1 Samuel 24

Mien Bible (Thai Script) © Thailand Bible Society, 2007

← Chapter 23 Jump to: Chapter 25 →

1เซาโล มี่ง หฒุ่น ฟีลิสะเตีย เมี่ยน หฑวน ต้าย, ม่าย เมี่ยน บั๋ว นิ่น, “ดาวิด เยียม เอนเกดี เญย เต่ย-ปูง-ฮวาง.”

2เซาโล ฯฒฯ ต้อ นิ่น เยียม อิสะลาเอน เญย หฒวัง เมี่ยน บุด๋ง กิ๊น ต้าย เญย ปัว ธิน เต้า เฮ้น เญย แปง มี่ง เถา เฮยี่ย ยู่ง แบ๋ง ล์อ ดาวิด เหธา กัน ดาวิด เญย เมี่ยน.

3เซาโล ต้าย เถา เยียม เจ๊า-เฮลน วั้ว เต๋ย ปะกี ยู่ง ล่าน. เยียม วั้ว นอม ต๋อง ม่าย นอม แบ๋ง-ค้วด. เซาโล ฯฒฯ เปียะ แบ๋ง-ค้วด มี่ง ไจ๊ ปั์ว. ดาวิด เหธา นิ่น เญย เมี่ยน หย่า เฒว์ย เจี๊ยน แบ๋ง-ค้วด กะญั์ว โด เจี๋ย เญย ต๋อง.

4ดาวิด เญย เมี่ยน ก๊อง บั๋ว ดาวิด, “อี้ ฮนอย เซ ต้ง เฒี้ยว ก๊อง บั๋ว เม่ย, ‘เยีย อ๋อย เฒาะ เม่ย เญย วิน-วั้ง จิว ปุน เยียม เม่ย เญย ปั์ว-เดี๊ย. เม่ย กุ๊น เซว่ย เอ๋ย โหฒว ปุน นิ่น อ๊ะ.’” ดาวิด ฯฒฯ เจี์ย ซิน ต้าย เฮงๆ เญย มี่ง เถา เซาโล เญย ฆะฮ้า ฆาง ฯฒฯ ก๊าด นอม เซาโล เญย ลุย-ซยาม-เจี๊ยะ เญย เก๊าะ ดุ๊ด มี่ง. เซาโล หย่า ไม้ ฮิ้ว ตุ๊.

5ฆะฮ้า ดาวิด ไฮ์ เฮญี้ยว ไม้ หลง, เหว่ย หฒุ นิ่น ก๊าด เซาโล เญย ลุย-ซยาม-เจี๊ยะ เญย เก๊าะ.

6นิ่น ก๊อง บั๋ว เหธา นิ่น เยียม วั้ว เต๋ย เมี่ยน, “โท้ เฒี้ยว ป๊า เจี๊ยน ไม้ ตู๋ง ปุน เยีย แอ๋ง ฮนั้ง น้าย นอ โหฒว ปุน เยีย เญย เฒี้ยว, ต้ง เฒี้ยว หล่ง โย่ว ออน ต้าย เญย เมี่ยน. ไม้ ตู๋ง ปุน เยีย โหฒว หาย หญู่ง ห่อย นิ่น, เหว่ย หฒุ นิ่น เซ เฒี้ยว ออน ต้าย เญย เมี่ยน.”

7ดาวิด หย่า หล่ง น้าย เต๋ย หว่า ล่าน เจี๊ยน กัน นิ่น เญย เมี่ยน, หย่า ไม้ ปุน หาย เต้า เมี่ยน โหฒว หาย หญู่ง ห่อย เซาโล. เซาโล ฯฒฯ เจี์ย ซิน ธ้วด แบ๋ง-ค้วด กัน นิ่น เญย เจ๊า มี่ง หมี่ อ๊ะ.

8ฆะฮ้า ดาวิด ธ้วด แบ๋ง-ค้วด มี่ง เห่ว เซาโล, “เยีย เญย เฒี้ยว, ฮู่ง เตี๋ย อ้า!” เซาโล ฮวิน-หฑวน หมั่ง. ดาวิด ฯฒฯ พัวะ เหฌี่ย เดา ป๋าย เซาโล.

9ดาวิด ก๊อง บั๋ว เซาโล, “ฮู่ง เตี๋ย เหว่ย หาย ติ่ว หมวัง เมี่ยน ก๊อง, ดาวิด อ๋อย ห่อย ฮู่ง เตี๋ย เญย แหม่ง?

10อี้ ฮนอย ฮู่ง เตี๋ย กั้น เญย มฒีง ตุ๊ ปวัด ลิ์ว เยียม แบ๋ง-ค้วด เฒี้ยว ฒู้ง เฒาะ ฮู่ง เตี๋ย จิว ปุน เยียม เยีย เญย ปั์ว-เดี๊ย หมี่ อ๊ะ. ม่าย เมี่ยน เห่ว เยีย ไต๋ ฮู่ง เตี๋ย, มป่า เยีย หธ่อ เลี่ยว เม่ย เญย แหม่ง. เยีย ก๊อง, ‘เยีย ไม้ ซูง ปั์ว ห่อย เยีย เญย ฮู่ง เตี๋ย เหว่ย หฒุ ฮู่ง เตี๋ย เซ เฒี้ยว ออน ต้าย เญย เมี่ยน.’

11เยีย เญย เตีย อ้า! หมั่ง ม่าะ! เม่ย เญย ลุย-ซยาม-เจี๊ยะ เญย เก๊าะ เยียม เยีย เญย ปั์ว, เหว่ย หฒุ เยีย ก๊าด เม่ย เญย ลุย-ซยาม-เจี๊ยะ มป่า ไม้ ไต๋ เม่ย. อี้ หฒั่น เม่ย เม่ง แปะ หย่า ฮิ้ว ตุ๊. เยีย ไม้ โหฒว ต่อง, หย่า ไม้ แหง่ง ฮู่ง เตี๋ย. เยีย ไม้ โหฒว หาย หญู่ง ต่อง ฮู่ง เตี๋ย, มป่า เม่ย หฒุ่น เยีย อ๋อย เฒาะ เยีย เญย แหม่ง.

12โท้ เฒี้ยว เยียม ฮู่ง เตี๋ย เหธา เยีย บุด๋ง ตุ๋น สี่. โท้ เฒี้ยว เหว่ย เยีย วิ่น ปุน เม่ย, มป่า เยีย กั้น เญย ปั์ว ไม้ โหฒว หาย หญู่ง ห่อย ฮู่ง เตี๋ย.

13ฮนั้ง โล์-ฮนอย เมี่ยน ม่าย หว่า-ผุย ก๊อง, ‘เอ๊าะ สี่ มต้าย เยียม เอ๊าะ เมี่ยน ธ้วด ต้าย.’ มป่า เยีย เญย ปั์ว ไม้ โหฒว หาย หญู่ง ปุน ฮู่ง เตี๋ย.

14“อิสะลาเอน เมี่ยน เญย ฮู่ง เตี๋ย ธ้วด ต้าย ล์อ หาย เต้า? หฒุ่น หาย เต้า? ขูง หฒุ่น เต้า จู๊-ไต่, หฒุ่น นอม จู๊-มัว ซ่าะ?

15เหว่ย น้าย โท้ เฒี้ยว เยียม เยีย เหธา ฮู่ง เตี๋ย บุด๋ง โหฒว เซี้ยม ฒุ์ย เจียน เถง เยีย บัว ตุ๋น สี่. โท้ นิ่น ฒ่า หย่า เถง เยีย ฯฒฯ เหฌียว เยีย เปย๋า ดุ๊ด เม่ย เญย ปั์ว-เดี๊ย.”

16ดาวิด ก๊อง น้าย เต๋ย หว่า ปุน เซาโล หมวัง ลิ์ว, เซาโล ก๊อง, “เยีย เญย ตอน, ดาวิด อ่า, น้าย เซ เม่ย เญย เฉีย ไฟ?” เซาโล ฯฒฯ เญี้ยม ตุ๊ บุย ไห่.

17นิ่น ก๊อง บั๋ว ดาวิด, “เม่ย เก้า หลง เยีย, เหว่ย หฒุ เม่ย โหฒว หลง ปุน เยีย, มป่า เยีย โหฒว เอ๊าะ ปุน เม่ย.

18อี้ ฮนอย เม่ย ปุน ธีง เม่ย ฮนั้ง หาย นอ โหฒว หลง ปุน เยีย, เหว่ย หฒุ เฒี้ยว เฒาะ เยีย จิว ปุน เยียม เม่ย เญย ปั์ว-เดี๊ย มป่า เม่ย ไม้ ห่อย เยีย.

19เหว่ย หฒุ ไม้ ม่าย หาย เต้า ปวั้ง นิ่น เญย วิน-วั้ง หธ่อ แอ๋ง ปู๋ง นิ่น แป้ง ออน เญย มี่ง. ฮนั้ง หน่าย โท้ เฒี้ยว โหฒว หลง วิ่น ปุน เม่ย ฮนั้ง เม่ย อี้ ฮนอย โหฒว หลง ปุน เยีย.

20อี้ หฒั่น เยีย ฮิ้ว ตุ๊, เม่ย ด่ง หาย ฒู้ง ตุ๊ โหฒว ฮู่ง. อิสะลาเอน กั๊วะ อ๋อย หฒุ เยียม เม่ย เญย ปั์ว-เดี๊ย เหลียบ เจี์ย.

21เหว่ย น้าย โท้ เม่ย เฒี้ยง เจี๊ยน เฒี้ยว แล์ง หว่า บั๋ว เยีย, เม่ย ไม้ ไพ กวั่ง เยีย เญย เฒ้ย-ฟุน หย่า ไม้ เยียม เยีย เญย เตีย เญย โต้ว ฒง ซ้อด เยีย เญย บั๋ว กวั่ง.”

22ดาวิด ฯฒฯ โฮ้ว เจี๊ยน แล์ง หว่า ปุน เซาโล. เซาโล ฯฒฯ หฑวน เปย๊า หมี่ อ๊ะ. ดาวิด เหธา นิ่น เญย เมี่ยน ฝาว มี่ง เยียม นอม เว่ย ว้วน เญย ต๋อง.

← Chapter 23 Jump to: Chapter 25 →