1 Samuel 10

Mien Bible (Thai Script) © Thailand Bible Society, 2007

← Chapter 9 Jump to: Chapter 11 →

1ซามูเอน ฯฒฯ เฒาะ แป้ง หล่ง ออน เมี่ยน เญย โย่ว ต้าย โต๋ เหฌี่ย เซาโล เญย มฆ้อง แอ๋ง ฒม นิ่น เญย เฮมียน หย่า ก๊อง, “น้าย เซ เฒี้ยว อี้ ฮนอย หล่ง โย่ว ออน เม่ย โหฒว เปย๊ย เฒ้ย กุ๊น นิ่น หฑิบ เญย ป่วน ไม้ เฒ์ย ไฟ?”

2เม่ย อี้ ฮนอย เหธา เยีย เล่ย ฆอย ต่อย วั้ว หฒั่น, เยียม เบนยามิน เต่ย กะญั์ว เญย เสนซา, นิด ฟัด ลาเซน เญย โฒ้ว, เม่ย อ๋อย ปวั้ง อี ล่าน เมี่ยน. นิ่น บัว อ๋อย ก๊อง บั๋ว เม่ย, ‘ต้ง เม่ย มี่ง ล์อ วั้ว เต๋ย ล่อ ฒู้ง ล์อ ปวัด ต้าย อ๊ะ. อี้ หฒั่น เม่ย เญย เตีย ไม้ เฑ่า ล่อ. ต๋าว หฑวน นิ่น เฑ่า เม่ย. นิ่น ก๊อง, “เยีย เญย ตอน นี? เยีย อ๋อย หฒุ ฮนั้ง หาย นอ โหฒว?”’

3“เม่ย แอ๋ง เจี๋ย มี่ง เต๋ย เถา ทาโบ, ต้ม บะอง เฒวย เดี๋ยง วั้ว. เยียม หน่าย เม่ย ฯฒฯ ปวั้ง หฒุ ปัว ล่าน เมี่ยน อ๋อย มี่ง เบดเอน หฒั่ง ทิน-ฮู่ง. ม่าย ล่าน เมี่ยน ฮล้อบ ปัว เต้า ยู่ง ตอน, ม่าย ล่าน ต้อ ปัว นอม ฌั้ว, แอ๋ง ม่าย ล่าน ต้อ เหยียด ด๊บ-บัวะ อะหงุ่น ติ๊ว.

4นิ่น บัว ฯฒฯ ก๊อง หวุ่ย ปวั้ง หว่า แอ๋ง เฒาะ อี นอม ฌั้ว ธุ้น ปุน เม่ย. เม่ย หย่า อ๋อย หฒุ เยียม นิ่น บัว เญย ปั์ว ฒิบ ต้าย.

5“เม่ย บัว แอ๋ง เจี๋ย มี่ง เถา ทิน-ฮู่ง เญย บง, กิเบอา. เยียม วั้ว ม่าย นอม ฟีลิสะเตีย เมี่ยน โก๋ว เต่ย-ปูง แปง เญย หฒ่าม. เม่ย มี่ง เถา วั้ว นอม ฒี่ง เญย เฒี่ยง โห่, เม่ย ฯฒฯ ปวั้ง หฒุ เหยียด กวั้น โต่ว หว่า เมี่ยน เยียม วั้ว เจี๋ย เญย เหฒี่ย-ต้อง เหฌี่ย ต้าย. ม่าย เต๋ย พัด ต้ม ต้าน ป้า, ฟิ้ว-ต้าน ป้า, เบ๊าะ โฑ์, ปย๊ม เฮล้า-ด้ง หนู เยี์ยน เจ๊า ต้าย ด่าง. นิ่น บัว หย่า โต่ว เจี๊ยน ทิน-ฮู่ง เญย หว่า ต้าย.

6เฒี้ยว เญย สีง ลี่ง อ๋อย ธั้มๆ เญย เยียม เม่ย. เม่ย หย่า อ๋อย เหธา เจี๊ยน วั้ว เต๋ย โต่ว หว่า เมี่ยน โต่ว หว่า. เม่ย ฯฒฯ ทิ้ว เป๋น เซียง-เมี่ยน.

7เม่ย ปวัด น้าย เต๋ย จั๋ง-โห่ ธ้วด ต้าย วั้ว หฒั่น, หฒิว เม่ย ปวัด หอบ หฒุ โหฒว เญย กุ๊น โหฒว อ๊ะ, เหว่ย หฒุ ทิน-ฮู่ง เหธา เม่ย เยียม.

8“เม่ย อ๋อย หฒุ มี่ง กินกาน ด่าง เยีย. ฆะฮ้า เยีย หย่า มี่ง วั้ว ปวั้ง เม่ย, เหว่ย ฝ่ง ห่อ ปั๊ว เหฒี่ย เญย กะน้าย เหธา เหฒี่ย เหว่ย จิว ทง เญย กะน้าย. เม่ย อ๋อย หฒุ เยียม หน่าย ฒั้ว เสี่ย ฮนอย, เยีย ฯฒฯ มี่ง เม่ย วั้ว หย่า ปุน เม่ย ฮิ้ว ตุ๊ เม่ย อ๋อย หฒุ ฮนั้ง หาย นอ โหฒว.”

9เซาโล กวิ้น ซิน เล่ย ฆอย ซามูเอน วั้ว หฒั่น, ทิน-ฮู่ง ก๊อย เหยี่ยน เซาโล เญย เฮญี้ยว. วั้ว ฮนอย น้าย เต๋ย เหยียด ฒู้ง จั๋ง-โห่ ธ้วด ต้าย ต๋อย เหฑ่ง.

10เซาโล เหธา นิ่น เญย โปว มี่ง เถา กิเบอา วั้ว หฒั่น, ม่าย กวั้น โต่ว หว่า เมี่ยน ปวั้ง หฒุ นิ่น. ทิน-ฮู่ง เญย สีง ลี่ง ฯฒฯ ธั้มๆ เญย เหฌี่ย ต้าย เยียม เจี๊ยน นิ่น. นิ่น ฯฒฯ เยียม วั้ว เต๋ย โต่ว หว่า เมี่ยน บุด๋ง โต่ว หว่า.

11ต้ง ฒิ่น ด่าง ฮิ้ว ตุ๊ เซาโล วั้ว เต๋ย เมี่ยน ปวัด นิ่น เหธา เจี๊ยน โต่ว หว่า เมี่ยน โต่ว หว่า, ล่าน เหธา ล่าน ก๊อง, “คี้ด เญย ตอน ฝู่ง ฮนั้ง น้าย นอ เอ้าะ? เซาโล หย่า เป๋น เต้า โต่ว หว่า เมี่ยน ไฟ?”

12เยียม วั้ว ม่าย เต้า เมี่ยน เตา, “นิ่น บัว เญย เตีย เซ หาย เต้า?” เหว่ย หน่าย, ฆะฮ้า น้าย โจ๋ว หว่า, “เซาโล หย่า เป๋น เต้า โต่ว หว่า เมี่ยน ไฟ?” เป๋น หว่า-ผุย หมี่ อ๊ะ.

13เซาโล โต่ว ลิ์ว หว่า วั้ว หฒั่น, นิ่น ฝาว เถา วั้ว เจี๋ย เญย เหฒี่ย-ต้อง.

14เซาโล เญย แป๊ะ หน่าย เซาโล เหธา นิ่น เญย โปว, “เม่ย บัว มี่ง หาย ต้าย?” เซาโล เตา, “เยีย บัว มี่ง ล์อ ล่อ. ล์อ เกา ไม้ ปวัด, เยีย บัว ฯฒฯ มี่ง ล์อ ซามูเอน.”

15เซาโล เญย แป๊ะ ก๊อง, “ซามูเอน ก๊อง หาย หญู่ง บั๋ว เม่ย? ก๊อง บั๋ว เยีย ก๋า.”

16เซาโล เตา นิ่น เญย แป๊ะ, “ซามูเอน เม่งๆ เญย ก๊อง บั๋ว เยีย บัว, ‘วั้ว เต๋ย ล่อ ล์อ ปวัด ต้าย อ๊ะ.’” มป่า ต้ง ซามูเอน ก๊อง เถา กั๊วะ หฒั่ง เญย เจ๊า-โหล่ว, นิ่น ไม้ ก๊อง เหยียด เต๋ย ปุน นิ่น เญย แป๊ะ หมวัง.

17ซามูเอน ฯฒฯ เห่ว หฒวัง แปะ ฝีง กั๊บ ฒุ้น ต้าย เยียม เฒี้ยว เญย หฑะเฮมียน, มิดปา วั้ว.

18ซามูเอน ก๊อง บั๋ว อิสะลาเอน เมี่ยน, “ เฒี้ยว, อิสะลาเอน เญย ทิน-ฮู่ง, ฮนั้ง น้าย นอ ก๊อง, ‘เยีย เยียม อียิบ เต่ย-ปูง ต้อ อิสะลาเอน เมี่ยน ธ้วด ต้าย, หย่า เหฌียว เม่ย บัว เปย๋า ดุ๊ด อียิบ เมี่ยน เญย ปั์ว-เดี๊ย, แอ๋ง เหฌียว เม่ย บัว เปย๋า ดุ๊ด ต้ง ห่อย เม่ย บัว วั้ว เต๋ย นอมๆ กั๊วะ เญย เมี่ยน เญย ปั์ว-เดี๊ย.’

19มป่า อี้ ฮนอย เม่ย บัว กวั่ง เม่ย บัว เญย ทิน-ฮู่ง, ต้ง เหฌียว เม่ย บัว เปย๋า ดุ๊ด เหยียด ฒู้ง โค้ว หน่าน เหธา ขวน เฮญี้ยว เญย สี่ วั้ว เต้า. เม่ย บัว ก๊อง, ‘เยีย บัว ไม้ คั้ง. โท้ เหลียบ เต้า ฮู่ง เตี๋ย ต้าย กุ๊น เยีย บัว.’ ฮนั้ง หน่าย, อี้ หฒั่น เม่ย บัว อ๋อย หฒุ หฒิว เม่ย บัว เญย ฝีง หย่า หฒิว เม่ย บัว เญย ปู้ง ป่วน ต้าย เยียม เฒี้ยว เญย หฑะเฮมียน.”

20ซามูเอน ต้อ อิสะลาเอน เญย ฝีงๆ อิสะลาเอน เมี่ยน ต้าย, ฯฒฯ ตี่ง แหม่ง หมั่ง, ด๊อด หฒุ เบนยามิน ฝีง.

21นิ่น ฯฒฯ ต้อ เบนยามิน ฝีง ต้าย, หฒิว นิ่น บัว เญย ปู้ง ป่วน, แอ๋ง ตี่ง แหม่ง หมั่ง, ด๊อด หฒุ มาตี เญย โต้ว ฒง. เซ้ด เมว์ย ด๊อด หฒุ คี้ด เญย ตอน, เซาโล, มป่า นิ่น บัว ล์อ เซาโล ไม้ ปวัด.

22นิ่น บัว ฯฒฯ หน่าย เฒี้ยว, “วั้ว ล่าน เมี่ยน ต้าย น้าย ไฟ?” เฒี้ยว ก๊อง, “นิ่น ปี๋ง เจี๊ยน กะน้าย-ดุย กะญั์ว.”

23หฒวัง เมี่ยน ฯฒฯ ถิว มี่ง เคน นิ่น ต้าย. นิ่น โซ้ว เจี๊ยน หฒวัง แปะ ฝีง บุด๋ง, เหยียด ฒู้ง แปะ ฝีง แบ่ง นิ่น เญย บะเต้า ฮนั้ง.

24ซามูเอน ฯฒฯ ก๊อง บั๋ว เหยียด ฒู้ง แปะ ฝีง, “เม่ย บัว ปวัด ต้ง เฒี้ยว กิ๊น ต้าย เญย เมี่ยน อ๊ะ ไฟ? เหยียด ฒู้ง แปะ ฝีง ไม้ ม่าย หาย เต้า ฮนั้ง นิ่น.” หฒวัง แปะ ฝีง ฯฒฯ เห่ว เฉีย บุย เญย ก๊อง, “โท้ ปุน ฮู่ง เตี๋ย เฒี่ยง ตุ๊ หม่าน ฝุย อ๊ะ.”

25ซามูเอน ฯฒฯ ก๊อง เม่ง ปุน แปะ ฝีง ฮิ้ว ตุ๊ ฮู่ง เตี๋ย ม่าย เล์ย โหฒว หาย หญู่ง, ฮู่ง เตี๋ย เญย กง หย่า อ๋อย หฒุ ฮนั้ง หาย นอ. นิ่น ฯฒฯ เฟี้ย เหฌี่ย โซว อัน เจี๊ยน เฒี้ยว เญย หฑะเฮมียน. ฆะฮ้า ซามูเอน เห่ว แปะ ฝีง, เก๊าะ-เมี่ยน หฑวน เก๊าะ-เมี่ยน เญย เปย๊า.

26เซาโล หย่า หฑวน กิเบอา ฒี่ง, นิ่น กั้น เญย เปย๊า วั้ว. ม่าย เต๋ย เบ๊าะ จ๋า เฮ้น เญย แปง, ทิน-ฮู่ง ปุน นิ่น บัว ม่าย เฮญี้ยว อ๋อย กัน เจี๊ยน เซาโล มี่ง.

27มป่า ม่าย เต๋ย เหธว หลุ่น เญย เมี่ยน ก๊อง, “น้าย เต้า เมี่ยน ฮนั้ง หาย นอ ไฮ่ เหฌียว ตุ๊ บัว?” นิ่น บัว ฯฒฯ หมั่ง เผีย เซาโล, ไม้ ฝูง ฒี่ง เหญ่ย ปุน นิ่น. มป่า เซาโล ไม้ โค โล.

← Chapter 9 Jump to: Chapter 11 →