1 Samuel 12

Mien Bible (Thai Script) © Thailand Bible Society, 2007

← Chapter 11 Jump to: Chapter 13 →

1ซามูเอน ก๊อง บั๋ว อิสะลาเอน เญย หฒวัง เมี่ยน, “เยีย หมวัง เม่ย บัว ก๊อง เญย เหยียด ฒู้ง หว่า หย่า เหลียบ เต้า ฮู่ง เตี๋ย กุ๊น เม่ย บัว.

2อี้ หฒั่น เม่ย บัว ม่าย ฮู่ง ต้อ เม่ย บัว. เยีย กั้น หฮญัง-เจ๊ย โก๋, บะเปยย แปะ อ๊ะ. เยีย เญย ตอน บัว หย่า เหธา เม่ย บัว เยียม น้าย. เยียม เยีย หลุน เญย เฒี่ยง โห่ เถา อี้ ฮนอย เยีย ต้อ เม่ย บัว.

3เยีย เยียม น้าย. โท้ เม่ย บัว เยียม เฒี้ยว เญย หฑะเฮมียน เหธา นิ่น หล่ง โย่ว ออน ต้าย โหฒว ฮู่ง วั้ว เต้า เญย หฑะเฮมียน เถง เยีย โหฒว ฒอง-เหฒง. เยีย เฒาะ เจี๋ย หาย เต้า เญย ง่ง ไฟ? เยีย ธ้าง เจี๋ย หาย เต้า เญย ล่อ ไฟ? เยีย เควย เจี๋ย หาย เต้า ไฟ? เยีย เหฒย เจี๋ย หาย เต้า ไฟ? เยีย เยียม หาย เต้า เญย ปั์ว ฒิบ เจี๋ย ญ่าน หฮมวัง ฯฒฯ โหฒว ปุน เยีย เญย มฒีง แม่ง เญย ไฟ? กุ๊น ก๊อง อ๊ะ. เยีย ฯฒฯ ถุย หฑวน ปุน เม่ย บัว.”

4หฒวัง เมี่ยน ก๊อง, “เม่ย ไม้ เควย เจี๋ย เยีย บัว, หย่า ไม้ เหฒย เจี๋ย เยีย บัว, หย่า ไม้ เยียม หาย เต้า เญย ปั์ว ฒิบ เจี๋ย หาย หญู่ง.”

5ซามูเอน ฯฒฯ ก๊อง บั๋ว นิ่น บัว, “อี้ ฮนอย เฒี้ยว เหธา นิ่น หล่ง โย่ว ออน ต้าย วั้ว เต้า, ตอง เจี๊ยน เม่ย บัว โหฒว ฒอง-เหฒง ก๊อง, ‘เม่ย บัว ไม้ ปวัด เยีย ม่าย หาย หญู่ง ต่อง เญย ต๋อง.’” เหยียด ฒู้ง แปะ ฝีง ก๊อง, “ เฒี้ยว โหฒว ฒอง-เหฒง หมี่ อ๊ะ.”

6ซามูเอน ก๊อง บั๋ว แปะ ฝีง, “ฒิ่น ด่าง เฒี้ยว เหลียบ โมเซ เหธา อาโลน หย่า ต้อ เม่ย บัว เญย อง-ถาย เยียม อียิบ เต่ย-ปูง ธ้วด ต้าย.

7ฮนั้ง หน่าย, อี้ หฒั่น เม่ย บัว อ๋อย หฒุ โซ้ว เจี๊ยน ตี่ง เญย. เยีย อ๋อย ตอง เจี๊ยน เฒี้ยว โก๋ เม่ย บัว, ปุน เม่ย บัว จั๋ง เฒี้ยว เหว่ย เม่ย บัว เหธา เม่ย บัว เญย อง-ถาย โหฒว เญย เหยียด ฒู้ง คู้ สี่.

8“ยาโค้บ เปียะ อียิบ เต่ย-ปูง วั้ว หฒั่น, เม่ย บัว เญย อง-ถาย เห่ว เจี๊ยน โท้ เฒี้ยว. เฒี้ยว ฯฒฯ พ้าย โมเซ เหธา อาโลน. นิ่น บัว ต้อ เม่ย บัว เญย อง-ถาย เยียม อียิบ เต่ย-ปูง ธ้วด ต้าย เยียม น้าย นอม เต่ย-ปูง.

9“มป่า นิ่น บัว หละคุ เฒี้ยว, นิ่น บัว เญย ทิน-ฮู่ง หมี่ อ๊ะ. นิ่น ฯฒฯ เฒาะ นิ่น บัว จิว ปุน เยียม ฮาโซ ฒี่ง เญย ฮู่ง, ยาบิน, เญย ต้ม แปง-เปย๊ย, สิเสลา เญย ปั์ว-เดี๊ย, หย่า จิว ปุน เยียม ฟีลิสะเตีย เมี่ยน เญย ปั์ว-เดี๊ย, หย่า จิว ปุน เยียม โมอับ เญย ฮู่ง เตี๋ย เญย ปั์ว-เดี๊ย. นิ่น บัว ฯฒฯ เหธา เม่ย บัว เญย อง-ถาย เบ๊าะ จ๋า.

10เม่ย บัว เญย อง-ถาย เห่ว เจี๊ยน โท้ เฒี้ยว หย่า ก๊อง, ‘เยีย บัว ป์าม ฒุ์ย หมี่ อ๊ะ, เหว่ย หฒุ เยีย บัว กวั่ง เฒี้ยว มี่ง ฟู-สู บาอัน เฒี่ยน เหธา อัดทาโล้ด เฒี่ยน. มป่า อี้ หฒั่น โท้ เหฌียว เยีย บัว เปย๋า ดุ๊ด เยีย บัว เญย วิน-วั้ง เญย ปั์ว-เดี๊ย. เยีย บัว ฯฒฯ ฟู-สู เฒี้ยว. ’

11เฒี้ยว พ้าย เยลุบบาอัน, บาล้าก, เย้บทา เหธา ซามูเอน, หย่า เหฌียว เม่ย บัว เปย๋า ดุ๊ด ฟาม-ปูง เฝย โหล่ว วั้ว เต๋ย วิน-วั้ง เญย ปั์ว-เดี๊ย. เม่ย บัว ฯฒฯ ตุ๊ ถาย-แป้ง เญย เยียม.

12“เม่ย บัว ปวัด อัมโมน เมี่ยน เญย ฮู่ง, นาหาด, ต้าย เบ๊าะ เม่ย บัว วั้ว หฒั่น, ไม้ กุ๊น ม่าย เฒี้ยว, เม่ย บัว เญย ทิน-ฮู่ง, โหฒว เม่ย บัว เญย ฮู่ง เตี๋ย, เม่ย บัว ก๊อง บั๋ว เยีย, ‘ไม้ เฒ์ย! เยีย บัว อ๋อย หล่ง เต้า เมี่ยน โหฒว ฮู่ง เตี๋ย กุ๊น เยีย บัว.’

13หมั่ง ม่าะ! อี้ หฒั่น น้าย เซ เม่ย บัว กิ๊น ต้าย เญย ฮู่ง เตี๋ย, ต้ง เม่ย บัว โท้ ต้าย วั้ว เต้า. เฒี้ยว เหลียบ เต้า ฮู่ง ต้าย กุ๊น เม่ย บัว.

14สี ก๊อง เม่ย บัว ท่าย เฒี้ยว หย่า ฟู-สู นิ่น, หมวัง นิ่น เญย หว่า, ไม้ แหง่ง นิ่น เญย หลี่ง, เม่ย บัว เหธา กุ๊น เม่ย บัว เญย ฮู่ง เตี๋ย หย่า กัน หลง เฒี้ยว, เม่ย บัว เญย ทิน-ฮู่ง, ฯฒฯ หลง อ๊ะ.

15มป่า สี ก๊อง เม่ย บัว ไม้ หมวัง เฒี้ยว เญย หว่า หย่า แหง่ง เฒี้ยว เญย หลี่ง, เฒี้ยว เญย ปั์ว ฯฒฯ เหธา เม่ย บัว เหธา เม่ย บัว เญย ฮู่ง เตี๋ย ต๋อย-เตก.

16“ฮนั้ง หน่าย, อี้ หฒั่น เม่ย บัว โซ้ว ตี่ง หมั่ง เจี๊ยน เฒี้ยว อ๋อย เยียม เม่ย บัว เญย หฑะเฮมียน โหฒว โฮล ไห่ เญย สี่.

17อี้ ฮนอย ไม้ เฒ์ย เซียว เบย้า วิด เญย เฒี่ยง โห่ ไฟ? เยีย อ๋อย โท้ เฒี้ยว ปุน ลู่ง ป์อง บะอง, ตุ้ย บยู่ง, ปุน เม่ย บัว ฮิ้ว ตุ๊ หย่า สัม ตุ๊ ธ้วด หฒิว เฒี้ยว หมั่ง, เม่ย บัว โท้ เหลียบ ฮู่ง, เม่ย บัว โหฒว เอ๊าะ สี่ ด่ง หาย โฮล.”

18ซามูเอน ฯฒฯ โท้ เฒี้ยว. วั้ว ฮนอย เฒี้ยว ปุน ลู่ง ป์อง บะอง, ตุ้ย บยู่ง. หฒวัง แปะ ฝีง หฒะเก้ง กั้ม เหฑีย ไห่ เฒี้ยว เหธา ซามูเอน.

19หฒวัง แปะ ฝีง ก๊อง บั๋ว ซามูเอน, “โท้ เหว่ย เยีย บัว, เม่ย เญย โปว, เต๋า เก๋า โท้ เฒี้ยว, เม่ย เญย ทิน-ฮู่ง, ปุน เยีย บัว ไม้ หฒุ ไต่, เหว่ย หฒุ เยีย บัว โท้ เหลียบ เต้า ฮู่ง เตี๋ย หฒะเก้ง เป๋น เอ๊าะ สี่ จา เจี๊ยน เยีย บัว เญย เหยียด ฒู้ง ฒุ์ย.”

20ซามูเอน ก๊อง บั๋ว แปะ ฝีง, “ไม้ ตู๋ง กั้ม เหฑีย. ไม้ กุ๊น เม่ย บัว โหฒว น้าย เต๋ย เหยียด ฒู้ง เอ๊าะ สี่ มป่า เม่ย บัว ไม้ ตู๋ง เล่ย ฆอย เฒี้ยว. อ๋อย หฒุ หล่ง เหฑ่ง เม่ย บัว เญย เฮญี้ยว ฟู-สู เฒี้ยว.

21ไม้ ตู๋ง ฮวิน มี่ง กัน ไม้ ลั่ม หล่ง เญย เฒี่ยน. นิ่น บัว ไม้ ไฮ่ เถง เม่ย บัว ตุ๊ หลง, หย่า ไม้ ไฮ่ เหฌียว เม่ย บัว, เหว่ย หฒุ นิ่น บัว ไม้ ลั่ม หล่ง.

22เฒี้ยว เหว่ย นิ่น กั้น โฮล ไห่ เญย เม่ง ไม้ กวั่ง นิ่น เญย เมี่ยน, เหว่ย หฒุ เฒี้ยว อะเฮน้ย ปุน เม่ย บัว เป๋น นิ่น กั้น เญย แปะ ฝีง.

23เยีย กั้น อ๋อย หฒุ เหว่ย เม่ย บัว ไม้ ตี้ง เลี่ยว เญย เต๋า เก๋า. ไม้ เฒย แอ๊ะ, เยีย ป์าม ฒุ์ย ต่อง เฒี้ยว. เยีย หย่า อ๋อย หฌาว เม่ย บัว ฮิ้ว ตุ๊ หาย หญู่ง หลง เญย, หอบ หฒุ โหฒว เญย เจ๊า.

24เม่ย บัว อ๋อย หฒุ ท่าย เฒี้ยว, หล่ง เหฑ่ง เฮญี้ยว เหฒียบ ฒัวะ เญย ฟู-สู นิ่น. อ๋อย หฒุ จั๋ง เจี๊ยน นิ่น เหว่ย เม่ย บัว โหฒว โฮล ไห่ เญย สี่.

25มป่า สี ก๊อง เม่ย บัว แอ๋ง โหฒว เจี๊ยน เอ๊าะ สี่ เยียม นอ, เม่ย บัว เหธา เม่ย บัว เญย ฮู่ง เตี๋ย ฒู้ง อ๋อย หฒุ เหมียด อ๊ะ.”

← Chapter 11 Jump to: Chapter 13 →