1 Samuel 30

Mien Bible (Thai Script) © Thailand Bible Society, 2007

← Chapter 29 Jump to: Chapter 31 →

1ฆะฮ้า เถา ตะฟาม ฮนอย, ดาวิด เหธา เจี๊ยน นิ่น เญย เมี่ยน ต้าย เถา สิกล้าก ฒี่ง, อามาเล้ก เมี่ยน ฒู้ง ต้าย ลู้ เนเกบ หย่า ลู้ สิกล้าก หมี่ อ๊ะ. นิ่น บัว เบ๊าะ ฮี่ง สิกล้าก, หย่า หล่ง โต์ว ปั๊ว ชุย เหฑ่ง.

2นิ่น บัว เฒาะ เยียม วั้ว นอม มู้ง เญย เหยียด ฒู้ง มเซียะ ตอน, เลี่ยม ฝุเจว๊ย เหธา ต้ม เมี่ยน, ไม้ ไต๋ หาย เต้า, หย่า เฒาะ นิ่น บัว ต้อ เจี๊ยน มี่ง เหฑ่ง.

3วั้ว หฒั่น ดาวิด เหธา เจี๊ยน นิ่น เญย เมี่ยน ต้าย เถา สิกล้าก ฒี่ง, ฯฒฯ ปวัด วั้ว นอม ฒี่ง หฒุ โต์ว ปั๊ว เหฑ่ง. นิ่น บัว เญย เอ๊า เหธา ตอน เซียะ หฒุ อามาเล้ก เมี่ยน ต้อ มี่ง เหฑ่ง.

4ดาวิด เหธา เจี๊ยน นิ่น เญย แปะ ฝีง เญี้ยม เฉีย บุย ไห่. นิ่น บัว เญี้ยม เกา เลี่ยม ไม้ ม่าย ชะ อ๊ะ.

5ดาวิด เญย อี เต้า เอ๊า เซ ยิดเลเอน เมี่ยน, อาหิโนอัม, เหธา คานเมน เมี่ยน, นาบาน เญย เอ๊า-กว๊า, บั๋ว เห่ว อาบีกายิน, หย่า หฒุ เฒาะ ต้อ เจี๊ยน มี่ง หมี่ อ๊ะ.

6ดาวิด ขวน เฮญี้ยว ธั้ม ไห่, เหว่ย หฒุ แปะ ฝีง ก๊อง อ๋อย หล่ง หละเปย๊ย ฒง ไต่ นิ่น อ๊ะ. เหยียด ฒู้ง แปะ ฝีง เหว่ย กั้น เญย ตอน เซียะ เฑ่า โค้ว ไห่. มป่า ดาวิด เขา เฒี้ยว, นิ่น เญย ทิน-ฮู่ง, ตุ๊ ชะ ฝาว ต้าย.

7ดาวิด ก๊อง บั๋ว อาหิเมเล้ก เญย ตอน, อาบียาทา ไซ เมี่ยน, “โท้ เม่ย ต้อ เอโฟ้ด ต้าย ปุน เยีย.” อาบียาทา ฯฒฯ ต้อ ต้าย ปุน ดาวิด.

8ดาวิด หน่าย เฒี้ยว, “เยีย หอบ หฒุ มี่ง หฒุ่น น้าย กวั้น หฒะ แปง เญย ไฟ? เยีย บัว ไฮ่ หฒุ่น ตุ๊ หฒ่าย นิ่น บัว เญย ไฟ?” ทิน-ฮู่ง เตา นิ่น, “กุ๊น มี่ง หฒุ่น ม่าะ! เม่ย ด่ง หาย ฒู้ง หฒุ่น ตุ๊ หฒ่าย นิ่น บัว หย่า เถง ตุ๊ เม่ย เญย เมี่ยน.”

9ดาวิด ฯฒฯ เหธา เจี๊ยน นิ่น เญย หลัวะ แป๊ะ เต้า เมี่ยน หฒุ่น เจี๊ยน อามาเล้ก เมี่ยน มี่ง. นิ่น บัว ต้าย เถา เบโส โด๊ะ. ฆะฮ้า ลาย วั้ว เต๋ย แปง ฯฒฯ ตี้ง เจี๊ยน วั้ว.

10มป่า ดาวิด กั้น เหธา เฝย แป๊ะ เต้า เมี่ยน หฒุ่น เจี๊ยน อามาเล้ก เมี่ยน มี่ง. ม่าย หญี่ แป๊ะ เต้า เมี่ยน เมา ไห่, เจี๋ย ไม้ ตุ๊ เบโส โด๊ะ, ฯฒฯ ตี้ง เจี๊ยน วั้ว.

11นิ่น บัว ปวั้ง หฒุ เต้า อียิบ เมี่ยน เยียม วั้ว เดา-ฌัง ฯฒฯ ต้อ นิ่น ต้าย ปวั้ง ดาวิด. นิ่น บัว ปุน ฌั้ว นิ่น หญั่น, ปุน ววม นิ่น ฮบ,

12ปุน คว้าย ง่ง หญอ เปี๊ยว เญย ฌั้ว นิ่น หญั่น เหธา อี ดุ้น อะหงุ่น เปี๊ยว-ฆาย. นิ่น หญั่น ลิ์ว ฯฒฯ เฮ้น เจี์ย ต้าย, เหว่ย หฒุ นิ่น ไม้ ตุ๊ หญั่น หฮนาง, ไม้ ตุ๊ ฮบ ววม ตุ๊ ปัว ฮนอย ปัว ม์วน อ๊ะ.

13ดาวิด หน่าย นิ่น, “เม่ย หาย เต้า เญย เมี่ยน หย่า เยียม หาย เดา ต้าย?” นิ่น เตา, “เยีย อียิบ เมี่ยน, โหฒว อามาเล้ก เมี่ยน เญย โน่ว, ต้ง ปัว ฮนอย เจี๋ย ต้าย น้าย เยีย ไม้ หลง. เยีย เญย เฒี้ยว กวั่ง เจี๊ยน เยีย มี่ง หมี่ อ๊ะ.

14เยีย บัว ต้าย ลู้ เคเลที เมี่ยน เญย เนเกบ, หย่า ลู้ ยูดา เต่ย เหธา คาเล้บ เต่ย เญย เนเกบ. เยีย บัว หล่ง โต์ว ปั๊ว เหฑ่ง สิกล้าก ฒี่ง.”

15ดาวิด หน่าย นิ่น, “เม่ย ไฮ่ ต้อ เยีย บัว เหฌี่ย เถา วั้ว กวั้น แปง เญย ไฟ?” นิ่น เตา, “เม่ย อ๋อย หฒุ เฒี้ยง เจี๊ยน ทิน-ฮู่ง แล์ง หว่า ก๊อง เม่ย ไม้ ไต๋ เยีย หย่า ไม้ เฒาะ เยีย จิว ปุน เยีย เญย เฒี้ยว, เยีย ฯฒฯ ต้อ เม่ย มี่ง เถา วั้ว กวั้น หฒะ แปง.”

16นิ่น ต้อ ดาวิด บัว เหฌี่ย เถา วั้ว, หมั่ง ม่าะ! ปวั้ง วั้ว เต๋ย เมี่ยน เยียม ปวั๊ง เหฑ่ง วั้ว ปั๊วะ เดา. นิ่น บัว หญั่น หย่า ฮบ หย่า หธัง เหย, เหว่ย หฒุ นิ่น บัว ลู้ ฟีลิสะเตีย เต่ย-ปูง เหธา ยูดา เต่ย-ปูง เญย หญั่น ฮบ ธั้ม ไห่.

17เยียม ตะเหญ่ย ดอม ลู่ง เบี์ยวๆ ฌัง เญย เฒี่ยง โห่, ดาวิด ไต๋ เจี๊ยน อามาเล้ก เมี่ยน มี่ง เถา ลู่ง ม์าน-หฮมวัง. ไม้ ม่าย หาย เต้า ตุ๊ ธ้วด สีง แหม่ง ธ้วด ลิ์ว เฝย แป๊ะ เต้า เมี่ยน หลุน เมี่ยน เก้ เจี๊ยน ล่อ ท่อ เปย๋า.

18อามาเล้ก เมี่ยน ลู้ มี่ง เญย เหยียด ฒู้ง กะน้าย ดาวิด เฒาะ หฑวน เหฑ่ง ต้าย, เลี่ยม นิ่น เญย อี เต้า เอ๊า.

19นิ่น ไม้ ธา เหยียด หญู่ง, ไม้ กุ๊น กะน้าย โธว ไฟ กะน้าย หม่วน, ตอน ไฟ เซียะ, ต้ง นิ่น บัว ธ้าง มี่ง เญย กะน้าย ไฟ ลู้ ต้อ มี่ง เญย กะน้าย, ดาวิด เฒาะ หฑวน เหฑ่ง.

20ดาวิด แอ๋ง เฒาะ อามาเล้ก เมี่ยน เญย เหยียด ฒู้ง ง่ง กวั้น ยู่ง กวั้น. นิ่น เญย เมี่ยน ฯฒฯ หฒุ่น เจี๊ยน เหยียด ฒู้ง แซง-คู้ กวั้น เญย วั้ว ด่าง แหมง หย่า ก๊อง, “น้าย เซ ดาวิด ธ้าง ตุ๊ ต้าย เญย ป่วน.”

21ดาวิด หฑวน เถา เมา โค้ว, ไม้ ม่าย ชะ กัน ดาวิด มี่ง ฯฒฯ เลี่ยว เจี๊ยน เยียม เบโส โด๊ะ วั้ว เต๋ย หญี่ แป๊ะ เต้า. นิ่น บัว ฯฒฯ ธ้วด ต้าย ฒิบ ดาวิด เหธา กัน ดาวิด มี่ง เญย เมี่ยน. ดาวิด เหธา นิ่น เญย เมี่ยน เถา ฟัด เต๋ย, นิ่น ฯฒฯ เฒาะ เยียะ ก๊อง หวุ่ย ปวั้ง หว่า ปุน นิ่น บัว.

22กัน ดาวิด มี่ง เญย เมี่ยน ม่าย เต๋ย เอ๊าะ เมี่ยน เหธา เมี่ยน หว่าย เมี่ยน ก๊อง, “น้าย เต๋ย เมี่ยน ไม้ กัน บัว มี่ง. บัว ธ้าง ต้าย เญย กะน้าย บัว ไม้ ปุน นิ่น บัว. ขูง ปุน เก๊าะ-เมี่ยน ต้อ เก๊าะ-เมี่ยน เญย เอ๊า-เจว๊ย มี่ง อ๊ะ.”

23มป่า ดาวิด ก๊อง, “เยีย เญย ก๋อ-โย์ว อ่า, เม่ย บัว ไม้ ตู๋ง ฮนั้ง หน่าย นอ โหฒว ปุน ต้ง เฒี้ยว จิว ปุน บัว ธ้าง ตุ๊ ต้าย เญย กะน้าย. นิ่น เปว เจี๊ยน บัว หย่า เฒาะ ต้ง ต้าย ลู้ บัว วั้ว กวั้น หฒะ แปง จิว ปุน เยียม บัว เญย ปั์ว-เดี๊ย.

24น้าย เต๋ย สี่ ม่าย หาย เต้า ไฮ่ หมวัง เม่ย บัว? มี่ง เบ๊าะ จ๋า เญย เมี่ยน ตุ๊ ธ้าง ต้าย เญย กะน้าย บัวะ เหฒีย, ฒั้ว กะน้าย เญย เมี่ยน หย่า หอบ ตุ๊ บัวะ วั้ว. ตุ๊ ธั้ม โหฒะ, นิ่น บัว อ๋อย หฒุ ตุ๊ ฟี่ บัวะ เหฑ่ง.”

25เยียม หน่าย ต้าย, ดาวิด ฯฒฯ เหลียบ น้าย ติ่ว เล์ย-ฝีง เป๋น อิสะลาเอน เมี่ยน เญย เล์ย-หลัด เถา อี้ จ๋า ฮนอย.

26ดาวิด หฑวน เถา สิกล้าก ฒี่ง, นิ่น เฒาะ เต๋ย ธ้าง ตุ๊ ต้าย เญย กะน้าย ฝูง ปุน นิ่น เญย ต่อย, เซ ต้ง ยูดา เต่ย-ปูง เญย เมี่ยน โก๋. นิ่น ก๊อง, “เยีย เฒาะ น้าย เต๋ย ฒี่ง เหญ่ย ฝูง ปุน เม่ย บัว, เซ เยียม เฒี้ยว เญย วิน-วั้ง ธ้าง ตุ๊ ต้าย เญย กะน้าย.”

27ดาวิด ฝูง ฒี่ง เหญ่ย ปุน เยียม เบดเอน ฒี่ง เญย เมี่ยน, เนเกบ, ลาโม้ด ฒี่ง เหธา ย้าดที มู้ง เญย เมี่ยน,

28เยียม อาโลเอ ฒี่ง, สิบโม้ด, เอดเทโมอา เญย เมี่ยน,

29เยียม ลาคาน ฒี่ง เญย เมี่ยน เหธา เยียม เยลาเมเอน เหธา เคไน เมี่ยน เญย ฒี่ง เญย เมี่ยน,

30เยียม โฮมา ฒี่ง, โบลาชาน มู้ง เหธา อาท้าก มู้ง เญย เมี่ยน,

31เหธา เยียม เฮโบโลน ฒี่ง เญย เมี่ยน. นิ่น ฝูง กะน้าย ปุน นอมๆ ต๋อง เญย เมี่ยน, ต้ง ดาวิด เหธา นิ่น เญย เมี่ยน เจี๋ย มี่ง เจี๋ย ต้าย เญย ต๋อง.

← Chapter 29 Jump to: Chapter 31 →