1 Samuel 31

Mien Bible (Thai Script) © Thailand Bible Society, 2007

← Chapter 30 Jump to:

1ฟีลิสะเตีย เมี่ยน เหธา อิสะลาเอน เมี่ยน เบ๊าะ จ๋า. อิสะลาเอน เมี่ยน เยียม ฟีลิสะเตีย เมี่ยน เญย วั้ว ด่าง แหมง เปย๋า, เยียม กินโบอา บง หฒุ ไต๋ ไต่.

2ฟีลิสะเตีย เมี่ยน หฒุ่น หฒ่าย เซาโล เหธา นิ่น เญย ตอน ฯฒฯ ไต๋ เซาโล เญย ตอน, โยนาทาน, อาบีนาดับ เหธา มันคีซูวา.

3เบ๊าะ จ๋า เญย เจ๊า กุ๊น โหฒว กุ๊น โฮล หย่า กุ๊น โหฒว กุ๊น นิด เซาโล. ป๊วน จวัง-หฒิน เญย เมี่ยน หฒุ่น หฒ่าย ป๊วน นิ่น มุน ตุ๊ เซียง ไห่.

4เซาโล ก๊อง บั๋ว เถง นิ่น ต้อ เบ๊าะ จ๋า เญย หวัวะ กิ่น วั้ว เต้า, “แปง เม่ย เญย หฑุ ด๊าว ฑบ เยีย ม่าะ! เหฑีย น้าย เต๋ย ไม้ เจี๋ย ก๊าด เญย เล์ย เญย เมี่ยน ต้าย ฑบ เยีย, หย่า ฮว้วด เยีย.” มป่า เถง เซาโล ต้อ หวัวะ กิ่น เญย เมี่ยน ปะหละ กั้ม เหฑีย ไห่, ไม้ คั้ง โหฒว. เซาโล ฯฒฯ เฒาะ นิ่น กั้น เญย หฑุ ด๊าว ต้าย อ๊อบ เหฌี่ย หฑุ ด๊าว กู้ หงว่าย.

5ต้อ หวัวะ กิ่น วั้ว เต้า ปวัด เซาโล ไต่ หมี่ อ๊ะ, นิ่น ฟี่ ฮนั้ง เญย อ๊อบ เหฌี่ย นิ่น กั้น เญย หฑุ ด๊าว กู้ หงว่าย ไต่ หมี่ อ๊ะ.

6ฮนั้ง หน่าย, เซาโล เหธา นิ่น เญย ปัว เต้า ตอน, เหธา เถง นิ่น ต้อ หวัวะ กิ่น เญย เมี่ยน, เหธา กัน นิ่น เญย เหยียด ฒู้ง เมี่ยน, ต้ง วั้ว ฮนอย เหยียด เหฌี่ย ไต่ เหฑ่ง.

7เยียม วั้ว นอม ฮ์อง เหธา เยียม วั้ว หง่าน หฒิ จอแดน ด้าย เญย อิสะลาเอน เมี่ยน ปวัด อิสะลาเอน เญย แปง-กวั้น ถิว เปย๋า หย่า ปวัด เซาโล เหธา นิ่น เญย ตอน ไต่ หมี่ อ๊ะ, นิ่น บัว ฯฒฯ กวั่ง เจี๊ยน นิ่น บัว เญย ฒี่ง เปย๋า เหฑ่ง. ฟีลิสะเตีย เมี่ยน ฯฒฯ เปียะ ต้าย เยียม เจี๊ยน อ๊ะ.

8ตะเหญ่ย ฮนอย ฟีลิสะเตีย เมี่ยน ต้าย ทุด เหฑ่ง หฒุ ไต๋ ไต่ เญย เมี่ยน เญย หญู่งๆ กะน้าย ฯฒฯ ปวัด เซาโล เหธา นิ่น เญย ปัว เต้า ตอน เญย เซย เยียม กินโบอา บง.

9นิ่น บัว ฯฒฯ ทุด เหฑ่ง เซาโล ม่าย เญย กะน้าย, ฮงะ นิ่น เญย มฆ้อง ดุ๊ด หย่า ไจ๊ ดุ๊ด นิ่น เญย หวัวะ กิ่น. นิ่น บัว ปุน โต่ว เฝียน เมี่ยน มี่ง ก๋อม ฟีลิสะเตีย เต่ย-ปูง ต้อ น้าย คู้ เฝียน มี่ง บั๋ว นิ่น บัว เญย หมิ่ว-ฝัง เหธา หฒวัง แปะ ฝีง.

10นิ่น บัว เฒาะ เซาโล เญย หวัวะ กิ่น อัน เจี๊ยน อัดทาโล้ด เฒี่ยน เญย หมิ่ว-เปย๊า กะญั์ว, หย่า เฒาะ เซาโล เญย เซย มี่ง ตีง เจี๊ยน เบดซาน ฒี่ง เญย ฒี่ง หลาด กู้ หงว่าย.

11ยาเบดกิเลอาด เมี่ยน หมวัง ไฮ์ ฟีลิสะเตีย เมี่ยน ฮนั้ง น้าย นอ โหฒว ปุน เซาโล,

12เหยียด ฒู้ง เบ๊าะ จ๋า เฮ้น เญย แปง ฯฒฯ เฒี่ยง ม์วน มี่ง เถา เบดซาน เญย ฒี่ง หลาด เฒาะ เซาโล เหธา นิ่น เญย ตอน เญย เซย เหฌี่ย, แอ๋ง ต้อ ต้าย เถา ยาเบด ฯฒฯ เยียม หน่าย หฮวา เซย.

13นิ่น บัว ต้อ บู๊ง มี่ง หฒัง เจี๊ยน เยียม ยาเบด, ลิ่น เลี์ยว เดี๋ยง กะเดี๊ย, หย่า เฒย ไม้ หญั่น หาย หญู่ง ปวั๊ง เสี่ย ฮนอย.

← Chapter 30 Jump to: