1 Samuel 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1ซามูเอน เญย หว่า ฯฒฯ มี่ง ก๋อม อิสะลาเอน เต่ย-ปูง. อิสะลาเอน เมี่ยน ธ้วด มี่ง เหธา ฟีลิสะเตีย เมี่ยน เบ๊าะ จ๋า. นิ่น บัว เหลียบ เธี้ยง เยียม เอเบนเอเซ. ฟีลิสะเตีย เมี่ยน เหลียบ เธี้ยง เยียม อาเฟ้ก.

2ฟีลิสะเตีย เมี่ยน ปุน นิ่น บัว เญย แปง ตอง เจี๊ยน อิสะลาเอน เมี่ยน ไบ้ เจี๊ยน. เบ๊าะ จ๋า กุ๊น โหฒว กุ๊น โฮล เญย เฒี่ยง โห่, อิสะลาเอน เมี่ยน เซวย ฟีลิสะเตีย เมี่ยน. ฟีลิสะเตีย เมี่ยน เยียม วั้ว เบ๊าะ จ๋า เธี้ยง ไต๋ ไต่ เล่ย ไม้ โก เปยย ธิน เต้า อิสะลาเอน เมี่ยน.

3อิสะลาเอน เมี่ยน เญย แปง หฑวน เถา เธี้ยง วั้ว หฒั่น, อิสะลาเอน เญย เมี่ยน โก๋ ก๊อง, “ เฒี้ยว อี้ ฮนอย เหว่ย หาย ติ่ว ปุน บัว เซวย ฟีลิสะเตีย เมี่ยน? อ๋อย หฒุ มี่ง ซีโล ต้อ เฒี้ยว เญย แล์ง แหง่ง หว่า ฟาง ต้าย เหว่ย ปุน เฒี้ยว ต้าย เยียม บัว บุด๋ง, เถง บัว เปย๋า ดุ๊ด วิน-วั้ง เญย ปั์ว-เดี๊ย.”

4นิ่น บัว ฯฒฯ พ้าย เมี่ยน มี่ง ซีโล วั้ว, ต้อ แล์ง แหง่ง หว่า ฟาง ต้าย, เซ ม่าย เน่น เจี๋ย เญย เฒี้ยว เยียม วั้ว เต๋ย อี เต้า เคลูบิม บุด๋ง เญย เหว่ย เญย ฟาง. เอลี เญย อี เต้า ตอน, โฮ้บนี เหธา ฟีเนหัด, เหธา เจี๊ยน ทิน-ฮู่ง เญย แล์ง แหง่ง หว่า ฟาง ต้าย.

5เฒี้ยว เญย แล์ง แหง่ง หว่า ฟาง เปียะ เธี้ยง กะญั์ว วั้ว หฒั่น, อิสะลาเอน เญย หฒวัง เมี่ยน ชะ เห่ว เฉีย บุย เญย, ฒู้ง ดั่น หฒุ เดา ต์ง.

6ฟีลิสะเตีย เมี่ยน หมวัง ไฮ์ เห่ว เญย เฉีย บุย, นิ่น บัว ก๊อง, “เยียม ฮิบลู เมี่ยน เญย เธี้ยง ฝู่ง ม่าย เห่ว เญย เฉีย ด่ง หน่าย บุย? โหฒว หาย หญู่ง มเปย?” ฆะฮ้า นิ่น บัว ฮิ้ว ตุ๊ อิสะลาเอน เมี่ยน ต้อ เฒี้ยว เญย แล์ง แหง่ง หว่า ฟาง ต้าย เถา เธี้ยง หมี่ อ๊ะ.

7ฟีลิสะเตีย เมี่ยน กั้ม เหฑีย ไห่. นิ่น บัว ก๊อง, “ม่าย เต้า เฒี่ยน ต้าย เถา เธี้ยง หมี่ อ๊ะ.” นิ่น บัว แอ๋ง ก๊อง, “บัว อ๋อย หฒุ โค้ว อ๊ะ, เหว่ย หฒุ บัว ไม้ ปวั้ง เจี๋ย น้าย หญู่ง สี่.

8บัว อ๋อย หฒุ โค้ว อ๊ะ. หาย เต้า ไฮ่ เถง บัว เปย๋า ดุ๊ด น้าย เต๋ย เฮ้น ไห่ เญย เฒี่ยน? ต้ง น้าย เต๋ย เฒี่ยน ฒิ่น ด่าง เยียม เต่ย-ปูง-ฮวาง หล่ง หญู่งๆ เหฒะ หน่าน ไต๋ ไต่ อียิบ เมี่ยน.

9โอ ฟีลิสะเตีย เมี่ยน อ้า! เม่ย บัว อ๋อย หฒุ หฒูง ต๊าม หย่า โหฒว จุน-เฒ้ย เมี่ยน. ไม้ เฒย แอ๊ะ, เม่ย บัว หฒุ โหฒว ฮิบลู เมี่ยน เญย โน่ว ฮนั้ง ฒิ่น ด่าง นิ่น บัว โหฒว เม่ย บัว เญย โน่ว นอ. อ๋อย หฒุ โหฒว จุน-เฒ้ย เมี่ยน ธ้วด มี่ง เบ๊าะ จ๋า.”

10ฟีลิสะเตีย เมี่ยน ฯฒฯ เหธา อิสะลาเอน เมี่ยน เบ๊าะ จ๋า. อิสะลาเอน เมี่ยน เซวย นิ่น บัว, เก๊าะ-เมี่ยน เปย๋า หฑวน เก๊าะ-เมี่ยน กั้น เญย ด๊บ-ลิ่ว มี่ง. วั้ว หฑุ่น หฒะเก้ง ม่าย แปง ธั้ม เญย หฒุ ไต๋ ไต่, เหว่ย หฒุ อิสะลาเอน เญย ปัว หว่าน เต้า ยั่ง เดา แปง หฒุ ไต๋ ไต่ หมี่ อ๊ะ.

11ทิน-ฮู่ง เญย แล์ง แหง่ง หว่า ฟาง หย่า หฒุ ธ้าง มี่ง. เอลี เญย อี เต้า ตอน, โฮ้บนี เหธา ฟีเนหัด, หย่า หฒุ ไต๋ ไต่ หมี่ อ๊ะ.

12ต้ง วั้ว ฮนอย ม่าย เต้า เบนยามิน ฝีง เญย เมี่ยน เยียม เบ๊าะ จ๋า เธี้ยง ถิว มี่ง เถา ซีโล. นิ่น เญย ลุย-โหว เป๊ด ฮู้, มฆ้อง หย่า ม่าย เนีย-บูง หฮยาม เจี๊ยน.

13น้าย เต้า เมี่ยน ต้าย เถา วั้ว หฒั่น, เอลี เยียม วั้ว เจ๊า-เฮลน เฒว์ย เจี๊ยน นิ่น กั้น เญย ต๋อง ฒั้ว หมั่ง. นิ่น เหว่ย ทิน-ฮู่ง เญย แล์ง แหง่ง หว่า ฟาง เฮญี้ยว ฮวาง. วั้ว เต้า เมี่ยน เปียะ ฒี่ง ต้าย บั๋ว เฝียน, เยียม ฒี่ง เญย เหยียด ฒู้ง เมี่ยน เหน่า เจี์ย ต้าย.

14เอลี ไฮ์ เมี่ยน เห่ว เญย เฉีย บุย ฯฒฯ หน่าย, “โหฒว หาย หญู่ง เบี้ยวๆ เญย เห่ว ด่ง หน่าย บุย?” ต้อ เฝียน วั้ว เต้า เมี่ยน ฯฒฯ ก๊าน เจี๊ยน ต้าย บั๋ว เฝียน เอลี.

15วั้ว หฒั่น เอลี เญย หฮญัง-เจ๊ย ตุ๊ จั๊ว เหฒียบ เป๊ด หฮญัง. นิ่น เญย มฒีง ตี่ง หมี่ อ๊ะ, หมั่ง ไม้ ปวัด หาย หญู่ง.

16วั้ว เต้า เมี่ยน ก๊อง บั๋ว เอลี, “เซ ต้ง เยีย เยียม เบ๊าะ จ๋า เธี้ยง ต้าย. อี้ ฮนอย เยีย เยียม เบ๊าะ จ๋า เญย เฒี่ยง โห่ เปย๋า หฑวน.” เอลี หน่าย, “อา ตอน อ่า, ฮนั้ง หาย นอ?”

17ต้อ เฝียน เญย เมี่ยน เตา, “อิสะลาเอน เมี่ยน เยียม ฟีลิสะเตีย เมี่ยน เญย วั้ว ด่าง แหมง เปย๋า. เยียม แปะ ฝีง เญย บุด๋ง เมี่ยน หฒุ ไต๋ ไต่ ธั้ม ไห่. เม่ย เญย อี เต้า ตอน, โฮ้บนี เหธา ฟีเนหัด, หย่า หฒุ ไต่ หมี่ อ๊ะ. ทิน-ฮู่ง เญย แล์ง แหง่ง หว่า ฟาง หย่า หฒุ ธ้าง มี่ง หมี่ อ๊ะ.”

18วั้ว เต้า เมี่ยน เยี้ยด ก๊อง เถา ทิน-ฮู่ง เญย แล์ง แหง่ง หว่า ฟาง, เอลี ฯฒฯ เยียม ฒี่ง แก้ง กะเฮลน, นิ่น เฒว์ย เญย ต๋อง วั้ว, ตะหฑยาว คีง ฆะฮ้า แหมง. นิ่น เญย จาง เน้า, ฯฒฯ ไต่ หมี่ อ๊ะ, เหว่ย หฒุ นิ่น โก๋ ไห่, ซิน-เซย หย่า เฮนี้ย. เอลี โหฒว อิสะลาเอน เมี่ยน เญย ต้ม เจียน เฝย เหฒียบ หฮญัง.

19วั้ว หฒั่น เอลี เญย บวั์ง, ฟีเนหัด เญย เอ๊า, ม่าย เจี๊ยน ซิน อ๊า ลั่ม เถา ดุ๊ด ซิน เญย เฒี่ยง โห่. นิ่น ไฮ์ เฝียน ก๊อง ทิน-ฮู่ง เญย แล์ง แหง่ง หว่า ฟาง หฒุ ธ้าง มี่ง, นิ่น เญย อง-ปั่ว เหธา นิ่น เญย โหฆ หย่า ไต่ หมี่ อ๊ะ. นิ่น ฯฒฯ เลี่ยม เฒ่ย มุน กู้งว์า, ยู์ง ตุ๊ เต้า ตอน. นิ่น หฒะเก้ง มุน ตุ๊ โค้ว ไห่.

20ต้ง นิ่น อ๊า ลั่ม ตั๋ง เฉีย วั้ว หฒั่น, เถง โก๋ว นิ่น วั้ว เต๋ย มเซียะ ตอน ก๊อง บั๋ว นิ่น, “ไม้ ตู๋ง กั้ม เหฑีย โอ่, เหว่ย หฒุ เม่ย ยู์ง ตุ๊ เต้า ตอน.” มป่า นิ่น ไม้ เตา, หย่า ฮนั้ง หมวัง ไม้ ไฮ์ นอ.

21นิ่น เถง นิ่น เญย ตอน ธ้วด บั๋ว เห่ว อีคาโบด หย่า ก๊อง, “ฌัง-หล่าง เล่ย ฆอย อิสะลาเอน หมี่ อ๊ะ.” เหว่ย หฒุ ทิน-ฮู่ง เญย แล์ง แหง่ง หว่า ฟาง หฒุ ธ้าง มี่ง, นิ่น เญย อง-ปั่ว เหธา นิ่น เญย โหฆ หย่า ไต่ หมี่ อ๊ะ.

22นิ่น แอ๋ง ก๊อง, “ฌัง-หล่าง เล่ย ฆอย อิสะลาเอน, เหว่ย หฒุ ทิน-ฮู่ง เญย แล์ง แหง่ง หว่า ฟาง หฒุ ธ้าง มี่ง หมี่ อ๊ะ.”

← Chapter 3 Jump to: Chapter 5 →