2 Chronicles 20

Ilokano (Ti Biblia (1973))

← Chapter 19 Jump to: Chapter 21 →

1Ket naaramid iti calpasan daytoy, a dagiti annac ti Moab, ken dagiti annac ti Ammon, ken cacayongda ti dadduma cadagiti Ammonitas immayda nakigubat a maibusor ken Josafat.

2Idin immay ti dadduma nga imbagada ken Josafat a kinunada, Umayen ti umariwecwec a maibusor kenca naggapu iti ballasiw ti baybay nanipud iti Siria; ket adtoy, addada idiay Hasason-tamar (isu ti Engedi met laeng).

3Ket ni Josafat nagbuteng, ket impamaysana ti bagina nga agsapul ken Jehova; ket inwarragawagna ti maysa a panagayunar iti amin a Juda.

4Ket ti Juda naguornongda a sangsangcatipon nga agsapul iti badang nga aggapu ken Jehova: naggapu met laeng cadagiti amin nga il-ili ti Juda immayda a nagsapul ken Jehova.

5Ket ni Josafat nagtacder iti gimong ti Juda ken Jerusalem idiay balay ni Jehova, iti sango ti baro a paraangan;

6Ket kinunana, O Jehova, a Dios dagiti ammami, saanca aya a Dios sadi langit? ket saanca aya nga agturay cadagiti amin a pagarian dagiti nasnacion? ket ti imam napigsa ken mannacabalin, tapno awan ti macabalin a sumcad kenca.

7O Diosmi, saanmo aya a pinagtalaw dagiti agnaed itoy a daga iti sango ti ilim nga Israel, ket intedmo cadagiti putot ni Abraham a gayyemmo iti agnanayon?

8Ket isuda nagnaedda kencuana ket imbangonandaca kencuana ti maysa a santuario gapu iti naganmo, a kinunada,

9No ti dakes dumteng cadacami, ti campilan, ti pannacaocom, wenno ti angol, wenno ti bisin, agtacdercamto iti sango iti daytoy a balay, ken iti sangoanam (ta ti naganmo adda iti daytoy a balay), ket umkiscamto kenca iti pacarigatanmi, ket sica denggemto ket ispalennacamto.

10Ket ita, adtoy, dagiti annac ti Ammon, ken Moab, ken bantay Seir, isuda a saanmo a pinalubosan idi a sillongen ti Israel, idi rimmuarda iti daga ti Egipto, no di ket binay-anda ida, ket saanda ida a dinadael;

11Adtoy, ti pannangsubalitda cadacami, ta umaydacami pagtalawen iti cucuam nga intedmo cadacami a tawiden.

12O Diosmi, saanmonto aya ida nga ocomen? ta awan ti pannacabalinmi a bumusor itoy dackel a buyot nga umay a maibusor cadacami; dicami met ammo no ania coma ti aramidenmi: no di ket dagiti matami addada a situturong kenca.

13Ket amin a Juda nagtacder iti sangoanan ni Jehova, agraman cadagiti babassitda, dagiti assawada, ken dagiti annacda.

14Idin immapay ti Espiritu ni Jehova ken Jahaziel nga anac a lalaki ni Zacarias, nga anac a lalaki ni Banaias, nga anac a lalak ni Jeiel, nga anac a lalaki ni Matanias, a Levita, cadagiti annac a lallaki ni Asaf, iti tengnga ti gimong;

15Ket kinunana, Denggenyo, amin a Juda, ken dacayo nga agnaed iti Jerusalem, ken sica ari Josafat: Castoy ti cuna ni Jehova cadacayo: Dicayo agbuteng, ken dicayo met agcullayaw gapu itoy umariwecwec; ta ti gubat saanyo a cucua, no di ket cucua ti Dios.

16Intono bigat sumalogcayo a maibusor cadacuada: adtoy, umayda iti sang-atan ti Sis; ket masaracanyonto ida iti pungto ti lobong, iti sango ti let-ang ti Jeruel.

17Saanyonto a masapul ti gumubat itoy a bacal; agurnongcayo, agtacdercayo a sitatalna, ket kitaenyo ti panangisalacan ni Jehova cadacayo, O Juda ken Jerusalem; dicayo agbuteng, dicayo met agcullayaw: intono bigat incayo bumusor cadacuada; ta ni Jehova cumuyog cadacayo.

18Ket ni Josafat incul-obna ti olona a ti rupana agingga iti daga; ket amin a Juda ken dagiti agnaed ti Jerusalem nagpaclebda iti saclang ni Jehova, a sicacararag ken Jehova.

19Ket dagiti Levitas, cadagiti annac dagiti Coatitas, ken cadagiti annac dagiti Coreitas, nagtacderda nga agdayaw ken Jehova, a Dios ti Israel iti natbag unay a timec.

20Ket bimmangonda a nasapa iti bigat, ket napanda idiay let-ang ti Tecoa: ket idi napanda, ni Josafat nagtacder ket kinunana, Denggendac, O Juda ken dacayo nga agnaed iti Jerusalem: mamaticayo ken Jehova a Diosyo, iti casta mapatibkercayto; patienyo dagiti mammadtona, iti casta rumang-aycayto.

21Ket idi isu nakiuman cadagiti tattao, tinudinganna dagidiay a mangcanta coma ken Jehova, ken mangted ti panagdayaw iti nasantoan nga ornos, idi mapanda iti sango ti buyot, ket cunaenda, Agyamancayo ken Jehova; ta ti kinamanangngaasina agpaut iti agnanayon.

22Ket idi nangrugida nga agcanta ken agdayaw, Ni Jehova insaadna dagiti agsaneb a maibusor cadagiti annac ti Ammon ken ti Moab, ken bantay Seir, isuda nga immay idi a maibusor iti Juda: ket nacabilda.

23Ta dagiti annac ti Ammon ken ti Moab nagtacderda a maibusor cadagiti agnaed idiay bantay Seir tapno papatayen ken dadaelenda ida nga ikisap: ket idi nagibusda dagiti agnaed idiay Seir, tunggal maysa nakitinnulong a mangdadael iti sabali.

24Ket idi ti Juda simmangpet iti torre a pagwanawanan idiay let-ang kinitada ti umariwecwec; ket adtoy, isuda bangbangcayda a napasag iti daga, ket awan idi ti nacatalaw.

25Ket idi ni Josafat ken dagiti tattaona immayda agsamsam cadacuada, nasaracanda cadacuada iti nawadwad a kinabacnang, ken bagbagi a natay, ken napateg nga alhajas, isu nga iniccatda tapno maipaay cadacuada met laeng, ti ad-adu ngem iti cabaelanda nga awiten; ket tallo nga al-aldaw idi iti panagal-alada iti samsam, ta casta unay a nagadu.

26Ket ti maicapat nga aldaw nagurnongda idiay lobong a Beraca; gapu ta sadiay binenditoda ni Jehova: gapuna a ti nagan dayta a lugar nagaladan iti lobong a Beraca agingga itoy nga aldaw.

27Idin nagsublida, tunggal lalaki ti Juda ken Jerusalem, ket ni Josafat iti sangoananda, tapno mapan manen idiay Jerusalem a buyogen ti rag-o; ta ni Jehova pinagrag-ona ida iti ngatoen dagiti cabcabusorda.

28Ket dimtengda idiay Jerusalem agraman cadagiti salsalterio ken ararpa ken tortororot, agingga iti balay ni Jehova.

29Ket ti buteng ken Jehova adda idi cadagiti amin a pagpagarian dagiti dagdaga, idi nangngegda a ni Jehova nakigubat a maicaniwas cadagiti cabcabusor ti Israel.

30Iti casta ti pagturayan ni Josafat natalna idi; ta ti Diosna intedna kencuana ti talna iti aglicmut.

31Ket ni Josafat nagari iti Juda: ket tallopulo ket lima ti tawenna idi nangrugi nga agari; ket isu nagari bayat iti duapulo ket lima a tawen sadi Jerusalem, ket ti nagan ni inana Azuba nga anac a babai ni Silhi.

32Ket isu nagna iti dalan ni Asa nga amana; ket isu saan a simmina iti daydiay, nga inaramidna daydi a nalinteg cadagiti mata ni Jehova.

33Nupay casta dagiti nangato a disdisso saanda a naiccat; ket di pay met insinggalut dagiti tattao dagiti puspusoda iti Dios dagiti ammada.

34Ket ti matda cadagiti ar-aramid ni Josafat, umuna ken maudi, adtoy, naisurat iti historia ni Jehu nga anac a lalaki ni Hanani, a nailanad iti libro dagiti ar-ari ti Israel.

35Ket calpasan daytoy ni Josafat nga ari ti Juda timmipon ken Ocozias nga ari ti Israel; isu met laeng ti nagaramid a sidadangkes unay:

36Ket timmipon kencuana tapno agaramid cadagiti sasacayan a mapan idiay Tarsis; ket inaramidda dagiti sasacayan idiay Esion-geber.

37Idin ni Eliezer nga anac a lalaki ni Dodava a taga Mareosat nagpadto ti maicaniwas ken Josafat, a kinunana, Agsipud ta timmiponca ken Ocozias, ni Jehova dinadaelna dagiti ar-aramidmo. Ket dagiti sasacayan narba, tapno saanda a nacapan idiay Tarsis.

← Chapter 19 Jump to: Chapter 21 →