1 Samuel 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1ฮันนา ฯฒฯ เต๋า เก๋า ก๊อง, “ เฒี้ยว ปุน เยีย เญย เฮญี้ยว ออน-เหลาะ ไห่. เยีย เขา เฒี้ยว, เยีย เญย ชะ ฯฒฯ เฮ้น. เยีย เญย ฑุ่ย จั๊ด เยีย เญย วิน-วั้ง, เหว่ย หฒุ เยีย อะเฮน้ย ไห่ ทิน-ฮู่ง เญย เหฌียว เอน.

2“ไม้ ม่าย หาย เต้า ฮนั้ง เฒี้ยว ธีง-เหฑ่ง. ธี่ ธ้วด เม่ย ไม้ ม่าย หาย เต้า, หย่า ไม้ ม่าย หละเปย๊ย ฮนั้ง เยีย บัว เญย ทิน-ฮู่ง.

3“ไม้ ตู๋ง แอ๋ง ปู๋ง เจี๊ยน หว่า-เหมา มี่ง อ๊ะ. ไม้ ตู๋ง ปุน เม่ย เญย ฑุ่ย ก๊อง ธ้วด เธง-โฮล เญย หว่า, เหว่ย หฒุ เฒี้ยว เซ ม่าย ว่วน ฒาง เญย ทิน-ฮู่ง. นิ่น หย่า เฑียง เมี่ยน โหฒว เญย สี่.

4“เฮ้น เญย เมี่ยน เญย จวัง-หฒิน เน้า หมี่ อ๊ะ, มป่า เมา เญย เมี่ยน ตุ๊ ชะ เฮ้น.

5ตุ๊ หญั่น เกว๋น เป๊ว เญย เมี่ยน ต๋าว หฑวน อ๋อย หฒุ ธ้วด มี่ง หม่าย กง หญั่น, มป่า เฮญี้ยว เซีย เญย เมี่ยน ต๋าว หฑวน ไม้ หฒุ หง่อ อ๊ะ. ไม้ ม่าย แซง-ยู์ง เญย เมี่ยน ยู์ง ตุ๊ เสี่ย เต้า ฝุเจว๊ย, มป่า ม่าย ฝุเจว๊ย ธั้ม เญย มเซียะ ตอน ต๋าว หฑวน เฑ่า เจี๊ยน เยียม อ๊ะ.

6“ เฒี้ยว ปุน เมี่ยน ไต่ หย่า ปุน เมี่ยน นั่ง. นิ่น ปุน เมี่ยน เหฌี่ย เถา เยี่ยม เกน หย่า ปุน เมี่ยน ธ้วด ต้าย.

7เฒี้ยว โหฒว ปุน เมี่ยน จ่ม, หย่า ปุน เมี่ยน ปุ๊ด ฒ่อย. นิ่น ปุน เมี่ยน ด๊อด เหฌี่ย ไอ๊ หย่า โป้ว เมี่ยน ฝาว ฮลัง.

8เฒี้ยว เคน เมี่ยน จ่ม เมี่ยน เยียม เนีย-บูง เจี์ย ต้าย. นิ่น เหลียบ กะน่าน เญย เมี่ยน เยียม หละฟับ-ดุย ฝาว. นิ่น ปุน นิ่น บัว ตุ๊ เหธา ฮู่ง ตอน จวั่ง ต๋อง เฒว์ย, หย่า ตุ๊ ม่าย เม่ง โห่ เญย เหว่ย เป๋น นิ่น บัว หฑิบ เญย ป่วน. “เหว่ย หฒุ ป้าม เกน เญย เดี้ยว เซ เฒี้ยว เญย. นิ่น หย่า เหลียบ ป้าม เกน เยียม วั้ว เต๋ย เดี้ยว กู้ หงว่าย.

9นิ่น อ๋อย โก๋ว เจี๊ยน นิ่น เญย ธีง-เหฑ่ง เมี่ยน, มป่า เอ๊าะ เมี่ยน อ๋อย หฒุ เซ้กๆ เญย เยียม หฮมวัง เญย ต๋อง. “ป้าม เมี่ยน ไม้ ไฮ่ เขา กั้น เญย ชะ ตุ๊ ฮี่ง.

10เฒี้ยว เญย วิน-วั้ง อ๋อย หฒุ นิ่น เบ๊าะ หม่วน. นิ่น อ๋อย เยียม กู้ หงว่าย ลู่ง หล่ง บะอง พิ นิ่น บัว. เฒี้ยว ฒู้ง อ๋อย เซี้ยม เถา จ่ม ลู่ง เดี๊ย. “นิ่น อ๋อย เหธย ชะ ปุน นิ่น เหลียบ ต้าย เญย ฮู่ง เตี๋ย, หย่า ทิบ หัด ม์า ปุน นิ่น หล่ง โย่ว ออน ต้าย วั้ว เต้า.”

11เอนคานา ฯฒฯ หฑวน ลามา ฒี่ง, นิ่น เญย เปย๊า วั้ว, มป่า วั้ว เต้า ตอน เยียม เอลี ไซ เมี่ยน เญย หฑะเฮมียน ฟู-สู เฒี้ยว.

12เอลี เญย อี เต้า ตอน เป๋น เมี่ยน หว่าย เมี่ยน. นิ่น บัว ไม้ ท่าย เฒี้ยว.

13ไซ เมี่ยน เหธา แปะ ฝีง เญย เล์ย เซ ฮนั้ง น้าย. หาย เต้า เมี่ยน ต้อ แซง-คู้ ต้าย ฝ่ง ห่อ เหฒี่ย, ต้ง โฒ้ว เจี๊ยน อ๊อ วั้ว หฒั่น, ไซ เมี่ยน เญย โปว ฯฒฯ ต้าย. นิ่น เญย ปั์ว นั้น เจี๊ยน ปัว หธา ต้ม ปะเกน-ญ้าบ.

14นิ่น ฯฒฯ หล่ง ฑบ เปียะ โฒ้ว เจี๊ยน อ๊อ เญย แธง กะญั์ว, เซ ต้ม แธง ไฟ แธง-ลอ ไฟ ต้ม แธง-เบ้ย ไฟ โพว-ทง เญย แธง. ปะเกน-ญ้าบ ป๊ะ หฒุ หาย เต๋ย อ๊อ ฝาว ต้าย, ไซ เมี่ยน ฯฒฯ ต้อ มี่ง เป๋น นิ่น กั้น เญย ป่วน. นิ่น บัว ฮนั้ง น้าย นอ โหฒว ปุน ตะฟ่าน มี่ง ซีโล ฝ่ง ห่อ เหฒี่ย เญย อิสะลาเอน เมี่ยน.

15มป่า เลี่ยม ไม้ แก้ง ตุ๊ ปั๊ว เฮมย, ไซ เมี่ยน เญย โปว ฯฒฯ มี่ง ฝ่ง ห่อ เหฒี่ย เญย เมี่ยน วั้ว ก๊อง, “เฒาะ เต๋ย อ๊อ ปุน ไซ เมี่ยน ฒิ ม่าะ! นิ่น ไม้ หล่ง เม่ย โฒ้ว ต้าย เญย อ๊อ. นิ่น ขูง หล่ง อ๊อ-เญี์ยม ฮนั้ง.”

16สี ก๊อง ฝ่ง ห่อ เหฒี่ย เญย เมี่ยน ก๊อง, “โท้ ปุน นิ่น บัว ปั๊ว เฮมย ด่าง, ฆะฮ้า อ๋อย หล่ง บัวะ เหฒีย กุ๊น เฒาะ อ๊ะ,” ไซ เมี่ยน เญย โปว ฯฒฯ เตา, “ไม้ ตุ๊. เม่ย อ๋อย หฒุ อี้ หฒั่น ปุน. เม่ย ไม้ ปุน นอ, เยีย ฯฒฯ ธ้าง ต้อ มี่ง อ๊ะ.”

17เหว่ย น้าย, หฒิว เฒี้ยว หมั่ง, วั้ว เต๋ย อี เต้า เมี่ยน หลุน เมี่ยน เญย ฒุ์ย หฒะเก้ง โฮล ไห่, เหว่ย หฒุ นิ่น บัว หมั่ง ไม้ ฝาว เหมว่ย ฝ่ง ห่อ ปุน เฒี้ยว เญย กะน้าย.

18มป่า ซามูเอน เยียม เฒี้ยว เญย หฑะเฮมียน ฟู-สู. นิ่น หธ่อ เป๋น ฝุเจว๊ย เญย เฒี่ยง โห่ หย่า ฒุ เจี๊ยน ล่าม่า เดีย เญย เอโฟ้ด.

19หฮญังๆ ซามูเอน เญย มา ลุ่น เต๋ย เซียง-ลุย-ด๊าว ไฝ เญย ปุน นิ่น. นิ่น เญย มา เหธา เจี๊ยน นิ่น เญย เตีย เถา เหยียด หฮญัง ฝ่ง ห่อ เหฒี่ย เญย เฒี่ยง โห่ ต้อ มี่ง ปุน นิ่น.

20วั้ว หฒั่น เอลี ปวัง หว่า ปุน เอนคานา เหธา นิ่น เญย เอ๊า. นิ่น ก๊อง, “โท้ เฒี้ยว ปุน น้าย เต้า มเซียะ ตอน ตุ๊ ฝุเจว๊ย ปุน เม่ย เหว่ย ตี๊ นิ่น โจ้ว ต้าย ฝูง ปุน เฒี้ยว วั้ว เต้า ตอน.” เอนคานา บัว อี ฮมวั้ง ฯฒฯ หฑวน เปย๊า หมี่ อ๊ะ.

21เฒี้ยว เหธย ฟุ ปุน ฮันนา. นิ่น ฯฒฯ แอ๋ง ม่าย ฝุเจว๊ย, ยู์ง ตุ๊ ปัว เต้า ตอน เหธา อี เต้า เซียะ. วั้ว เต้า ตอน, ซามูเอน, เยียม เฒี้ยว เญย หฑะเฮมียน กุ๊น โหฒว กุ๊น โฮล.

22เอลี เญย หฮญัง-เจ๊ย โก๋ ไห่ อ๊ะ. นิ่น หย่า ไฮ์ ก๊อง นิ่น เญย อี เต้า ตอน โหฒว ปุน อิสะลาเอน เญย หฒวัง เมี่ยน เญย หญู่งๆ สี่ หย่า ไฮ์ ก๊อง นิ่น บัว มี่ง เปว๋ย เยียม หวุ่ย ปวั้ง ด๊บ-ลิ่ว เญย แก้ง ด่าง ฟู-สู เญย มเซียะ ตอน.

23เอลี ฯฒฯ ก๊อง บั๋ว นิ่น เญย อี เต้า ตอน, “เม่ย บัว เหว่ย หาย ติ่ว ฮนั้ง น้าย นอ โหฒว? เยีย ไฮ์ หฒวัง แปะ ฝีง ก๊อง เม่ย บัว โหฒว เญย เอ๊าะ สี่.

24เยีย เญย ตอน อ่า, ไม้ ตู๋ง ฮนั้ง หน่าย. เยีย ไฮ์ เฒี้ยว เญย หฒวัง แปะ ฝีง ฒุ่น น้าย เต๋ย ไม้ เป๋น เญย สี่ ปวั๊ง นอมๆ ต๋อง อ๊ะ.

25สี ก๊อง เมี่ยน โหฒว ต่อง ปุน เมี่ยน, ทิน-ฮู่ง ไฮ่ เถง นิ่น เบ่น, มป่า สี ก๊อง ป้าม เมี่ยน โหฒว ต่อง เฒี้ยว, หาย เต้า ไฮ่ เถง นิ่น โท้?” มป่า เอลี เญย ตอน บัว ไม้ หมวัง เตีย ก๊อง เญย หว่า เหว่ย หฒุ เฒี้ยว ฒู้ง เจี์ย เฮญี้ยว อ๋อย ไต๋ นิ่น บัว.

26วั้ว เต้า ตอน-ไฝ, ซามูเอน, กุ๊น โหฒว กุ๊น โฮล. เฒี้ยว อะเฮน้ย ไห่ นิ่น. หฒวัง เมี่ยน หย่า อะเฮน้ย ไห่ นิ่น.

27ม่าย เต้า ทิน-ฮู่ง เญย เมี่ยน ต้าย ล์อ เอลี หย่า ก๊อง บั๋ว นิ่น, “ เฒี้ยว ฮนั้ง น้าย นอ ก๊อง, ‘เม่ย เญย อง-ถาย-แงะ เญย เฒ้ย-ฟุน เยียม อียิบ เต่ย-ปูง, ฟาโล ฮู่ง เญย เฒ้ย-ฟุน เญย ปั์ว-เดี๊ย วั้ว หฒั่น, เยีย ปุน นิ่น บัว ฮิ้ว ตุ๊ เยีย เม่ง เญย.

28เยียม อิสะลาเอน เญย หฒวัง ฝีง บุด๋ง เยีย กิ๊น นิ่น โหฒว เยีย เญย ไซ เมี่ยน, ปุน นิ่น เยียม เยีย เญย เหฒี่ย-ต้อง ฟู-สู, ปุน นิ่น ปั๊ว ฮูง, หย่า ปุน นิ่น เยียม เยีย เญย หฑะเฮมียน ฒุ เอโฟ้ด. อิสะลาเอน เมี่ยน หล่ง โต์ว ปั๊ว เหฒี่ย ฝ่ง ห่อ เญย เหยียด ฒู้ง กะน้าย, เยีย หย่า จิว ปุน เม่ย เญย อง-ถาย-แงะ เญย เฒ้ย-ฟุน.

29เม่ย บัว เหว่ย หาย ติ่ว เม้า ต้ง เยีย พ้าย เมี่ยน ฝ่ง ห่อ เหธา ปั๊ว เหฒี่ย เญย กะน้าย? เม่ย ท่าย เม่ย เญย ตอน เก้า ธั้ม ท่าย เยีย ฯฒฯ เฒาะ เยีย เญย แปะ ฝีง, อิสะลาเอน เมี่ยน, ฝ่ง ห่อ เญย หญู่งๆ กะน้าย เก้า หลง เจี๋ย เญย ป่วน หวุย เม่ย บัว กั้น จุ่น.’

30“เหว่ย น้าย เฒี้ยว, อิสะลาเอน เญย ทิน-ฮู่ง, ก๊อง, ‘เยีย แล์ง เจี๋ย หว่า ก๊อง เม่ย เญย เฒ้ย-ฟุน เหธา เม่ย เญย อง-ถาย-แงะ เญย เฒ้ย-ฟุน อ๋อย ตุ๊ เหยียด ลิ์ว เปียะ ธ้วด เยียม เยีย เญย หฑะเฮมียน ฟู-สู เยีย.’ มป่า อี้ หฒั่น เฒี้ยว ก๊อง, ‘เยียม น้าย มี่ง ไม้ ปุน ฮนั้ง หน่าย อ๊ะ. ท่าย เยีย วั้ว เต๋ย, เยีย อ๋อย ท่าย นิ่น บัว. หมั่ง เผีย เยีย วั้ว เต๋ย, นิ่น บัว ฒู้ง หฒุ หมั่ง เผีย.

31หมั่ง ม่าะ! ฮนอย-เหญียะ อ๋อย เถา, เยีย อ๋อย ไต๋ เม่ย เญย โต้ว ฒง เหธา เม่ย เญย อง-ถาย-แงะ เญย เฒ้ย-ฟุน เญย เหยียด ฒู้ง เมี่ยน หลุน เมี่ยน. เยียม เม่ย เญย เฒ้ย-ฟุน ฯฒฯ ไม้ ม่าย เหยียด เต้า เฒี่ยง ตุ๊ เสี่ยว ญ่วน ด๊าว.

32เม่ย กั้น เญย มฒีง ฯฒฯ ตุ๊ ปวัด เยีย เยียม เญย ต๋อง หฒุ โค้ว. ไม้ กุ๊น เยีย โหฒว หลง ปุน อิสะลาเอน เมี่ยน, เม่ย กั้น เญย โต้ว ฒง เหยียด ลิ์ว ไม้ ม่าย เหยียด เต้า เฒี่ยง ตุ๊ เสี่ยว ญ่วน ด๊าว.

33เยียม เยีย เญย เหฒี่ย-ต้อง, ต้ง เยีย หธ่อ เลี่ยว เหยียด เต้า เม่ย เญย เฒ้ย-ฟุน, เยีย เลี่ยว เจี๊ยน ปุน นิ่น เฮญี้ยว เธี้ยด เฑ่า เป๊ด เยียะ เญย เยียม, เญี้ยม เจี๊ยน เถา มฒีง ฒู้ง บั๊ว หมี่ อ๊ะ. เม่ย เญย เหยียด ฒู้ง เฒ้ย-ฟุน ต๋อย ฒง นิน เญย เฒี่ยง โห่ อ๋อย หฒุ ไต่ เหฑ่ง อ๊ะ.

34“‘เม่ย เญย อี เต้า ตอน, โฮ้บนี เหธา ฟีเนหัด, อ๋อย หฒุ ปวั้ง เญย สี่ เหว่ย เม่ย โหฒว จั๋ง-โห่. นิ่น บัว อี เต้า อ๋อย จวั่ง นอม ฮนอย หฒุ ไต่ หมี่ อ๊ะ.

35เยีย อ๋อย เหว่ย กั้น เหลียบ เต้า เหฒียบ ฒัวะ เญย ไซ เมี่ยน. นิ่น อ๋อย หฒิว เยีย เญย เฮญี้ยว เอ๋ย เญย โหฒว. เยีย อ๋อย เหลียบ นิ่น เญย เฒ้ย-ฟุน ว้วน เจี์ย ต้าย. นิ่น ฯฒฯ เหยียด ลิ์ว เยียม เยีย หล่ง โย่ว ออน ต้าย วั้ว เต้า เญย หฑะเฮมียน เปียะ ธ้วด.

36เยียม เม่ย เญย โต้ว ฒง เหฒ่ง เหฌี่ย เญย เมี่ยน อ๋อย ต้าย ป๋าย นิ่น หย่า โท้ ปุน นอม ญ่าน เหธา นอม ฌั้ว หย่า อ๋อย ก๊อง, “เยีย โท้ เม่ย เหลียบ เยีย ม่าย ป่วน โหฒว ไซ เมี่ยน เหว่ย ปุน เยีย ไฮ่ ตุ๊ เต๋ย ป๊า กะน้าย หญั่น.”’”

← Chapter 1 Jump to: Chapter 3 →