Job 27

Mien Bible (Thai Script) © Thailand Bible Society, 2007

← Chapter 26 Jump to: Chapter 28 →

1โย้บ แอ๋ง เป๊าะ เจี๊ยน ก๊อง นิ่น เญย เจ๊า-โหล่ว. นิ่น ก๊อง,

2“เยีย เฒี้ยง เจี๊ยน เหยียด ลิ์ว เฒี่ยง เญย ทิน-ฮู่ง, ต้ง ไม้ ปุน เยีย ตุ๊ แป้ง ฟิม เญย เล์ย, เซ เฒี้ยง เจี๊ยน เน่น เจี๋ย เญย ทิน-ฮู่ง, ต้ง ปุน เยีย เฮญี้ยว มุน วั้ว เต้า, โฮ้ว หว่า,

3ตะฟ่าน เยีย หธ่อ ม่าย เฉีย เท้า, หย่า ม่าย ทิน-ฮู่ง เญย เฉีย เยียม เยีย เญย บะฒอง,

4เยีย เญย ฑุ่ย เหมย ฒู้ง ไม้ ก๊อง จ๊า เญย หว่า, เยีย เญย เบียด เหยียด ลิ์ว ไม้ ก๊อง-แปะ.

5เยีย ด่ง หาย ฒู้ง ไม้ ก๊อง เม่ย บัว หอบ, เถา เยีย ไต่ เยีย หธ่อ แหง่ง เจี๊ยน ก๊อง เยีย ไม้ โหฒว ต่อง.

6เยีย แหง่ง เจี๊ยน ก๊อง เยีย โหฒว ตุ๊ หอบ, ไม้ ปู๋ง กวั่ง. ตะฟ่าน เยีย เยียม เสย หฒั่ง เญย ฮนอย-เหญียะ, เยีย เญย เฮญี้ยว ไม้ เฆ่ม เยีย กั้น.

7“โท้ ปุน เยีย เญย วิน-วั้ง ฮนั้ง เอ๊าะ เมี่ยน นอ, หย่า ปุน เหธา เยีย ต๋อย-เตก วั้ว เต๋ย ฮนั้ง ไม้ แป้ง ฟิม เญย เมี่ยน.

8ไม้ ท่าย ทิน-ฮู่ง เญย เมี่ยน หฒุ ทิน-ฮู่ง ไพ กวั่ง, เซ เฒาะ นิ่น เญย แหม่ง เญย เฒี่ยง โห่, นิ่น ม่าย หาย หญู่ง ม่าย ลั่ม ฮนั้ม?

9นิ่น หฒุ เหฒะ หน่าน เญย เฒี่ยง โห่, ทิน-ฮู่ง อ๋อย หมวัง นิ่น โท้ เญย หว่า ไฟ?

10นิ่น ฯฒฯ อะเฮน้ย เน่น เจี๋ย วั้ว เต้า ไฟ? นิ่น อ๋อย หฒั่นๆ เห่ว ทิน-ฮู่ง ไฟ?

11“เยีย อ๋อย หฌาว เม่ย บัว ฮิ้ว ตุ๊ ทิน-ฮู่ง เญย ชะ ด่ง หาย โฮล, เน่น เจี๋ย วั้ว เต้า เญย หฒะเอ๋ย เยีย หย่า ไม้ ปี๋ง.

12น้าย เม่ย บัว เหยียด ฒู้ง ปวัด เจี๋ย. วั้ว หญู่ง เม่ย บัว เหว่ย หาย ติ่ว ก๊อง ธ้วด ไม้ ลั่ม หล่ง เญย หว่า?

13“น้าย เซ ทิน-ฮู่ง ปุน เอ๊าะ เมี่ยน ตุ๊ เญย ป่วน, เซ เน่น เจี๋ย วั้ว เต้า ปุน เหฒย เมี่ยน วั้ว เต๋ย หฑิบ เญย ป่วน.

14ไม้ กุ๊น นิ่น เญย ฝุเจว๊ย หฮยาง ธั้ม, เซ เหว่ย ปุน หฒุ หฑุ ด๊าว ไต๋. นิ่น เญย ฟุน-ฟะ หย่า เหยียด ลิ์ว ไม้ ตุ๊ หญั่น เป๊ว.

15นิ่น เหฒ่ง เหฌี่ย เญย เมี่ยน ฒู้ง หฒุ ววน-แป่ง ไต่, นิ่น บัว เญย เอ๊า-กว๊า หย่า ไม้ เญี้ยม.

16ไม้ กุ๊น เอ๊าะ เมี่ยน หฒ่อน ญ่าน ดุย เจี๊ยน ฮนั้ง เนีย-บูง, ม่าย ลุย-โหว ธั้ม ฒู้ง ฒุ ไม้ ฮี่ง,

17ไม้ กุ๊น นิ่น ดุย เจี๊ยน, มป่า คู้ เมี่ยน ตุ๊ ฒุ, ไม้ โหฒว ต่อง เญย เมี่ยน ตุ๊ ปุน ฆอย นิ่น เญย ญ่าน.

18เอ๊าะ เมี่ยน โหฒว เปย๊า ฮนั้ง แกง-หญ่อ บย์อง, ฮนั้ง เซี้ยว แกง เมี่ยน โหฒว เญย ลิ่ว.

19นิ่น เปว๋ย เหฌี่ย เญย เฒี่ยง โห่ นิ่น ปุ๊ด ฒ่อย เญย, มป่า เจี๋ย มี่ง ไม้ ตุ๊ ฮนั้ง หน่าย, นิ่น หนูง ฆอย มฒีง, ไม้ ปวัด เหฑ่ง นิ่น เญย ฒิ่น ฒ่อย หมี่ อ๊ะ.

20นิ่น หฒุ กั้ม เหฑีย ไห่ เญย สี่ ฮนั้ง ววม เหยียม นอ. ลู่ง ม์วน หฒั่น หฑยาว-หฒุ่น ฮล้อ นิ่น มี่ง หมี่ อ๊ะ.

21ตง ปูง เญย หฑยาว ฮล้อ นิ่น มี่ง, นิ่น ฯฒฯ มี่ง หมี่ อ๊ะ. หฑยาว กว๊าด นิ่น มี่ง เล่ย ฆอย นิ่น เญย ต๋อง.

22หฑยาว เฒาะ นิ่น ฒอย มี่ง หย่า ไม้ ค้อ-เลี่ยน. นิ่น เหฌี่ย ชะ เปย๋า หฑยาว เญย ชะ.

23เมี่ยน ไบ๋ ปั์ว ฮ้าๆ เญย จั๊ด, หฒุ่น นิ่น ธ้วด นิ่น เญย โล์-ต๋อง.

← Chapter 26 Jump to: Chapter 28 →