackel unay a gimong.

14Ket bimmangonda ket iniccatda dagiti al-altar nga adda idi idiay Jerusalem, ken amin nga al-altar a maipaay iti incienso iniccatda, ket impalladawda ida iti waig a Cedron.

15Idin pinartida ti pascua iti maicasangapulo ket uppat nga aldaw ti maicadua a bulan: ket dagiti papadi ken Levitas nagbainda ket sinantificarda dagiti bagida met laeng, ket inyegda dagiti datdaton a mapuuran iti balay ni Jehova.

16Ket nagtacderda iti disoda a mayalubog iti ornosda, mayannurut iti linteg ni Moises a lalaki ti Dios: dagiti papadi inwarsida ti dara nga inawatda iti ima dagiti Levitas.

17Ta adu idi iti gimong ti saan a nangsantificar cadagiti bagida met laeng: gapuna a dagiti Levitas inannongda iti panangaywan iti panangparti cadagiti pascua a maipaay iti tunggal maysa a saan a nadalus, tapno pasantificarenda ida ken Jehova.

18Ta umariwecwec dagiti tattao, adu met laeng ti Efraim ken Manases, Issacar ken Zabulon, sawanda idi a dinalusan dagiti bagida met laeng, nupay casta kinnanda ti pascua iti sabali a wagas a saan a cas iti adda a naisurat, Ta ni Ezekias incararaganna ida, a kinunana, Ti naimbag nga Jehova pacawanenna coma ti tunggal maysa.

19Nga ipapusona ti panagsapulna iti Dios, ni Jehova a Dios dagiti ammami, nupay no saan a nadalusan a mayannurot iti pannacadalus ti santuario.

20Ket ni Jehova impangagna ni Ezekias, ket inagasanna dagiti tattao.

21Ket dagiti annac ti Israel nga adda idiay Jerusalem sinalimetmetanda ti fiesta ti di-nalevaduraan a tinapay bayat iti pito nga aldaw a binuyog ti dackel a ragsac; ket dagiti Levitas ken papadi dinaydayawda ni Jehova iti inaldawaldaw, a nagcancantada a binuyog dagiti ig-igam a natbag ken Jehova,

22Ket ni Ezekias nagsao a sililiwliwa cadagiti amin a Levitas nga addaan idi naimbag a pannacaawat iti panagannong ken Jehova. Iti casta nanganda iti bayat ti fiesta a pito nga aldaw, nga indatdatagda dagiti sacrificio dagiti datdaton ti cappia, ken nagipudnoda ken Jehova, a Dios dagiti ammada.

23Ket ti amin a gimong nabalacadanda a mangsalimetmet iti sabali a pito nga aldaw, ket sinalimetmetanda iti sabali a pito nga aldaw a binuyog ti ragsac.

24Ta ni Ezekias nga ari ti Juda intedna idi iti gimong a maipaay a datdaton ti sangaribu a vacvaca a lallaki ken pito ribu a carcarnero; ket dagiti pangpangoloen intedda iti gimong ti sangaribu a vacvaca a lallaki ken sangapulo ribu a carcarnero: ket maysa a dackel a bilang dagiti papadi sinantificarda dagiti bagida met laeng.

25Ket ti amin a gimong ti Juda, agraman cadagiti papadi ken Levitas, ken iti amin a gimong nga immay a naggapu iti Israel, ken cadagiti gangannaet nga immay a naggapu iti daga ti Israel, ket nagnaedda iti Juda, nagrag-oda.

26Iti casta dackel ti rag-o idi idiay Jerusalem; ta nanipud iti tiempo ni Salomon nga anac a lalaki ni David nga ari ti Israel awan idi ti casta idiay Jerusalem.

27Idin dagiti papadi ken Levitas timmacderda ket binendicionanda dagiti tattao: ket ti timecda naipangag, ket ti cararagda dimmanon iti nasantoan a pagtaenganna, agingga met laeng sadi langit.

← Chapter 29 Jump to: Chapter 31 →