Job 9

Mien Bible (Thai Script) © Thailand Bible Society, 2007

← Chapter 8 Jump to: Chapter 10 →

1โย้บ ฯฒฯ เตา,

2“เยีย หฒะเก้ง ฮิ้ว ตุ๊ เซ ฮนั้ง หน่าย. มป่า เมี่ยน ฮนั้ง หาย นอ ไฮ่ เยียม ทิน-ฮู่ง เญย หฑะเฮมียน เป๋น โหฒว ตุ๊ หอบ เญย เมี่ยน?

3สี ก๊อง หาย เต้า ม่าย เฮญี้ยว อ๋อย เหธา นิ่น แฑง, นิ่น ก๊อง เหยียด ธิน หฑุ่น, เมี่ยน หย่า ไม้ ไฮ่ เตา เหยียด หฑุ่น.

4ทิน-ฮู่ง เญย เฮญี้ยว ม่าย ธง-เม่ง, นิ่น เญย ชะ หย่า เฮ้น. หาย เต้า ไฮ่ แหง่ง ทิน-ฮู่ง หย่า แหง่ง ตุ๊ ฮี่ง?

5“นิ่น เฉีย เจี์ย วั้ว หฒั่น, นิ่น เฒาะ บง เบี๊ยน หฑวน ต้าย. นิ่น ซุ้ย บง, บง ฒู้ง ไม้ ฮิ้ว.

6ทิน-ฮู่ง ฆั้ม ป้าม เกน ต์ง ธ้วด นิ่น เญย ต๋อง, เดา เญย เดี้ยว หย่า ต์ง เหฑ่ง.

7นิ่น หัด บะฮนอย, บะฮนอย ฯฒฯ ไม้ ธ้วด, นิ่น แอ๋ง ปวัง เจี๊ยน หฒวัง เหฮลย.

8นิ่น กั้น ดุ เต้า ธอง ลู่ง, หย่า ธ้าย ค้อย เญย ววม-หล่าง.

9นิ่น เหฒย ปะเต๊า เหฮลย เหธา เสี่ย มั์ว-เซียะ เหฮลย, ฟาม-ธีง เหฮลย เหธา น่าม ปูง เญย เหฮลย.

10นิ่น โหฒว โฮล ไห่ เญย สี่ เจี๋ย ด่าง เยีย บัว ไฮ่ เม่ง แปะ, โหฒว บัวะ ฮ่อง เญย สี่ ฒู้ง ซ้าว ไม้ ฮี่ง.

11ทิน-ฮู่ง ยั่ง เยีย เญย กะเฮลน เจี๋ย, เยีย หย่า หมั่ง ไม้ ปวัด. นิ่น ยั่ง หฑะเฮมียน แหมง เจี๋ย, เยีย หย่า ไม้ ฮิ้ว.

12นิ่น เฒาะ นิ่น อ๋อย หล่ง เญย, ไม้ ม่าย หาย เต้า ไฮ่ ล่าน นิ่น. หาย เต้า ก๊าม หน่าย นิ่น, ‘เม่ย โหฒว หาย หญู่ง?’

13ทิน-ฮู่ง ไม้ ปุน นิ่น เญย กะเฉีย ฟิว, นิ่น ปุน เถง ลาหับ วั้ว เต๋ย หฒุ เยียม นิ่น เญย เหฒา-เดี๊ย.

14“วั้ว หญู่ง เยีย ฮนั้ง หาย นอ ไฮ่ เตา นิ่น? เยีย ฮนั้ง หาย นอ ไฮ่ กิ๊น หว่า เหธา นิ่น หลวน?

15ไม้ กุ๊น เยีย ไม้ โหฒว ต่อง, เยีย หย่า ไม้ ไฮ่ เตา นิ่น. เยีย อ๋อย หฒุ โท้ เซี้ยม เยีย วั้ว เต้า ค้อ-เลี่ยน เยีย.

16สี ก๊อง เยีย เห่ว นิ่น, นิ่น หย่า เตา เยีย, เยีย ฒู้ง ไม้ เสียน นิ่น หมวัง เยีย เญย เฉีย.

17นิ่น หล่ง ต้ม หฑยาว ป่วน เบ๊าะ เยีย, ปุน เยีย หฒุ มุน เญย ต๋อง ธั้ม เจี๊ยน ฝาว หย่า ไม้ ม่าย กอน-แป๋ง.

18นิ่น ฒู้ง ไม้ ปุน เยีย เท้า เฉีย, ต๋าว หฑวน ปุน เยีย เญย แหม่ง โค้ว เถา เดี๊ย.

19สี ก๊อง สาย ชะ, หมั่ง ม่าะ! นิ่น ด่ง หาย เฮ้น! สี ก๊อง เหว่ย เซี้ยม ฒุ์ย เญย เจ๊า, หาย เต้า ไฮ่ เห่ว นิ่น ต้าย?

20ไม้ กุ๊น เยีย ไม้ ต่อง, เยีย กั้น เญย ฑุ่ย อ๋อย ตี่ง เยีย ม่าย ฒุ์ย. ไม้ กุ๊น เยีย ไม้ ม่าย ต๋อง เฆ่ม, นิ่น อ๋อย ปุน ธีง เยีย ต่อง.

21“เยีย ไม้ ม่าย ต๋อง เฆ่ม, มป่า เยีย ไม้ กุ๊น กั้น อ๊ะ. เยีย โหยว ไห่ เยีย เญย แหม่ง.

22เหยียด ฒู้ง ฟี่ ฮนั้ง เหฑ่ง. เหว่ย น้าย เยีย ก๊อง, ไม้ กุ๊น ไม้ ม่าย ต๋อง เฆ่ม เญย เมี่ยน เหธา เอ๊าะ เมี่ยน, นิ่น เหมียด เหฑ่ง หมี่ อ๊ะ.

23เมี่ยน หฒุ เหฒะ หน่าน เลี่ยม เฒ่ย ไต่, ทิน-ฮู่ง จั๊ด ไม้ โหฒว ต่อง เญย เมี่ยน ปวั้ง เญย เหฒะ หน่าน.

24ทิน-ฮู่ง เฒาะ ป้าม เกน จิว ปุน เยียม เอ๊าะ เมี่ยน เญย ปั์ว-เดี๊ย. นิ่น ปวัง เจี๊ยน ป้าม เกน เซี้ยม ฒุ์ย เมี่ยน เญย เฮมียน. สี ก๊อง ไม้ เฒ์ย นิ่น, เป๋น หาย เต้า?

25“เยีย เญย ฮนอย-เหญียะ เจี๋ย เซี้ยบ ฮนั้ง สาย ถิว เญย เมี่ยน ถิว นอ. เยีย เญย ฮนอย เลี่ยม เฒ่ย เจี๋ย หมี่ อ๊ะ, หย่า ไม้ ปวัด หาย หญู่ง หลง.

26เยีย เญย ฮนอย เจี๋ย เซี้ยบ ฮนั้ง เซี้ยบ ไห่ เญย ฑั้ง นอ, ฮนั้ง ต้ม จ๊าง เหฌี่ย เซี้ยบ เฒาะ กะน้าย หญั่น.

27สี ก๊อง เยีย ก๊อง, ‘เยีย อ๋อย หละคุ เยีย งบ เญย สี่, เยีย อ๋อย กวั่ง ฆอย เฮมียน เฑ่า เญย เจ๊า, โหฒว เฌียน-โย่ว อ๊ะ,’

28เยีย ฯฒฯ กั้ม เหฑีย เยีย เญย เหยียด ฒู้ง โค้ว หน่าน, เหว่ย หฒุ เยีย ฮิ้ว ตุ๊ เม่ย ไม้ ฝุน เยีย ไม้ ม่าย ต่อง เญย ต๋อง.

29เยีย ฒู้ง หฒุ ตี่ง ฒุ์ย. วั้ว หญู่ง เยีย เหว่ย หาย ติ่ว แปะๆ โหฒว โค้ว?

30สี ก๊อง เยีย หล่ง ซอง หฑาว ซิน, หล่ง เฑีย เญย ววม หฑาว ปั์ว,

31มป่า เม่ย ฒอย เยีย ด๊อด ค้วด, เลี่ยม เยีย เญย ลุย-โหว อ๋อย โหยว เยีย.

32“ทิน-ฮู่ง ไม้ เฒ์ย ป้าม เมี่ยน ฮนั้ง เยีย นอ, เยีย ฯฒฯ ไม้ ไฮ่ เหธา นิ่น โหฒว สี่.

33เฝย ตุ๊ ม่าย เต้า เยียม เยีย บัว บุด๋ง เถง หมวัง, หย่า ไฮ่ เถง เยีย บัว อี ปูง ตุ๋น สี่.

34โท้ ทิน-ฮู่ง เฒาะ ฆอย นิ่น เญย ปย๊า ไม้ เบ๊าะ เยีย, หย่า โท้ ไม้ ตู๋ง โหฒว กั้ม เหฑีย เญย สี่ แฮะ เยีย.

35วั้ว หญู่ง เยีย ฯฒฯ ก๊อง หว่า หย่า ไม้ กั้ม เหฑีย นิ่น, เหว่ย หฒุ เยีย ฮิ้ว ตุ๊ เยีย เญย เฮญี้ยว ไม้ ฮนั้ง หน่าย.

← Chapter 8 Jump to: Chapter 10 →