1 Samuel 16

Mien Bible (Thai Script) © Thailand Bible Society, 2007

← Chapter 15 Jump to: Chapter 17 →

1เฒี้ยว ก๊อง บั๋ว ซามูเอน, “เม่ย อ๋อย เหว่ย เซาโล เฑ่า ด่ง หาย เล่า? เยีย ทุด กวั่ง นิ่น, ไม้ ปุน นิ่น โหฒว ฮู่ง กุ๊น อิสะลาเอน เมี่ยน. เม่ย อ๋อย หฒุ เฒาะ โย่ว ติ้น ปวั๊ง เม่ย เญย แซง-คู้ จอง ฯฒฯ มี่ง อ๊ะ. เยีย อ๋อย พ้าย เม่ย มี่ง ล์อ เบดเลเฮม เมี่ยน, เจียดซี, เหว่ย หฒุ เยียม นิ่น เญย เหยียด ฒู้ง ตอน เญย บุด๋ง เยีย เหว่ย กั้น กิ๊น เต้า โหฒว ฮู่ง.”

2ซามูเอน ก๊อง, “เยีย ฮนั้ง หาย นอ ไฮ่ มี่ง? สี ก๊อง เซาโล ไฮ์ นอ, นิ่น ฒู้ง อ๋อย ไต๋ เยีย.” เฒี้ยว ก๊อง, “ต้อ เต้า ยั่ง ง่ง เญ์ย เหธา เจี๊ยน เม่ย มี่ง หย่า ก๊อง, ‘เยีย ต้าย อ๋อย ฝ่ง ห่อ เหฒี่ย ปุน เฒี้ยว.’

3บั๋ว เจียดซี เหธา เจี๊ยน ต้าย ฝ่ง ห่อ เหฒี่ย, เยีย ฯฒฯ บั๋ว เม่ย, เม่ย หอบ ฒุ ฮนั้ง หาย นอ โหฒว. เยีย บั๋ว เม่ย ฮิ้ว ตุ๊ หาย เต้า เญย บั๋ว, เม่ย อ๋อย หฒุ หล่ง โย่ว ออน วั้ว เต้า.”

4ซามูเอน ฯฒฯ เอย เจี๊ยน เฒี้ยว เญย หว่า โหฒว. นิ่น เถา เบดเลเฮม วั้ว หฒั่น, วั้ว นอม มู้ง เญย เมี่ยน โก๋ ฯฒฯ ซิน หฒิน ญั่นๆ เญย ธ้วด ต้าย ฒิบ นิ่น หย่า หน่าย ก๋า นิ่น, “เม่ย ต้าย เหว่ย แป้ง ออน เญย เจ๊า ไฟ?”

5ซามูเอน เตา, “เยีย ต้าย เหว่ย แป้ง ออน. เยีย ต้าย ฝ่ง ห่อ เหฒี่ย ปุน เฒี้ยว. เม่ย บัว อ๋อย หฒุ สา กั้น ธีง-เหฑ่ง ต้าย เหธา เยีย มี่ง ฝ่ง ห่อ เหฒี่ย.” ซามูเอน ฯฒฯ สา เจียดซี เหธา นิ่น เญย ตอน บัว ธีง-เหฑ่ง ต้าย หย่า เห่ว นิ่น บัว มี่ง เหธา เจี๊ยน ฝ่ง ห่อ เหฒี่ย.

6ฆะฮ้า นิ่น บัว ต้าย เญย เฒี่ยง โห่, ซามูเอน หมั่ง ปวัด เอลีอับ ฯฒฯ เยียม เฮญี้ยว ฮนั้ม, “ต้ง เฒี้ยว ออน วั้ว เต้า ด่ง หาย ฒู้ง โซ้ว เจี๊ยน น้าย, เฒี้ยว เญย หฑะเฮมียน อ๊ะ.”

7มป่า เฒี้ยว ก๊อง บั๋ว ซามูเอน, “ไม้ ตู๋ง หมั่ง นิ่น เญย เป้ย หฒั่ง ไฟ นิ่น เญย ซิน-เพย เฒี่ยง ตุ๊ ฮลัง. เยีย ไม้ หล่ง นิ่น, เหว่ย หฒุ เฒี้ยว หมั่ง ไม้ ฮนั้ง ป้าม เมี่ยน หมั่ง. ป้าม เมี่ยน หมั่ง กะเหญี่ย เป้ย หฒั่ง, มป่า เฒี้ยว หมั่ง กะญั์ว เฮญี้ยว.”

8เจียดซี ฯฒฯ เห่ว อาบีนาดับ ยั่ง เจ๊า เจี๋ย ซามูเอน เญย หฑะเฮมียน. ซามูเอน ก๊อง, “ เฒี้ยว หย่า ไม้ กิ๊น น้าย เต้า.”

9เจียดซี ฯฒฯ เห่ว ซัมมา เจี๋ย มี่ง, มป่า ซามูเอน ก๊อง, “ เฒี้ยว หย่า ไม้ กิ๊น น้าย เต้า.”

10เจียดซี เห่ว นิ่น เญย เสี่ย เต้า ตอน ยั่ง เจ๊า เจี๋ย ซามูเอน เญย หฑะเฮมียน. ซามูเอน ก๊อง บั๋ว เจียดซี, “ เฒี้ยว ไม้ กิ๊น น้าย เต๋ย เมี่ยน.”

11ซามูเอน หน่าย เจียดซี, “เม่ย เญย ตอน เหยียด ฒู้ง ม่าย บัวะ น้าย เต้า ฮนั้ง ไฟ?” เจียดซี เตา, “แอ๋ง ม่าย เต้า ตอน-ลาย มป่า นิ่น มี่ง ปู๋ง ปะกี ยู่ง หมี่ อ๊ะ.” ซามูเอน ก๊อง บั๋ว เจียดซี, “อ๋อย หฒุ พ้าย เมี่ยน มี่ง เห่ว นิ่น หฑวน ต้าย. นิ่น ไม้ แก้ง เถา, เยีย บัว ฒู้ง ไม้ เฒว์ย.”

12เจียดซี ฯฒฯ พ้าย เมี่ยน มี่ง เห่ว วั้ว เต้า ตอน หฑวน ต้าย. น้าย เต้า ตอน เซ เฮมียน-เซ้ด ฌัง, ซิ เญย. เฮมียน-ฝัง เฒี่ยง ตุ๊ เหฑว่ย. ซิน-เพย หย่า เฒี่ยง ตุ๊ หลง. เฒี้ยว ก๊อง, “ต้ง น้าย เต้า อ๊ะ. กุ๊น หล่ง โย่ว ออน นิ่น ม่าะ!”

13ซามูเอน ฯฒฯ เฒาะ ตั๊บ เจี๊ยน จอง เญย โย่ว เยียม วั้ว เต้า ตอน เญย หฒวัง ก๋อ บุด๋ง ออน นิ่น. เยียม วั้ว ฮนอย ต้าย เฒี้ยว เญย สีง ลี่ง ธั้มๆ เญย เยียม เจี๊ยน ดาวิด. ซามูเอน ฯฒฯ เจี์ย ซิน หฑวน ลามา หมี่ อ๊ะ.

14เฒี้ยว เญย สีง ลี่ง เล่ย ฆอย เซาโล หมี่ อ๊ะ. แอ๋ง ม่าย เอ๊าะ เญย เมี้ยน เยียม เฒี้ยว ต้าย ม่อ นิ่น.

15เซาโล เญย โปว บัว ฯฒฯ ก๊อง บั๋ว เซาโล, “อี้ หฒั่น ม่าย เอ๊าะ เญย เมี้ยน เยียม ทิน-ฮู่ง ต้าย ม่อ เจี๊ยน ฮู่ง เตี๋ย เยียม.

16โท้ เม่ย, เยีย บัว เญย เฒี้ยว, พ้าย เยียม เม่ย เญย หฑะเฮมียน เญย โปว มี่ง ล์อ เต้า ต้ง ไฮ่ พัด ต้าน ป้า เหลี่ยว เญย เมี่ยน ต้าย. เยียม ทิน-ฮู่ง ต้าย เญย เอ๊าะ เมี้ยน หาย หฒั่น ต้าย เยียม ฮู่ง เตี๋ย เญย ซิน นอ, เห่ว นิ่น พัด ต้าน ป้า, ฮู่ง เตี๋ย ฯฒฯ หลง หมี่ อ๊ะ.”

17เซาโล ฯฒฯ บั๋ว นิ่น เญย โปว, “เม่ย บัว กุ๊น มี่ง เหว่ย เยีย ล์อ เต้า ไฮ่ พัด ต้าน ป้า หย่าว เญย เมี่ยน หย่า ต้อ นิ่น ต้าย เยีย น้าย.”

18ม่าย เต้า โฮ่ว แซง ก๊อง, “เยีย ปวัด เบดเลเฮม เมี่ยน, เจียดซี, ม่าย เต้า ตอน พัด ต้าน ป้า เหลี่ยว ไห่. นิ่น ต๊าม โฮล, เบ๊าะ จ๋า เฮ้น. นิ่น ก๊อง หว่า บย่าง เญย, เฮมียน-ฝัง หย่า เฒี่ยง ตุ๊ เหฑว่ย. เฒี้ยว หย่า เหธา นิ่น เยียม.”

19ฮนั้ง หน่าย เซาโล ฯฒฯ ฝูง โต่ว เฝียน เมี่ยน มี่ง บั๋ว เจียดซี, “โท้ ปุน เม่ย เญย ตอน, ดาวิด, ต้ง เหธา ปะกี ยู่ง เยียม วั้ว เต้า ตอน, ต้าย เยีย น้าย.”

20เจียดซี ฯฒฯ พ้าย นิ่น เญย ตอน, ดาวิด, มี่ง หย่า เฒาะ ฌั้ว เหธา เหยียด ด๊บ-บัวะ อะหงุ่น ติ๊ว เหธา เต้า ยู่ง ตอน ปุน ล่อ ทอ เจี๊ยน มี่ง ฝูง ปุน เซาโล.

21ดาวิด มี่ง เถา เซาโล วั้ว ฯฒฯ โหฒว ฮู่ง เตี๋ย เญย กง. เซาโล ฮนั้ม ไห่ ดาวิด. ดาวิด หย่า ตุ๊ โหฒว เถง เซาโล ต้อ หวัวะ กิ่น เญย เมี่ยน.

22เซาโล ฝูง เฝียน มี่ง บั๋ว เจียดซี, “โท้ ปุน ดาวิด เยียม น้าย โหฒว เยีย เญย กง, เหว่ย หฒุ นิ่น หอบ เยีย เญย เฮญี้ยว ไห่.”

23เยียม ทิน-ฮู่ง ต้าย เญย เอ๊าะ เมี้ยน หาย หฒั่น ต้าย ม่อ เซาโล, ดาวิด ฯฒฯ เฒาะ ต้าน ป้า ต้าย พัด ปุน เซาโล หมวัง. เซาโล ฯฒฯ ไฮ์ คู่ เยียม, หลง อ๊ะ. เอ๊าะ เญย เมี้ยน หย่า เล่ย ฆอย นิ่น หมี่ อ๊ะ.

← Chapter 15 Jump to: Chapter 17 →