Job 42

Mien Bible (Thai Script) © Thailand Bible Society, 2007

← Chapter 41 Jump to:

1โย้บ ฯฒฯ เตา เฒี้ยว,

2“เยีย ฮิ้ว ตุ๊ หม่าน สี่ เม่ย ไฮ่ โหฒว เญย, เม่ย เญย หฒะเอ๋ย ไม้ ม่าย หาย หญู่ง ไฮ่ ตั๊ง ตุ๊ เจี๊ยน.

3เม่ย หน่าย, ‘น้าย หาย เต้า หล่ง ไม้ ม่าย ววน-ฒาง เญย เมี่ยน เกม เจี๊ยน เยีย เญย หฒะเอ๋ย?’ เหว่ย น้าย เยีย ก๊อง เยีย ไม้ เม่ง แปะ เญย สี่, เซ บัวะ ฮ่อง ไห่ เญย สี่, ฒู้ง เจี๋ย ด่าง เยีย ไฮ่ ฮิ้ว เญย.

4เม่ย ก๊อง, ‘หมวัง เยีย ม่าะ! เยีย อ๋อย ก๊อง. เยีย อ๋อย หน่าย เม่ย, โท้ เม่ย เตา เยีย.’

5ฒิ่น ด่าง เยีย เญย มน่อม ไฮ์ เมี่ยน ก๊อง เถา เม่ย, มป่า อี้ หฒั่น เยีย เญย มฒีง ตุ๊ ปวัด เม่ย.

6เหว่ย น้าย เยีย โหยว เยีย กั้น, หย่า ก๊อย เฮญี้ยว เฒว์ย เจี๊ยน เนีย-บูง เหธา ซ้าย-ดุย.”

7เฒี้ยว เหธา โย้บ ก๊อง ลิ์ว น้าย เต๋ย หว่า, เฒี้ยว ก๊อง บั๋ว เทมาน เมี่ยน, เอลีฟัด, “เยีย เฉีย เจี์ย เม่ย เหธา เม่ย เญย อี เต้า โล์-แกง ต่อย, เหว่ย หฒุ เม่ย บัว ก๊อง เยีย วั้ว เต๋ย หว่า เซ ไม้ หอบ, ไม้ ฮนั้ง เยีย เญย โปว, โย้บ, ก๊อง นอ.

8อี้ หฒั่น เม่ย บัว อ๋อย หฒุ ต้อ เสี่ย เต้า ง่ง โก๊ว เหธา เสี่ย เต้า ยู่ง โก๊ว มี่ง เถา เยีย เญย โปว, โย้บ, วั้ว, เหว่ย เม่ย บัว กั้น ฝ่ง ห่อ ปั๊ว เหฒี่ย. เยีย เญย โปว, โย้บ, ฯฒฯ เหว่ย เม่ย บัว เต๋า เก๋า, เหว่ย หฒุ เยีย อ๋อย ฒิบ นิ่น เต๋า เก๋า เญย หว่า, ไม้ หฒิว เม่ย บัว โหฒว หฮงง เญย เจ๊า วิ่น ปุน เม่ย บัว. เหว่ย หฒุ เม่ย บัว ก๊อง เยีย วั้ว เต๋ย หว่า เซ ไม้ หอบ, ไม้ ฮนั้ง เยีย เญย โปว, โย้บ, ก๊อง นอ.”

9เทมาน เมี่ยน, เอลีฟัด, เหธา ชูวา เมี่ยน, บินดัด, เหธา นาอาเม เมี่ยน, โสฟา, ฯฒฯ เอย เจี๊ยน เฒี้ยว พ้าย เญย หว่า โหฒว. เฒี้ยว หย่า ฒิบ โย้บ เต๋า เก๋า เญย หว่า.

10โย้บ เหว่ย นิ่น เญย โล์-แกง ต่อย เต๋า เก๋า ลิ์ว, เฒี้ยว แอ๋ง ปุน โย้บ ตุ๊ หลง ฮนั้ง โล์ วั้ว นอ. เฒี้ยว แอ๋ง จา ทิบ ปุน นิ่น เก้า ธั้ม ฒิ่น ด่าง อี โก๊ว.

11โย้บ เญย มั์ว-ต่อย เหธา ฒิ่น ด่าง ฮิ้ว ตุ๊ นิ่น วั้ว เต๋ย เมี่ยน เหยียด ฒู้ง ต้าย ล์อ นิ่น หย่า เยียม นิ่น เญย เปย๊า เหธา นิ่น หญั่น หฮนาง. นิ่น บัว หย่า เหว่ย เฒี้ยว ปุน นิ่น หฒุ เอ๊าะ เญย เหยียด ฒู้ง เหฒะ หน่าน ปุน ธีง นิ่น บัว ค้อ-เลี่ยน นิ่น หย่า ออน นิ่น เญย เฮญี้ยว. โม์ว เต้า เมี่ยน ปุน นอม ญ่าน เหธา นอม เจียม-ปั์ว-โด๊ะ-แฑง.

12เฒี้ยว เหธย ฟุ ปุน โย้บ เซ้ด เมว์ย เญย ฮนอย ตุ๊ เก้า ธั้ม ฒิ่น ด่าง เญย ฮนอย-เหญียะ. นิ่น ม่าย ปะกี ยู่ง เหยียด หว่าน เปยย ธิน เต้า, ล่อ ท่อ จุ๊ ธิน เต้า, ง่ง เหยียด ธิน ต๋อย, ล่อ เญ์ย เหยียด ธิน เต้า.

13นิ่น แอ๋ง ม่าย เสี่ย เต้า ตอน, ปัว เต้า เซียะ.

14นิ่น เถง เซียะ-โฮล ธ้วด บั๋ว เห่ว เยมีมา, ตะเหญ่ย เต้า เซียะ เญย บั๋ว เห่ว เคสิยา, ตะฟาม เต้า เซียะ เญย บั๋ว เห่ว เคเลนหับปุก.

15เยียม ก๋อม วั้ว นอม เต่ย-ปูง ล์อ ไม้ ตุ๊ ด่ง โย้บ เญย เซียะ เหฑว่ย. โย้บ หย่า ปุน นิ่น เญย เซียะ ตุ๊ เหธา นิ่น บัว เญย ก๋อ, นิ่น บัว เญย เน์า, หฑิบ นิ่น เญย จา-ตี้ง.

16ฆะฮ้า โย้บ แอ๋ง เฒี่ยง เจี๊ยน เหยียด แป๊ะ เฝย เหฒียบ หฮญัง หย่า ตุ๊ ปวัด นิ่น เญย ตอน เหธา นิ่น เญย ฟุน-ฟะ เหฌี่ย เถา เปยย ต่อย เมี่ยน.

17โย้บ เฒี่ยง ตุ๊ เสี่ยว ญ่วน ด๊าว, หฮญัง-เจ๊ย โก๋ นิ่น เกวย เสย หมี่ อ๊ะ.

← Chapter 41 Jump to: