1 Samuel 21

Mien Bible (Thai Script) © Thailand Bible Society, 2007

← Chapter 20 Jump to: Chapter 22 →

1ดาวิด ฯฒฯ มี่ง เถา โน้บ มู้ง, อาหิเมเล้ก ไซ เมี่ยน วั้ว. อาหิเมเล้ก ซิน หฒิน เจี๊ยน ธ้วด ต้าย ฒิบ ดาวิด. นิ่น ก๊อง, “เหว่ย หาย ติ่ว เม่ย กั้น ต้าย ฮนั้ง, ไม้ ม่าย หาย เต้า เหธา เม่ย ต้าย ไฟ?”

2ดาวิด ก๊อง บั๋ว อาหิเมเล้ก ไซ เมี่ยน, “ฮู่ง เตี๋ย พ้าย เยีย โหฒว เหยียด หญู่ง เจ๊า หย่า ก๊อง บั๋ว เยีย, ‘เยีย พ้าย เญย หว่า หย่า จิว ปุน เม่ย โหฒว เญย ไม้ ตู๋ง บั๋ว หาย เต้า.’ เยีย เหธา กวั้น เมี่ยน หลุน เมี่ยน ตุ๋น เหฒียง ต่อย อ๋อย ปวั้ง เหยียด นอม ต๋อง.

3เม่ย ม่าย เต๋ย หาย หญู่ง หญั่น เยียม เม่ย น้าย ไฟ? โท้ ปุน ปยา นอม ฌั้ว เยีย ไฟ เยียม เม่ย น้าย ม่าย หาย หญู่ง หญั่น ฮบ หย่า ตุ๊.”

4ไซ เมี่ยน เตา ดาวิด, “เยีย ไม้ ม่าย โพว-ทง เญย ฌั้ว. ขูง ม่าย เต๋ย ธีง-เหฑ่ง เญย ฌั้ว ฮนั้ง. ตะฟ่าน โท้ ปุน วั้ว เต๋ย เมี่ยน หลุน เมี่ยน ไม้ ตุ๊ เปว๋ย มเซียะ ตอน, นิ่น บัว หญั่น ตุ๊ เญย.”

5ดาวิด เตา ไซ เมี่ยน, “หฒะเก้ง นอ, เยีย บัว หาย หฒั่น ธ้วด เจ๊า, เยีย บัว เก่ เจี๊ยน มเซียะ ตอน, ไม้ ปุน ต้าย นิด ฟัด เยีย บัว. ธ้วด มี่ง เหว่ย โพว-ทง เญย เจ๊า น้าย เต๋ย เมี่ยน หลุน เมี่ยน เญย ซิน มต้าย ธีง-เหฑ่ง เญย. ฮนั้ง หน่าย, ธ้วด มี่ง เหว่ย เหล่ง เจ๊ย เญย เจ๊า, นิ่น บัว เญย ซิน เก้า ฟัด ธีง-เหฑ่ง.”

6ฮนั้ง หน่าย ไซ เมี่ยน ฯฒฯ เฒาะ ธีง-เหฑ่ง ฌั้ว ปุน ดาวิด, เหว่ย หฒุ เยียม วั้ว ไม้ ม่าย กั้น หญู่ง ฌั้ว. ขูง ม่าย เก๋ง ลิ์ว ทิน-ฮู่ง เฒาะ เหฌี่ย ต้าย เญย ฌั้ว. เซ เยียม เฒี้ยว เญย หฑะเฮมียน เก๋ง ลิ์ว เฒาะ เหฌี่ย ต้าย วั้ว ฮนอย ทิ้ว เซียง-ฌั้ว-จอม วั้ว เต๋ย โล์-ฌั้ว.

7วั้ว ฮนอย ม่าย เต้า เมี่ยน เยียม วั้ว. นิ่น โหฒว เซาโล เญย โปว, เซ เอโดม เมี่ยน, บั๋ว เห่ว โดเอก. นิ่น หธ่อ เยียม เจี๊ยน เฒี้ยว เญย หฑะเฮมียน วั้ว. นิ่น โหฒว โก๋ว เซาโล เญย แซง-คู้ โปว เญย เปย๊ย เฒ้ย.

8ดาวิด หน่าย อาหิเมเล้ก, “เยียม น้าย เม่ย ไม้ ม่าย เหยียด ติ้ว ธัง ไฟ เหยียด ฒูง หฑุ ด๊าว ไฟ? เยีย ไม้ ตุ๊ ต้อ หฑุ ด๊าว ไฟ หวัวะ กิ่น ต้าย, เหว่ย หฒุ ฮู่ง เตี๋ย พ้าย เญย เจ๊า อ๋อย หฒุ ก๊าน เจี๊ยน ต้าย.”

9ไซ เมี่ยน ก๊อง, “ต้ง เม่ย เยียม เอลา ฮ์อง ไต๋ วั้ว เต้า ฟีลิสะเตีย เมี่ยน, โกลิอัด, เญย หฑุ ด๊าว หธ่อ เปว เจี๊ยน เดีย อัน เจี๊ยน เอโฟ้ด เญย ฆะฮ้า แหมง. สี ก๊อง เม่ย อ๋อย หล่ง นอ, กุ๊น เฒาะ ต้อ มี่ง อ๊ะ. ธ้วด ลิ์ว วั้ว ฒูง ไม้ ม่าย กั้น ฒูง อ๊ะ.” ดาวิด ก๊อง, “ไม้ ม่าย หาย ฒูง หฑุ ด๊าว ด่ง วั้ว ฒูง หย่าว. โท้ ปุน เยีย โอ่,”

10วั้ว ฮนอย ดาวิด เปย๋า เซาโล หย่า มี่ง ล์อ กัด ฒี่ง เญย ฮู่ง, อาคิด.

11อาคิด เญย โปว ก๊อง บั๋ว อาคิด, “น้าย เต้า ดาวิด เป๋น นิ่น เญย เต่ย-ปูง เญย ฮู่ง ไม้ เฒ์ย? เซ น้าย เต้า เยียม วั้ว เญย มเซียะ ตอน หธัง เหย ป๋าว ฑูง ก๊อง, “‘เซาโล ไต๋ เมี่ยน เป๋น ธินๆ. ดาวิด ไต๋ เมี่ยน เป๋น หว่านๆ’ ไม้ เฒ์ย?”

12ดาวิด ฯฒฯ เยียม เฮญี้ยว จั๋ง เจี๊ยน น้าย เต๋ย หว่า, หย่า ไฮ์ กั้ม เหฑีย ไห่ กัด ฒี่ง เญย ฮู่ง, อาคิด.

13ดาวิด ฯฒฯ ทิ้ว นิ่น เญย เอ๋ย เล์ย ต้าย ตุ๊-เอ๋ย โหฒว เป๋น ปุ๊ด-ดิน เมี่ยน, หละไกว้ เกว๊ด ฒี่ง แก้ง, ววม-ฑุ่ย หย่า เหลี่ยว เหฌี่ย กั๊วะ เจี๊ยน นิ่น เญย ซยาม.

14อาคิด ฯฒฯ ก๊อง บั๋ว นิ่น เญย โปว, “หมั่ง ก๋า, เม่ย บัว ปวัด น้าย เต้า ปุ๊ด-ดิน เมี่ยน. เม่ย บัว ต้อ นิ่น ต้าย ล์อ เยีย โหฒว หาย หญู่ง?

15เยีย เฉียม หฒุ ปุ๊ด-ดิน เมี่ยน เม่ย บัว หธีง ต้าย ต้อ น้าย เต้า โล้ ต้าย เยียม เยีย เญย หฑะเฮมียน โหฒว ปุ๊ด-ดิน สี่ ปุน เยีย หมั่ง ไฟ? น้าย หญู่ง เมี่ยน ผุย ตุ๊ เปียะ เยีย เญย เปย๊า ไฟ?”

← Chapter 20 Jump to: Chapter 22 →