2 Chronicles 5

Ilokano (Ti Biblia (1973))

← Chapter 4 Jump to: Chapter 6 →

1Iti casta amin nga aramid a ni Salomon inaramidna a maipaay iti balay ni Jehova nalpas. Ket ni Salomon inserrecna dagiti banbanag a ni David nga amana indatonna idi, ti met laeng pirac, ken ti balitoc, ken amin nga al-alicamen, ket incabilna ida cadagiti paggamengan ti balay ti Dios.

2Idin ni Salomon tiniponna dagiti lallacay ti Israel, ken amin a pangpangoloen dagiti caputotan dagiti pangpangolo cadagiti balbalay dagiti amma dagiti annac ti Israel, idiay Jerusalem, tapno isang-atda ti lacasa ti tulag ni Jehova manipud iti ili ni David nga isu ti Sion.

3Ket amin dagiti lallaki ti Israel nakiragupda iti ari idi fiesta, a naisaad iti maicapito a bulan.

4Ket amin dagiti lallacay ti Israel napanda: ket dagiti Levitas inawitda ti lacasa;

5Ket isuda insang-atda ti lacasa ni Jehova, ken ti tolda ti gimong, ken amin dagiti nasantoan nga aruaten nga adda idi iti tabernaculo; dagitoy insang-at dagiti papadi a Levitas.

6Ket ni ari Salomon ken amin a gimong ti Israel a nakiragup kencuana, caduana ida iti sango ti lacasa, a nagidatdaton cadagiti carcarnero ken vacvaca, a saan a nabilang ken napocpoc gapu iti kinaruayda.

7Ket dagiti papadi impastrecda ti lacasa ti tulag ni Jehova iti saadna, iti uneg ti oraculo ti balay, iti casasantoan a disso, iti baba dagiti payac dagiti kerubin.

8Ta dagiti kerubin inyucradda dagiti payacda iti ngato ti saad ti lacasa, ket dagiti kerubin lininonganda ti ngato ti lacasa ken dagiti pagassiwanna.

9Ket dagiti pagassiwan atiddugda unay a dagiti murdong dagiti pagassiwan makita manipud iti lacasa iti sango ti oraculo; ngem saan a makita ida manipud iti ruar: ket addada idiay inggana itoy nga aldaw.

10Awan ti nagyan iti lacasa no di-laeng dagiti dua a tapi a bato nga incabil idiay ni Moises sadi Horeb, idi ni Jehova inaramidna ti tulag cadagiti annac ti Israel idi rimmuarda iti daga nga Egipto.

11Ket naaramid idi a dagiti papadi rimmuarda iti nasantoan a disso (ta amin dagiti papadi a sisasaclang idi pinasantificarda dagiti bagbagida, ket dida met sinalimetmetan dagiti pannacadasdasigda;

12Casta met dagiti Levitas a cumacanta idi, isuda amin met laeng da Asaf, Heman, Jeduthun, ken dagiti annacda ken cacabsatda a lallaki, a sicacawesda iti nalapat a lienzo, agraman cadagiti piang-piang, salterio, ken arpa, nagtacderda iti akindaya a pungto ti altar, ket caduada dagiti sangagasut ket duapulo a papadi a pagpagunienda dagiti tortororot);

13Naaramid idi a dagiti agtortororot ken cumacanta nagmaymaysada, tapno sangsangcatimecda a mangngeg iti panagdayaw ken panagyaman ken Jehova; ket idi impigsada ti timecda a buyugen dagiti tortororot, ken piangpiang, ken ar-arwaten ti musica, ket nagdayawda ken Jehova, a kinunada, Ta isu naimbag; ta ti kinamanangngaasina agpaut iti agnanayon; nga idin ti balay napno iti maysa nga ulep, ti met laeng balay ni Jehova.

14Iti casta a dagiti papadi dida nabalin ti agtacder nga agannong a gapu iti ulep; ta ti dayag ni Jehova pinunnona ti balay ti Dios.

← Chapter 4 Jump to: Chapter 6 →