1 Samuel 19

Mien Bible (Thai Script) © Thailand Bible Society, 2007

← Chapter 18 Jump to: Chapter 20 →

1เซาโล เห่ว นิ่น เญย ตอน, โยนาทาน, เหธา นิ่น เญย หฒวัง โปว, ไต๋ ดาวิด. มป่า เซาโล เญย ตอน, โยนาทาน, ฮนั้ม ไห่ ดาวิด.

2โยนาทาน ฯฒฯ ก๊อง บั๋ว ดาวิด, “เยีย เญย เตีย, เซาโล, ล์อ ฉัง ไต๋ เม่ย. เหว่ย น้าย, ฌัง ฮนอย ดอม เม่ย อ๋อย หฒุ ไฝ ฟิม, อ๋อย หฒุ ล์อ ต๋อง ปี๋ง เจี๊ยน เบว์ย เญย.

3เม่ย ปี๋ง หาย ฑบ หล่ม-ฮวาง, เยีย อ๋อย มี่ง วั้ว โซ้ว เจี๊ยน เยีย เญย เตีย เญย กะเฮลน ก๊อง เม่ย เญย เจ๊า ปุน เยีย เญย เตีย หมวัง. เยีย ฮิ้ว ตุ๊ เม่ย เญย เจ๊า ฮนั้ง หาย นอ, เยีย ฯฒฯ บั๋ว เม่ย.”

4โยนาทาน เธง ดาวิด ปุน นิ่น เญย เตีย หมวัง. นิ่น ก๊อง, “โท้ อา เตีย ไม้ ตู๋ง โหฒว ฒุ์ย ห่อย เม่ย เญย โปว, ดาวิด, เหว่ย หฒุ ดาวิด ไม้ โหฒว หาย หญู่ง ฒุ์ย ต่อง อา เตีย. นิ่น โหฒว เญย หญู่งๆ หย่า เถง ตุ๊ เตีย ธั้ม ไห่.

5นิ่น ไม้ หล่ง แหม่ง เญย มี่ง ไต๋ วั้ว เต้า ฟีลิสะเตีย เมี่ยน. เฒี้ยว เถง อิสะลาเอน เญย หฒวัง เมี่ยน ตุ๊ ฮี่ง เจี๋ย. วั้ว หฒั่น อา เตีย ปวัด หย่า อะเฮน้ย ไห่. อี้ หฒั่น เหว่ย หาย ติ่ว อ๋อย โหฒว ฒุ์ย ไต๋ ดาวิด ปุน ไม้ โหฒว ต่อง เญย เมี่ยน เญย ฑย้าม เหลี่ยว ธ้วด หย่า ไม้ ม่าย กอน-แป๋ง.”

6เซาโล ฯฒฯ หมวัง โยนาทาน เญย หว่า. เซาโล โฮ้ว เจี๊ยน หว่า ก๊อง, “เยีย เฒี้ยง เจี๊ยน เฒี่ยง เจี๊ยน เญย เฒี้ยว แล์ง หว่า, ดาวิด ฒู้ง ไม้ หฒุ ไต๋ ไต่ อ๊ะ.”

7โยนาทาน ฯฒฯ เห่ว ดาวิด, หย่า เฒาะ น้าย เต๋ย เหยียด ฒู้ง สี่ ก๊อง บั๋ว นิ่น. โยนาทาน หย่า ต้อ ดาวิด มี่ง เซาโล วั้ว. ดาวิด ฯฒฯ เยียม เซาโล เญย หฑะเฮมียน ฮนั้ง ฒิ่น ด่าง นอ.

8ฆะฮ้า แอ๋ง ม่าย เบ๊าะ จ๋า เญย สี่. ดาวิด ฯฒฯ ธ้วด มี่ง เหธา ฟีลิสะเตีย เมี่ยน เบ๊าะ จ๋า, หย่า ไต๋ ฟีลิสะเตีย เมี่ยน ไต่ ธั้ม! ไห่. ฟีลิสะเตีย เมี่ยน ฯฒฯ เยียม นิ่น เญย วั้ว ด่าง แหมง เปย๋า.

9เยียม เฒี้ยว ต้าย เญย เอ๊าะ เมี้ยน แอ๋ง ต้าย ม่อ เซาโล หมี่ อ๊ะ. วั้ว หฒั่น เซาโล เยียม นิ่น เญย ติ่น นั้น เจี๊ยน ธัง. ดาวิด หย่า พัด ต้าน ป้า ปุน นิ่น หมวัง.

10เซาโล ปิว ธัง มี่ง อ๋อย ฑบ ดาวิด ปั่ง หฌ่ง ตีง เจี๊ยน, มป่า ดาวิด ซิ้ม ดุ๊ด หมี่ อ๊ะ. ธัง ฯฒฯ ตีง เจี๊ยน วั้ว หฌ่ง. วั้ว ม์วน ดาวิด เปย๋า ดุ๊ด หมี่ อ๊ะ.

11เซาโล พ้าย เมี่ยน มี่ง ดาวิด เญย เปย๊า เธี่ยน หมั่ง, ฒั้ว เถา ลู่ง ฌัง ไต๋ นิ่น อ๊ะ. มป่า ดาวิด เญย เอ๊า, มีคาน, ก๊อง บั๋ว ดาวิด, “สี ก๊อง อี้ ม์วน เม่ย ไม้ เปย๋า แหม่ง นอ, ฌัง ฮนอย เม่ย ฒู้ง อ๋อย หฒุ ไต๋ ไต่ อ๊ะ.”

12มีคาน ฯฒฯ ปู๋ง ดาวิด ยั่ง ฟง ม่วน เหฌี่ย. ดาวิด ฯฒฯ เปย๋า ดุ๊ด หมี่ อ๊ะ.

13มีคาน แอ๋ง เฒาะ หมิ่ว-ฝัง อัน เจี๊ยน โหธว, เฒาะ หล่ง ยู่ง เปยย โหฒว ต้าย เญย ฑ์ม-เต้า ปุน ฑ์ม เจี๊ยน, หย่า เฒาะ ลุย ห่ม เจี๊ยน.

14เซาโล พ้าย เมี่ยน มี่ง เฒาะ ดาวิด วั้ว หฒั่น มีคาน ก๊อง, “ดาวิด ไม้ หลง.”

15เซาโล แอ๋ง พ้าย เมี่ยน มี่ง หมั่ง ดาวิด, หย่า ก๊อง บั๋ว นิ่น บัว, “เลี่ยม โหธว แกง เจี๊ยน นิ่น ต้าย เยีย น้าย, เหว่ย ปุน เยีย ไต๋ นิ่น อ๊ะ.”

16พ้าย มี่ง เญย เมี่ยน เปียะ มี่ง, ปวัด หมิ่ว-ฝัง เยียม วั้ว โหธว, หย่า ม่าย ยู่ง เปยย เญย ฑ์ม-เต้า เยียม มฆ้อง.

17เซาโล ก๊อง มีคาน, “เม่ย เหว่ย หาย ติ่ว ฮนั้ง น้าย ดั๊ว เยีย, ปู๋ง เยีย เญย วิน-วั้ง เปย๋า มี่ง, นิ่น ฯฒฯ เปย๋า ดุ๊ด หมี่ อ๊ะ.” มีคาน เตา เซาโล, “นิ่น ก๊อง บั๋ว เยีย, ‘ปู๋ง เยีย มี่ง ม่าะ! อ๋อย ปุน เยีย ไต๋ เม่ย โหฒว หาย หญู่ง?’”

18ดาวิด ฯฒฯ เปย๋า ดุ๊ด หมี่ อ๊ะ. นิ่น มี่ง ลามา ฒี่ง ล์อ ซามูเอน, หย่า เฒาะ เซาโล โหฒว ปุน นิ่น เญย เหยียด ฒู้ง เจ๊า ก๊อง ปุน ซามูเอน หมวัง. นิ่น เหธา ซามูเอน ฯฒฯ มี่ง เยียม นาโย้ด.

19ม่าย เมี่ยน มี่ง ก๊อง บั๋ว เซาโล, “ดาวิด มี่ง เยียม ลามา ฒี่ง, นาโย้ด วั้ว นอม ต๋อง.”

20เซาโล ฯฒฯ พ้าย เมี่ยน มี่ง เฒาะ ดาวิด. มี่ง เญย เมี่ยน ปวัด กวั้น โต่ว หว่า เมี่ยน เยียม วั้ว โต่ว ทิน-ฮู่ง เญย หว่า, ซามูเอน โหฒว เปย๊ย เฒ้ย โซ้ว เจี๊ยน ต้อ นิ่น บัว. ทิน-ฮู่ง เญย สีง ลี่ง เหฌี่ย ต้าย เยียม เจี๊ยน เซาโล พ้าย มี่ง เญย เมี่ยน, นิ่น บัว ฯฒฯ เหธา เจี๊ยน โต่ว หว่า.

21ม่าย เมี่ยน ต้อ น้าย เต๋ย สี่ มี่ง บั๋ว เซาโล. นิ่น ฯฒฯ แอ๋ง พ้าย เต๋ย เมี่ยน มี่ง. วั้ว เต๋ย เมี่ยน หย่า เหธา เจี๊ยน โต่ว ทิน-ฮู่ง เญย หว่า. เซาโล แอ๋ง พ้าย ตะฟาม หฑุ่น เมี่ยน มี่ง. วั้ว เต๋ย หย่า ฟี่ ฮนั้ง เญย โต่ว ทิน-ฮู่ง เญย หว่า.

22เซาโล กั้น ฯฒฯ มี่ง ลามา ฒี่ง. ต้าย เถา เสคู มู้ง เญย ต้ม ววม-ค้วด กะเฮลน นิ่น หน่าย เมี่ยน, “ซามูเอน เหธา ดาวิด เยียม หาย?” ม่าย เมี่ยน เตา นิ่น, “นิ่น บัว อี เต้า เยียม ลามา ฒี่ง กะญั์ว, นาโย้ด วั้ว นอม ต๋อง.”

23เซาโล ฯฒฯ มี่ง ลามา ฒี่ง, นาโย้ด วั้ว. ทิน-ฮู่ง เญย สีง ลี่ง เหฌี่ย ต้าย เยียม เจี๊ยน เซาโล. นิ่น ฯฒฯ เหยียด ปิ่น มี่ง, เหยียด ปิ่น โต่ว ทิน-ฮู่ง เญย หว่า, เถา ลามา ฒี่ง, นาโย้ด วั้ว.

24นิ่น หย่า ไจ๊ ฆอย ลุย-โหว ตอง เจี๊ยน ซามูเอน โต่ว ทิน-ฮู่ง เญย หว่า, แอ๋ง แล่ง แก๊ง เญย เปว๋ย เหยียด ฮนอย, เหยียด ม์วน. เหว่ย หน่าย เมี่ยน หธีง ต้าย ก๊อง, “เซาโล หย่า เป๋น เต้า โต่ว หว่า เมี่ยน ไฟ?”

← Chapter 18 Jump to: Chapter 20 →